Read Dii NÁN EEBƏRӘ́Ə VɄ 12 Bible Online

NÁN EEBƏRӘ́Ə VɄ 12 - Dii bible

NÁN EEBƏRӘ́Ə VɄ 12

¹Ɨ́ baa ví máa, dúú zo' yɛ vu̵ gbɔ daa kan ba ví kan ya̧g du̵lı̵́ sú̵'ú̵. Tée ba gbɔ ví hȩn ka há' ba ví 'yȩ́ȩm yȩ, kan hȩn ɓı̵́d ka bi sə́g ba ví yȩ vu̵ ú̵. Ba ma' zó̧ó̧ kɛ ví ɗug Tayɨɨ ka 'yɛ́d ba ví yȩ nɔ.

²Ba 'yɛ́ ví la nɔ́ɔ́ Yesu woolı̵́. Zó̧ó̧ 'yɛ́lı̵́ baa ví dəŋ ya woolı̵́, wu̵ kɔ́ ma, zó̧ó̧ 'yɛ́lı̵́ baa ví laa tíŋ́. Yesu ma' zó̧ó̧ mbaa moo u̵u̵ nɔɔ bi la' vbagadı̵́. Duu taan woo nɔm sȩ́ḿ a nɔɔn yȩ né, moo ho̧ woo zó̧ó̧ dȩ"ȩ́ ku̵u̵ 'yɛ́ddu̵ yȩ nɔ. 'Ya̧'a̧ yɛ máa, mbaa dɨ ka' nag nán láan Tayɨɨ woolı̵́.

³I taawu̵ taalı̵́ ı̵́ ka ma' zó̧ó̧ yúú séené máa nán hȩn ɓı̵́d kɔ́lı̵́ ku̵u̵ séewu̵ yȩlȩ́. Tée i pɔg ya̧g sá.

⁴Sɨɨ víí yúú hȩn ɓı̵́ddı̵́ yȩ, ví kɔ́n ná ya̧g há̧á̧ u̵u̵ nɔɔn ví wu̵lı̵́ né.

⁵Ví záń sı̵́ moo zó̧ó̧ ziginí Tayɨɨ ka o̧d ví kɔ́ ı̵́ waa woo vu̵ wɔgɔ máa sá'áa? Ká o̧: “Waa míí, a̧m ho̧ hȩn tu̵lı̵́ ı̵́ 'yɛ́lı̵́ woo kɔ́ ı̵́ hȩn lee wɔgɔ sá. Sey ka séem tée, nag a ka̧'a̧m sá,

⁶moo ı̵́ 'yɛ́lı̵́ tu̵ woo nán ı̵́ ka hí̧í̧wo̧ má nɔ. Nán ı̵́ Tayɨɨ ka gaa ba vu̵n waa bii vu̵ yu̵ máa, gbɔ́ vu̵ yu̵ 'waapád.”

⁷I ma' zó̧ó̧ yúú hȩn ndɔ́gɔné víílí ú. Tayɨɨ si̧'i̧d ví si̧'i̧ní waaɨ. Waa tóó ba' woo ka si̧'i̧nɔ né máa dɨláa?

⁸Tow Tayɨɨ a si̧'i̧n ví kɔ́ ı̵́ ka si̧'i̧n waa tóó vu̵ wɔgɔ né tée, ví waa yȩ́ń vu̵ yu̵ pɛ́lı̵́, a̧máa ví waa ɓáa vu̵ yu̵.

⁹Ba duu taa ví ba' baa ví hágá yɛ vu̵ yu̵. Vu̵ si̧'i̧d ba ví, a̧máa ba na' vu̵ ví bó! Ndíga ba kid ví Ba' baa ví ı̵́ be"ı̵́ wu̵ tɔ́g mba, tée báń nuŋ ví vágád.

¹⁰Ba' baa ví ı̵́ hágá yɛ vu̵ si̧'i̧d ba ví sey waaná' kɔ́ ı̵́ ku̵u̵ hí̧í̧ wɔgɔ. A̧máa Tayɨɨ si̧'i̧d ba ví woo moo hȩn du̵u̵ɨ, moo aa mbaa ví kɔ́ ı̵́ bi wɔgɔ.

¹¹Sey ku̵u̵ dɨ ba ví si̧'i̧ní tée, ba taa ví ba hȩn zó̧ó̧ vi̧i̧níi, ba hȩn zó̧ó̧ dȩ"ȩ́ȩ pɛ́lı̵́. A̧máa pig woolı̵́ tée, nán ı̵́ ku̵u̵ tú'ud vu̵ hȩn kan hȩn si̧'i̧ní máa, vú̵ń nuŋ mbaalı̵́ ká̧'a̧d, vú̵ń mbaa kɔ́ ı̵́ Tayɨɨ ka hí̧í̧ wɔgɔ.

¹²Moo woo nɔ, i sȩn nag nɔm víí yȩ vu̵ la ú̵! I zigid doo nɔm víí yȩ vu̵ la ú̵!

¹³I mbɔ́gɔd doo víí vu̵ hi̧naa waa ka líí la wu̵lı̵́ máa ó̧, moo doo nɔm yȩ u̵u̵ to̧'o̧y sá, a̧máa u̵u̵ ka̧' ka̧"ȩ́ȩ.

¹⁴I sȩn fó̧ó̧, moo ví mbaa mbaalı̵́ du̵u̵ kan nán vu̵ 'waapád. I mbaa də́ń kɔ́ ı̵́ Tayɨɨ ka hí̧í̧ wɔgɔ. A ı̵́ yo̧go̧ pɛ́lı̵́ tée, nán dágá aga wú̵ń ho̧n ı̵́ 'yɛ́lı̵́ baa ví ní.

¹⁵I gággú̵, nán tóó a kéé zó̧ó̧ nán Tayɨɨ woo gbɔ sá. A tii mbaa kɔ́ ı̵́ la' yó̧m tóó ka tá̧' na' ma, ku̵u̵ lá líid woo tée, ka lı̵́d nán vu̵ máa wɔgɔ sá.

¹⁶I gággú̵, nán tóó a kɔ́ ɓáa sá, a ɓéé hȩn Tayɨɨ woo kɔ́ ı̵́ Esáw ka hɨ nii woo gbɔd daa sá̧ŋ́ moo hȩn lálı̵́ do' dágá aga yȩ nɔ wɔgɔ sá.

¹⁷Ví gaa ú̵, pig woo máa, duu hí̧í̧ ba' bii a bag bi hȩnne. A̧máa kóó Esáw ká a soo hȩn yȩ kan mɛmɛ́ḿme si̧', ba' woo ndaa gbɔgɔ la zulí, moo Esáw ká kan kɛb tóó a kɔ́ ma, a pí hȩn ka kɔ́ yȩ máa pɛ́lı̵́.

¹⁸Ma ví séé la za'an gu̵u̵ waa Izraɛ́l ka vu̵n baa za'an yȩ né. Gu̵u̵ Sináy yȩ, vee gbo̧o̧ ká du̵u̵lı̵́, kan dim ka sa̧' wu̵lı̵́, kan mam hi̧i̧g ka fii wu̵lı̵́, bó̧ó̧ ka sée hȩn wu̵lı̵́,

¹⁹kan yɛ́g ga̧' naa, kan yɛ́g gbo̧o̧ tóó á̧ḿ. Sey waa Izraɛ́l ku̵u̵ ki yɛ́g yȩ máa, vu̵ vi a duu o̧d bi moo sá,

²⁰moo ku̵u̵ ki dooká yȩ máa, mba vu̵ kɛb, moo ká o̧: “Hȩn 'waapád u̵u̵ za' gu̵u̵ yȩ tée, kóó a pú̵ggɨ si̧', u̵u̵ nɔɔwo̧ kan 'yɛgɛɨ.”

²¹A̧máa hȩn ho̧lȩ́ yȩ ká hȩn dú̵ú̵ zálı̵́ɨ, ma Múúsa o̧: “Mí tu̵u̵ du̵u̵n də́ń né, dú̵ú̵ kɔ́n á̧ḿ!”

²²A̧máa ı̵́ víí, vi séé la gu̵u̵ Sió̧ŋŋı̵́, kan kaa gbaŋ Tayɨɨ ı̵́ zá̧a̧d yȩ woolı̵́, wu̵ Yerúsalem ı̵́ be"ı̵́ zu, kan maleeka woo uzinɛɛre há̧á̧ uzinɛɛre yȩ voolı̵́ sú̵'ú̵.

²³Ɨ́ víí, ví séé la nán sú̵ggı̵́ zó̧ó̧ dȩ"ȩ́ yȩ voolı̵́. Vu̵u̵ waa nii Tayɨɨ woo ku̵u̵ bíńda yéé voo be"ı̵́ yȩ nɔ. Ví séé la víí bə́' Tayɨɨ ı̵́ moo sə̧"ȩ́ yúú nán voolı̵́ 'waapád yȩ woolı̵́, kan yigid nán ku̵u̵ kɔ́ hȩn hí̧í̧lí̧ Tayɨɨ woo si̧' la gbug máa voolı̵́ sú̵'ú̵ á̧ḿ.

²⁴Ví séé la víí dɨ Yesu ı̵́ ka dɔ́ moo mbɔ́ggı̵́ sa̧a̧m nánán voolı̵́ kan Tayɨɨ, moo ya̧g talı̵́ 'maŋŋı̵́, kan mɛm woo ka yɛ́d yȩ nɔ. Mɛm woo moo moo to̧o̧ mba moo ı̵́ Abɛ́l woo á̧ḿ.

²⁵I gággú̵! I ma moo ı̵́ ka dɨd ví moo o̧lȩ́ yȩ woo sá. Nán ı̵́ ku̵u̵ ma moo ı̵́ ka dɨd vu̵ moo Tayɨɨ woo gagané hágá yȩ máa, vú̵ń sɔ́n hȩn si̧'i̧ní yȩlȩ́ né, ma dan tóó ba vía? Tow aa tii pig sad ví ı̵́ ka dɨd ba ví moo o̧lȩ́ zu̵u̵ be"ı̵́ zu woo tée, báń sə́n ví ní á̧ḿ.

²⁶Yɛ́g woo ká wu̵ nam hág, a̧máa 'ya̧'a̧ yɛ máa tad ba ví ya̧g sú̵'ú̵, o̧: “Míń duu nam hág tóó, a̧máa hággɨ dágá pɛ́lı̵́. Míń nam be' á̧ḿ.”

²⁷Moo ka o̧: “Míń duu nam hág tóó” yȩ, tú' hȩn ku̵u̵ yɨb vu̵ yȩ ba vú̵ń nam, ba vú̵ń tú 'waa la, moo ı̵́ ba ku̵u̵ nam voo né máa, u̵u̵ mbaa voo ú̵.

²⁸Kaa nuŋ ví gbaŋ waalı̵́ ı̵́ ka nam né yȩ, ba dȩn ví Tayɨɨ naggɨ. Moo woo nɔ ma, ba kɔ́ddu̵ ví ba'ad kɔ́ ı̵́ ka hí̧í̧ wɔgɔ; ba na"o̧ ví; ba ndɔggu̵ ví á̧ḿ,

²⁹moo Tayɨɨ baa ví wu̵ vee ı̵́ ka tud hȩn má nɔ.