Read Dii NÁN EEBƏRӘ́Ə VɄ 2 Bible Online

NÁN EEBƏRӘ́Ə VɄ 2 - Dii bible

NÁN EEBƏRӘ́Ə VɄ 2

¹Moo woo nɔ, ba má'án ví kan moo yȩ́ń kaa ki ví yȩ, a sȩ́ńna wu̵lı̵́, moo kɔ́ kan ya̧a̧ ba ví ú.

²Ya̧g ba'ad maleeka ku̵u̵ pa̧n ya Múúsa yɛ, ká moo yȩ́ńne; nán 'waapád ku̵u̵ duun moo voo né, ku̵u̵ kin tɔ́g né máa, vu̵ nuŋ hȩn si̧'i̧ní yagalı̵́ á̧ḿ.

³Ma tow aa ɓéé ví moo sə́nné yȩ tée, báń dəŋ née sɔ́d ví hȩn si̧'i̧ní yȩlȩ́lá? Ɨ́ 'yɛ́lı̵́ baa ví dəŋ moo moo sə́nné yȩ wu̵ tíŋ́, ma nán ku̵u̵ ki máa, vu̵ duu tú'ud ba ví moo yȩ́ń yȩ.

⁴Tayɨɨ á̧ḿ, kɔ́ hȩn sa̧ga̧ vu̵ kə́dkə́d kan hȩn zálı̵́ vu̵ ɓu̵u̵lı̵́ na'a, bi tú' ba moo yȩ́ńne. Duu kɔ́ yigid woo yȩ' hȩn gaalı̵́ vu̵ té' kɔ́ ı̵́ ka hí̧í̧ wɔgɔ.

⁵Hág ı̵́ a dɨ yaalı̵́, kóó o̧ moo woo wu̵lı̵́ yȩ, Tayɨɨ pú̵n maleeka vu̵ yu̵ néélȩ́ wu̵lı̵́ né.

⁶Ka' tóólı̵́ máa, nán tóó bíńda debterelı̵́ o̧: “Tayɨɨ, nánán sú̵u̵ vu̵ ȩn, mɔ́ń duu taa vu̵lá? Nánán yɛ, mɔ́ń duu gbá̧' vu̵ yaa?

⁷Sey waaná' máa, mɔ́ nə' vu̵ zu̵u̵ tíŋ́ maleeka voolı̵́. Mɔ́ pú̵ vu̵ nii kan na"ȩ́ kɔ́ ı̵́ gbanii tóó wɔgɔ.

⁸Mɔ́ 'yɛ́ vu̵ yúú hȩn 'waapáddı̵́.” Sey ka o̧ Tayɨɨ ba “'yɛ́ nán vu̵ yúú hȩn 'waapáddı̵́” yȩ, hȩn woo tú' ba gbɔd vu̵ hȩn 'waapád sú̵'ú̵, ba səg hȩn tóó gbɔn né. Kóó ı̵́ yo̧go̧ si̧', ba ho̧n ví nánán ba vu̵n dɨ kan néélȩ́ yúú hȩn 'waapáddı̵́ né.

⁹A̧máa ba ho̧ ví hȩn yȩ: sey waaná' máa, Yesu ká wu̵ nə'əy tíŋ́ maleeka voolı̵́, moo bi nɔɔ moo nánán voo 'waapád. Zó̧ó̧ nán Tayɨɨ woo wu̵ kɔ́ hȩn yȩ nɔ. 'Ya̧'a̧ yɛ ba ho̧go̧ ví nuŋ nɔm ma, Tayɨɨ pú̵gu̵ nii kan na"ȩ́ kɔ́ ı̵́ gbanii tóó wɔgɔ.

¹⁰Tayɨɨ ka yɨb hȩn vu̵, ka tíd vu̵ 'waapád yȩ, kɔ́ yagalı̵́, kɔ́d Yesu hȩn ndɔ́gɔné moo a mbaa kɔ́ ı̵́ Tayɨɨ ka hí̧í̧ wɔgɔ, moo a pa̧ŋ waa ɓu̵u̵lı̵́ na'a vu̵, u̵u̵ la mbaa ya na"ȩ́ biilí. Aga Yesu wu̵ pa̧ŋ vu̵ laan ya hȩn sənnélȩ́.

¹¹Ma Yesu ka tɛ hȩn ɓı̵́d nán voo, kan nán ı̵́ hȩn ɓı̵́d voo ku̵u̵ tey sú̵'ú̵ yȩ, ya voo 'waapád, vu̵ waa ba'a dágáɨ. Moo woo nɔ, sȩ́ḿ kɔ́n Yesu né, a̧máa bee vu̵ dag sá̧ŋ́ vu̵,

¹²o̧: “Tayɨɨ, míń o̧d dan sá̧ŋ́ vu̵ moo yúú móólȩ́ ó̧. Míń bee yéé na'am sa̧a̧m nánán sú̵ggı̵́ voolı̵́ ú̵.”

¹³Duu o̧: “Ɨ́ míí, míń 'yɛ́ zó̧ó̧ míí Tayɨɨ woolı̵́.” Duu faa o̧: “Mí du̵u̵lı̵́ kan waa ı̵́ Tayɨɨ ka pú̵n máa vu̵ á̧ḿ!”

¹⁴Ɨ́ ka bee vu̵ “waa vu̵” yȩ, vu̵ yo̧go̧ kan mɛmme. Moo woo nɔ, Yesu aga tii mbaa kɔ́ ı̵́ ku̵u̵ mbaa wɔgɔ, mbaa mbaalı̵́ nánán kɔ́ ı̵́ vu̵ wɔgɔ á̧ḿ. Seeɗán ka tíd néélȩ́ nɔm woo yȩ, Yesu kɔ́ hȩn yȩ, moo bi tud néélȩ́ Seeɗán woo kan nɔm bii nu,

¹⁵moo bi səd nán ı̵́ dú̵ú̵ nɔm ka tíd vu̵ kɔ́ ı̵́ gba'a vu̵ wɔgɔ sey 'waapád yȩ nɔ.

¹⁶Yesu ya maan maleeka vu̵ yu̵ né, a̧máa yaa Ibrahí̧í̧ma aa yée vu̵ yu̵ maalȩ́.

¹⁷Moo woo nɔ, Yesu tii man kan daa sá̧ŋ́ vu̵ 'má', moo bi mbaad vu̵ ı̵́ nii hȩn ha"ı̵́ voo, ı̵́ ka buun ya̧g talı̵́ woo né, ka hi̧' kan zó̧ó̧ to̧o̧ yúú ba'ad woolı̵́ tíŋ́ Tayɨɨ woolı̵́, moo Tayɨɨ a kéé hȩn ɓı̵́d nán zó̧ó̧ 'yɛ́lı̵́ voo gbɔ ú̵ má nɔ.

¹⁸Ká tíŋ́ máa, Seeɗán zo' Yesu, ma Yesu nuŋ hȩn ndɔ́gɔné wu̵lı̵́ á̧ḿ; moo woo nɔ 'ya̧'a̧ yɛ máa, dɨ kan néélȩ́ maa nán ı̵́ Seeɗán ka zo' vu̵ máa vu̵ á̧ḿ.