Read Dii NÁN EEBƏRӘ́Ə VɄ 11 Bible Online

NÁN EEBƏRӘ́Ə VɄ 11 - Dii bible

NÁN EEBƏRӘ́Ə VɄ 11

¹Zó̧ó̧ 'yɛ́lı̵́ máa, wu̵ kaa 'yɛ́ zó̧ó̧, kaa gaa hȩn kaa 'yɛ́ zó̧ó̧ wu̵lı̵́ yȩ, ba báń nuŋŋɔ ó̧ má nɔ. Wu̵ hȩn kaa ho̧n ná nɔ́lȩ́ né ma kaa gaa ba dɨlı̵́ yȩ́ńná má nɔ.

²Tayɨɨ ka gu̵g nán ká tíŋ́ vu̵ máa, ho̧ vu̵ nán yȩ́ń yúú zó̧ó̧ 'yɛ́lı̵́ voolı̵́.

³Yúú zó̧ó̧ 'yɛ́lı̵́ baa vílí, ba gaa ví Tayɨɨ ba yɨb hȩn 'waapád kan moo woolı̵́ ya̧gá̧ɨ̧, moo hȩn kaa ho̧ vu̵ ví yȩ, yɨb vu̵ kan hȩn kaa ho̧n vu̵ ví ní má nɔ.

⁴Yúú zó̧ó̧ 'yɛ́lı̵́ Abɛ́l woolı̵́ ma, ká ha'ad Tayɨɨ hȩn, hȩn ha"ı̵́ woo mba ı̵́ Kayí̧n woo á̧ḿ. Tayɨɨ 'yɛ́gɛ nán to̧o̧g yúú zó̧ó̧ 'yɛ́lı̵́ woolı̵́, moo Tayɨɨ aga gu̵g hȩn pú̵lı̵́ woo ho̧ sú̵'ú̵. Kóó Abɛ́l a nɔɔ ó̧ si̧', duu dɨ lá moo moolȩ́ yúú zó̧ó̧ 'yɛ́lı̵́ woolı̵́.

⁵Yúú zó̧ó̧ 'yɛ́lı̵́ Enóg woolı̵́, gaan hȩn ku̵u̵ been nɔm máa né. Nán tóó vu̵ soowu̵ ho̧n né, moo Tayɨɨ ɓɛ laanɔ sı̵́ woolı̵́ ú̵. Tayɨɨ ká ɓɛnnɔ lá né máa, debtere Tayɨɨ woo o̧ Enóg ba to̧o̧d bi ú.

⁶A̧máa tow zó̧ó̧ 'yɛ́lı̵́ a pɛ́lı̵́ tée, nán tóó wú̵ń to̧o̧n Tayɨɨ né, moo nán ka séé ya Tayɨɨ woolı̵́ máa, a 'yɛ́ zó̧ó̧ woo Tayɨɨ ba dɨlı̵́, ba wu̵ dɨ nán ku̵u̵ soowu̵ máa vu̵ hȩn pú̵lı̵́.

⁷Yúú zó̧ó̧ 'yɛ́lı̵́ Núúhu̧ woolı̵́, ki moo Tayɨɨ woo ka vud o̧ yúú hȩn ka dɨ yaalı̵́, ka ho̧n ná kan nɔ́ɔ́ woo né yȩlȩ́. Núúhu̧ kid Tayɨɨ tɔ́g, ma du̵d nɛ́ŋ́, vu̵ sə́d kan kíi woo vu̵ wu̵lı̵́. Ma Tayɨɨ 'yɛ́gɛ nán to̧o̧g yúú zó̧ó̧ 'yɛ́lı̵́ woolı̵́. Yúú zó̧ó̧ 'yɛ́lı̵́ woo yȩlȩ́ ma, Núúhu̧ sə̧' moo yúú nán hágá yɛ voolı̵́.

⁸Yúú zó̧ó̧ 'yɛ́lı̵́ Ibrahí̧í̧ma woolı̵́, kid Tayɨɨ tɔ́g, sey ka beewu̵ máalȩ́. Ibrahí̧í̧ma daa laa hág Tayɨɨ ka dɨgɨ pú̵lı̵́ kɔ́ ı̵́ hȩn gaga wɔgɔ yȩlȩ́. Lúú hág dáń woo gbɔ, laa ya ka gaa né máalȩ́.

⁹La mbaa hág Tayɨɨ ka taddu̵ ya̧g wu̵lı̵́ yȩlȩ́ kan zó̧ó̧ 'yɛ́lı̵́ɨ, mbaa wu̵lı̵́ gááná. Ud mbaa saŋŋı̵́, kan Iizág, kan Yaakúbu ku̵u̵ nuŋ ya̧g talı̵́ dágá Tayɨɨ woolı̵́ yȩ nɔ.

¹⁰Ibrahí̧í̧ma ká laa woo kaa gbaŋ ı̵́ ku̵u̵ pɛd do̧o̧ woo dəg má nɔ. Gbaŋ yo̧o̧lȩ́ woo wu̵ Tayɨɨ, wu̵ yo̧o̧wo̧ á̧ḿ.

¹¹Yúú zó̧ó̧ 'yɛ́lı̵́ Sára woolı̵́, kóó a kan pa̧n waa pɛ́lı̵́, kóó ve' woo a ya̧a̧ sı̵́ waa ha̧a̧lȩ́ ó̧ si̧', tii waa na'a sú̵'ú̵. Ká gaa woo du̵u̵lı̵́ na'a Tayɨɨ ban gbɔn ya̧g talı̵́ woo né.

¹²Moo woo nɔ ma, wayée dágá yȩ, kóó ká a mbaa kɔ́ ı̵́ nɔm wɔgɔ si̧', duu ha̧a̧ waa. Zig woo vu̵ ɓu̵u̵ kɔ́ ı̵́ zoo waa be"ı̵́ vu̵ wɔgɔ, kɔ́ ı̵́ hád sagad vu̵ ya̧g mam gbo̧o̧lȩ́ wɔgɔ. Vu̵ wá' hád sagad yȩ vu̵ 'waa né sá̧ḿ.

¹³Vu̵ 'yɛ́ zó̧ó̧ voo Tayɨɨ woolı̵́ ma, nán yȩ vu̵ nɔɔ 'waapád. Vu̵ ho̧n hȩn du̵u̵ máa Tayɨɨ ka tan ya̧g wu̵lı̵́ yȩ né, a̧máa vu̵ ho̧go̧, vu̵ vá"u̵ la ya ɗiilílí. Ma vu̵ o̧ bin gáá vu̵ yu̵, bin nán 'yȩ́mné vu̵ yu̵ hágá yɛlı̵́.

¹⁴Nán ku̵u̵ moo moo ı̵́ yo̧go̧ yȩ, tú' ba vu̵n soo hág tóó nɔ.

¹⁵Ka vu̵n gbɔ́ dam moo hág voo, ku̵u̵ lúú gbɔ yȩ ó̧ tée, ka vu̵n nuŋ sey moo vȩ́"ȩ́ la wu̵lı̵́ ú̵.

¹⁶A̧máa vu̵n hí̧í̧ hág ı̵́ ka du̵u̵ mba má nɔ. Hȩn woo tú' hág ı̵́ be"ı̵́ má nɔ. Moo woo nɔ, sey ku̵u̵ bee Tayɨɨ, Tayɨɨ voo máa, sȩ́ḿ kɔ́nnɔ né, moo mbɔ́gɔd vu̵ kaa gbaŋ tóó sú̵'ú̵.

¹⁷Yúú zó̧ó̧ 'yɛ́lı̵́ Ibrahí̧í̧ma woolı̵́ ma, ha' Iizág kɔ́ ı̵́ hȩn ha"ı̵́ wɔgɔ, sey Tayɨɨ ka gu̵ggu̵ má nɔ. Tayɨɨ ká tad Ibrahí̧í̧ma ya̧g yúú Iizág woolı̵́. Kóó ı̵́ yo̧go̧ si̧', Ibrahí̧í̧ma mbaa bə́' moo bi ha' waa dágá woo yȩ nɔ.

¹⁸Tayɨɨ ká o̧ddu̵: “Mɔ́ń nuŋ zig móó Iizág woolı̵́;”

¹⁹moo woo nɔ Ibrahí̧í̧ma taa Tayɨɨ ban dɨ kan néélȩ́ nim Iizág nɔmmé ó̧. Ma Ibrahí̧í̧ma duu nuŋ Iizág nag 'maŋná kɔ́ ı̵́ ka níḿ dɨ nɔmmé zu wɔgɔ.

²⁰Yúú zó̧ó̧ 'yɛ́lı̵́ Iizág woolı̵́ ma, bag Yaakúbu vu̵ kan Esáw hȩn, moo u̵u̵ nuŋ hȩn ka dɨ yaalı̵́ máa pigim á̧ḿ.

²¹Yúú zó̧ó̧ 'yɛ́lı̵́ Yaakúbu woolı̵́, bag Yu̵u̵séfu waa vu̵ hȩn dágá dágá, ndág vbə́ə́ dii wu̵lı̵́, na' Tayɨɨ, ma nɔɔ lá pigim.

²²Yúú zó̧ó̧ 'yɛ́lı̵́ Yu̵u̵séfu woolı̵́, ka dɨ nɔm máa, gagad waa Izraɛ́l vu̵, o̧d vu̵ hȩn u̵u̵ kɔ́ kan nɛ́ŋ́ bii máa, sey u̵u̵ dɨ vúnní hág Mísiralı̵́ tɛ́ nɔ.

²³Yúú zó̧ó̧ 'yɛ́lı̵́lı̵́, sey ku̵u̵ ha̧a̧ Múúsa máa, ı̵́ ha̧a̧lȩ́ woo vu̵ yu̵ggu̵ sȩȩ ta̧a̧nɔ́, moo vu̵ ho̧ ka du̵u̵ na'a máa, vu̵ ndɔgɔn sı̵́ dooká gbanii woo né á̧ḿ.

²⁴Yúú zó̧ó̧ 'yɛ́lı̵́ Múúsa woolı̵́, ka na' sú̵'ú̵ máa, sɛ́n ba u̵u̵ been bi waa gbanii Faarɔ́ŋ waa[3] woo nɔ né.

²⁵Hí̧í̧ bi sú̵g nuŋ hȩn ndɔ́gɔné kan nán Tayɨɨ woo vu̵ mba mbaalı̵́ waaná' kan zó̧ó̧ dȩ"ȩ́ yúú hȩn ɓı̵́d kɔ́lı̵́lı̵́ ú̵.

²⁶Múúsa ka taa zó̧ó̧ ma"ȩ́ yúú ɓéélı̵́ woolı̵́ kɔ́ ı̵́ ı̵́ nán sənné wɔgɔ máa, wu̵ du̵u̵ mba hȩn naa hág Mísiralı̵́ yȩ, moo ká 'yɛ́ woo nɔ́ɔ́ dɨ hȩn pú̵lı̵́ ka dɨ yaalı̵́ yȩlȩ́.

²⁷Yúú zó̧ó̧ 'yɛ́lı̵́ Múúsa woolı̵́ ma, lúú gbɔ hág Mísira, ndɔgɔn zó̧ó̧ yȩ́ȩ́ gbanii woo né á̧ḿ; mbaa woo néélȩ́ na'a kɔ́ ı̵́ ka ho̧ Tayɨɨ kaa ho̧nnɔ né yȩ dɨ nɔ́lȩ́ zu wɔgɔ.

²⁸Yúú zó̧ó̧ 'yɛ́lı̵́ woolı̵́ ma, mbɔ́g Páska, o̧d nán vu̵ u̵u̵ so̧' mɛm mbee vu̵ ya̧gníimí, moo maleeka nɔm a nɔɔ waa[4] nii Izraɛ́l voo vu̵ sá.

²⁹Yúú zó̧ó̧ 'yɛ́lı̵́ waa Izraɛ́l voolı̵́ ma, vu̵ ɗáá mam yȩ́ȩ́ 'wɔ́gná kɔ́ ı̵́ mam ka wu̵lı̵́ pɛ́lı̵́ zu wɔgɔ. A̧máa nán Mísira ku̵u̵ bi gu̵g ho̧ á̧ḿ máa, mam yɔgɔy gaŋ nɔɔ vu̵.

³⁰Yúú zó̧ó̧ 'yɛ́lı̵́lı̵́, pig nán Izraɛ́l ku̵u̵ 'yȩm kə̧́ə̧́ daa kan kaa Yeríkolı̵́ bá' gúndɛm máa, dəə vu̵ túḿ.

³¹Yúú zó̧ó̧ 'yɛ́lı̵́lı̵́ ma, Raháb, wakȩ́ȩ́ tálı̵́ kan wayée vu̵ yȩ, sú̵g nɔɔn kan nán ku̵u̵ ɓéen Tayɨɨ yȩ vu̵ né, moo ká fȩȩ nán hág giiní vu̵ kan zó̧ó̧ to̧o̧, 'yɛ́ vu̵ lig woolı̵́.

³²Míń duu o̧ nɛ́nná? Sey wú̵ń maan, moo a̧n duu moon moo yúú Gedeó̧ŋ woolı̵́ né, kan Barág, kan Sáḿso̧n, kan Zébte, kan Daavíd, kan Samɛ́l, kan anábi voolı̵́ á̧ḿ.

³³Yúú zó̧ó̧ 'yɛ́lı̵́ voolı̵́ ma, vu̵ lá hág tóó vu̵ kan sɨɨ, vu̵ kɔ́ hȩn hí̧í̧lí̧ Tayɨɨ woo, vu̵ nuŋ hȩn Tayɨɨ ka tad vu̵ ya̧g wu̵lı̵́ máa, vu̵ tú̵' kəə vu̵ ya̧g.

³⁴Vu̵ nim vee gbo̧o̧ vu̵. Vu̵ sɔ́d nɔmmé, vu̵ nɔɔn vu̵ kan pag naa né. Ká vu̵ mbaan kan néélȩ́ né, ma vu̵ duu néé dɔg. Vu̵ nuŋ néélȩ́ sɨɨ kɔ́lı̵́, vu̵ mba nán gáá vu̵ ɓu̵u̵lı̵́ na'a.

³⁵Yúú zó̧ó̧ 'yɛ́lı̵́lı̵́, wakȩ́ȩ́ tóó vu̵ ho̧ nɔm voo vu̵ níḿ nɔmmé. Nán ı̵́ tóó ku̵u̵ gbɔ́ vu̵, ku̵u̵ kɔ́d vu̵ hȩn ndɔ́gɔné ɓu̵u̵lı̵́ na'a, ku̵u̵ nɔɔ vu̵ la máa, vu̵ sɛ́n sənné né, moo bi nɔɔ, bi níḿ bii ya mbaalı̵́ ı̵́ ka du̵u̵ mba hȩn máalȩ́.

³⁶Nán ı̵́ tóó vu̵ ma' zó̧ó̧ mbaa yúú ku̵u̵ kɔ́d vu̵ ba̧a̧m, ku̵u̵ gbɔ́ vu̵ kan loo yȩlȩ́. Vu̵ ta nán ı̵́ tóó vu̵ kan zaŋ, vu̵ tú̵' vu̵ lig púúsinalȩ́.

³⁷Vu̵ nɔɔ ı̵́ tóó vu̵ kan 'yɛgɛ vu̵, vu̵ sə̧'ə̧ tóó vu̵ kan síi, vu̵ nɔɔ tóó vu̵ kan pag naa. Vu̵ lúú laa ya 'waapád, tóó vu̵ ta kó̧ó̧ mbee, kan kó̧ó̧ ɓee vu̵. Gíḿ kɔ́ vu̵, vu̵ duun vu̵ kan moo, vu̵ kɔ́d vu̵ hȩn ɓı̵́d.

³⁸Maa nánán yȩ ka vu̵n mbaan hágá yɛlı̵́ né, moo mbaalı̵́ du̵u̵ voo yȩ nɔ. Vu̵ dɔ́ kə̧́ə̧́ daa hó̧g tíŋ́, kan yúú gu̵u̵ vu̵lı̵́, vu̵ ud ndɔ́g vu̵lı̵́, kan dəə vu̵lı̵́ á̧ḿ.

³⁹Tayɨɨ du̵d nán yȩ vu̵ 'waapád ya̧g yúú zó̧ó̧ 'yɛ́lı̵́ voolı̵́. Kóó ı̵́ yo̧go̧ si̧', vu̵ nugun hȩn Tayɨɨ ka tan vu̵ ya̧g wu̵lı̵́ yȩ né,

⁴⁰moo Tayɨɨ ka taad ba ví hȩn ka du̵u̵ mba má nɔ. Ma Tayɨɨ hí̧í̧ nán yȩ u̵u̵ nuŋ hȩn 'waa tíŋ́ pȩ́ń sá, a̧máa hí̧í̧ aa sú̵g nuŋ ví á̧ḿ do' dágá.