Read Dii NÁN EEBƏRӘ́Ə VɄ 13 Bible Online

NÁN EEBƏRӘ́Ə VɄ 13 - Dii bible

NÁN EEBƏRӘ́Ə VɄ 13

¹I gbɔ hí̧nní ya víílí sá, i mbaa kɔ́ ı̵́ waa na'a dágá vu̵ wɔgɔ Krístu woolı̵́.

²I záń gáá vu̵ fȩȩlȩ́ sá, moo hȩn kɔ́lı̵́ ı̵́ yo̧go̧ yȩ, nán tóó ká vu̵ fȩȩn maleeka vu̵ wu̵lı̵́, a̧máa ká vu̵ gaan vu̵, vu̵n maleeka vu̵ yu̵ né.

³I taa nán ı̵́ ku̵u̵ dɨ lig púúsinalȩ́ máa vu̵ kɔ́ ı̵́ kíí sú̵g mbaa kan vu̵ du̵u̵lı̵́ zu wɔgɔ. I taa nán ı̵́ ku̵u̵ duun vu̵ kan moo máa vu̵ kɔ́ ı̵́ ka vu̵n sú̵g duun ví moo kan vu̵ á̧ḿ zu wɔgɔ.

⁴I na' moo kȩ́ȩ́, kan moo wə̧ə̧ máa ya 'waapád. Wə̧ə̧ kan kȩ́ȩ́ u̵u̵ buu ya̧g talı̵́ voo sá, moo Tayɨɨ wú̵ń dɨ moo sə̧"ȩ́ yúú nán ku̵u̵ tá kan wakȩ́ȩ́ vu̵, kan nán ɓáa kɔ́lı̵́ máa vu̵ á̧ḿ.

⁵I baa 'yɛ́ zó̧ó̧ víí sɨɨdelı̵́ sá. Zó̧ó̧ víí a dȩ' yúú hȩn kíí nuŋ máalȩ́, maa sú̵'ú̵, moo Tayɨɨ o̧: “Míń gbɔn mɔ́ né sá̧ḿ, míń gbɔn mɔ́ la kəd né.”

⁶Moo woo nɔ báń o̧ ví kan zó̧ó̧ baa ví 'waapád, báń o̧ ví: “Ɨ́ 'yɛ́lı̵́ wú̵ńnɔ ya maan. Dú̵ú̵ wú̵ń kɔ́n mí ní. Nánán vú̵ń kɔ́n nɛ́nná?”

⁷I duu taa ı̵́ nii víí ká tíŋ́ kú̵u̵ baa o̧d ví moo Tayɨɨ woo máa vu̵ á̧ḿ. I taa mbaalı̵́ voo ku̵u̵ mbaa ma ku̵u̵ nɔɔ wu̵lı̵́ máa á̧ḿ. I 'yȩ́ŋ́ zó̧ó̧ 'yɛ́lı̵́ voo nɔ.

⁸Mbaalı̵́ Yesu Krístu woo ká bán pee, mbaa ɓəə wu̵ yu̵ ı̵́ yo̧go̧ á̧ḿ, wú̵ń dɨ mbaalı̵́ ı̵́ yo̧go̧ há̧á̧ káákáá á̧ḿ.

⁹I gbɔd nán tóó vu̵ fó̧ó̧ u̵u̵ zo' ví tid kan moo tú"í tóó vu̵, kan moo tú"í gáá voo vu̵ á̧ḿ sá. Du̵u̵ ú̵, Tayɨɨ ka nee ví zó̧ó̧ kan zó̧ó̧ nán woo má nɔ. A̧máa zó̧ó̧ víí u̵u̵ néé kan hȩn tú"í yúú hȩn lálı̵́lı̵́ sá. Nán ı̵́ ku̵u̵ na' moo tú"í yúú hȩn lálı̵́lı̵́ máa, kɔ́n vu̵ voo hȩn du̵u̵ tóó né.

¹⁰Nán hȩn ha"ı̵́ vu̵ lig hȩn ha"ı̵́ nán Yúúda voolı̵́ máa, vu̵ kan néélȩ́ hȩn ku̵u̵ ha' ya hȩn ha"ı̵́ baa vílí yȩ lálı̵́ woo pɛ́lı̵́.

¹¹Ɨ́ nii hȩn ha"ı̵́ nán Yúúda voo vu̵ pa̧ŋ mɛm hȩn buulí voo vu̵ laan ya gbo̧o̧ mba hȩnné moo bi la ha"u̵ moo hȩn ɓı̵́d vu̵ yu̵, a̧máa vu̵ a̧n hȩn buulí vu̵ kaa pigim.

¹²Moo woo nɔ ma, Yesu nɔɔ kaa pigim á̧ḿ, moo bi na'ad hȩn ɓı̵́d nán voo kan mɛm dáń bii nu.

¹³Moo woo nɔ, ba sú̵g vúd la kan ví kannɔ kaa pigim, ba sú̵g ma' ví zó̧ó̧ yúú ɓéélı̵́ woo ku̵u̵ ɓééwu̵ yȩlȩ́ á̧ḿ,

¹⁴moo kaa kaa mbaa ví wu̵lı̵́ hágá yɛ vú̵ń mbaan káákáá né. A̧máa ba soo ví baa kaa gbaŋ ka dɨ yaalı̵́ yȩ nɔ.

¹⁵Moo woo nɔ, tée báń na' ví Tayɨɨ kan yɛ́g Yesu woo gən ya̧g né. Báń na"o̧ ví kan ya̧g baa ví kɔ́ ı̵́ hȩn ha"ı̵́ wɔgɔ.

¹⁶I záń hȩn du̵u̵ kɔ́lı̵́ sá. Nóo a maa daga, nóo a maa daga, moo hȩn ha"ı̵́ ı̵́ yo̧go̧ máa, vu̵u̵ to̧o̧d Tayɨɨ.

¹⁷I duu ı̵́ nii víí vu̵, i kid vu̵ tɔ́ggú̵, moo vu̵ tu̵ ví nən né, moo vú̵ńnɔ tú'ud Tayɨɨ hȩn ku̵u̵ kɔ́ yúú víílí máa. I kid vu̵ tɔ́g tée, vú̵ń kɔ́ ba'ad voo kan zó̧ó̧ dȩ"ȩ́. A ı̵́ yo̧go̧ pɛ́lı̵́ tée, vú̵ń kɔ́ ba'ad kan zó̧ó̧ ví̧i̧ní, tée hȩn woo wú̵ń du̵u̵n ví ní á̧ḿ.

¹⁸I baa ɓá' Tayɨɨ yúú vóólı̵́, moo vɔ́ gaan hȩn ɓı̵́d ı̵́ kóó kɔ́n nán tóó vu̵ né, a̧máa vɔ́ hí̧í̧ bi mbaa du̵u̵lı̵́ na'a yúú hȩn 'waapáddı̵́.

¹⁹Mí vi víw, tée i ɓá' Tayɨɨ a gbɔn hi̧naa laalı̵́ víílí vaŋná.

²⁰Tayɨɨ wu̵ kɔ́ hȩn to̧o̧g, wu̵ nim ı̵́ 'yɛ́lı̵́ baa ví Yesu, ı̵́ mbee tu̵lı̵́ gbo̧o̧ baa ví nɔmmé. Yesu yɛd mɛm woo, ma ya̧g talı̵́ ı̵́ káákáá woo mbɔ́gɔy.

²¹Tayɨɨ a pú̵ ví néélȩ́, ví kɔ́ hȩn du̵u̵ ka hí̧í̧ máa 'waapád. A kɔ́ hȩn ka to̧o̧du̵ máa baa vílí kan yɛ́g Yesu Krístu woo nɔ. Ba na' ví Yesu Krístu há̧á̧ káákáá. Aamɛ́n.

²²Dan kirtȩ́n vu̵, mí vi ví, i ma' zó̧ó̧, ví ki moo zó̧ó̧ ziginí yɛ ú̵, moo hȩn káń bíńda ví ɗerwəl yɛlı̵́ yɛ, vu̵ lú̵gu̵ né.

²³Mí hí̧í̧ i gaa da ba ví kirtȩ́n Timɔtée pee, vu̵n vuddu̵ sı̵́ lig púúsinalȩ́ ó̧. Tow a ya̧ ya míílí̧ há̧ná ó̧, a̧n dɨ ví laalı̵́ ho̧lȩ́ tée, míń pa̧ŋŋɔ nagá á̧ḿ.

²⁴I vá' ı̵́ nii ba'ad diilí víí vu̵ wu̵lı̵́, kan nán Tayɨɨ woo vu̵ 'waapád. Da ba ví kirtȩ́n ı̵́ hág Italíilí vu̵ vá' ví 'waapád.

²⁵Tayɨɨ a kɔ́d ví zó̧ó̧ nán 'waapád á̧ḿ.