Read Dii NÁN EEBƏRӘ́Ə VɄ 3 Bible Online

NÁN EEBƏRӘ́Ə VɄ 3 - Dii bible

NÁN EEBƏRӘ́Ə VɄ 3

¹Moo woo nɔ, dag sá̧ŋ́ kirtȩ́n vu̵, ı̵́ víí, Tayɨɨ ka bee ví á̧ḿ yȩ, i 'yɛ́ nɔ́ɔ́ Yesu woolı̵́. Tayɨɨ ba"u̵ ya, moo a mbaa ı̵́ nii hȩn ha"ı̵́ yúú zó̧ó̧ 'yɛ́lı̵́ kaa pa ví moo woo yȩlȩ́.

²Kɔ́ hȩn hí̧í̧lí̧ Tayɨɨ ka ba"u̵ ya yȩ woo nɔ, kɔ́ ı̵́ ku̵u̵ bíńda yúú Múúsa woolı̵́ wɔgɔ, vu̵ bíńda: “Múúsa kɔ́ hȩn hí̧í̧lí̧ lig Tayɨɨ woolı̵́ 'waapád.”

³Nán ka yo̧o̧ lig máa, wu̵ nuŋ na"ȩ́ mba lig yȩ. Ma Yesu wu̵ maa na"ȩ́ mba na"ȩ́ ı̵́ Múúsa woo á̧ḿ,

⁴moo lig 'waapád, ı̵́ yo̧o̧lȩ́ woo dɨlı̵́. A̧máa Tayɨɨ wu̵ yo̧o̧ woo hȩn vu̵ 'waapád.

⁵Múúsa woo máa, kɔ́ hȩn hí̧í̧lí̧ Tayɨɨ woo lig Tayɨɨlı̵́ 'waapád, mbaa nán ba'ad, moo bi moo moo yúú hȩn Tayɨɨ ka dɨ o̧lȩ́ yȩlȩ́.

⁶A̧máa Krístu woo máa, mbaa waa ku̵u̵ 'yɛ́gɛ yúú lig Tayɨɨlı̵́ yȩ nɔ. Ba ví lig woo nɔ, tow aa 'yɛ́ ví zó̧ó̧ yȩ́ńná yúú hȩn Tayɨɨ ka tad ba ví ya̧g, bi pú̵ ba ví woolı̵́ yȩ ó̧ tɛ́ nɔ.

⁷Moo woo nɔ, kɔ́ ı̵́ yigid Tayɨɨ woo ka o̧ wɔgɔ, o̧: “Tow i ki yɛ́g Tayɨɨ woo ɓəə tée,

⁸i ŋgó̧ó̧ tɔ́g kɔ́ ı̵́ a ví yée ku̵u̵ lúú moo kannɔ sey tóólı̵́ máa wɔgɔ sá, kɔ́ ı̵́ ká ku̵u̵ gu̵ggu̵ hó̧g kȩŋŋı̵́ máa wɔgɔ sá á̧ḿ.

⁹A ví yée ká vu̵ zo'on, vu̵ gu̵g ho̧n wu̵lı̵́ á̧ḿ. A̧máa ká vu̵ ho̧ hȩn káń kɔ́d vu̵ ve' vo' ndaddú̵ yȩlȩ́ máa ó̧ bó!

¹⁰Moo woo nɔ, mí kɔ́d nán yȩ vu̵ zó̧ó̧ yȩ́ȩ́, ma mí o̧: ‘Vu̵ kɔ́ də́ń hȩn sɔd moo taalı̵́ voolı̵́ ú̵; vu̵ gaan hi̧naa míí ní sá̧ḿ.’

¹¹Mí sa̧a̧ hȩn kan zó̧ó̧ yȩ́ȩ́, mí o̧ ba vú̵ń dɔ́n ya u̵u̵ sú̵g nəən kan mí wu̵lı̵́ yȩ né sá̧ḿ.”

¹²Dan kirtȩ́n vu̵, i gággú̵, nán tóó víílí sa̧a̧mé a mbaa kan zó̧ó̧ ɓı̵́d ı̵́ moo faalı̵́, a kéé Tayɨɨ ı̵́ zá̧a̧d gbɔ sá.

¹³A̧máa kóó nɔ́nná a zigid daga zó̧ó̧ zá̧ga̧ 'waapád, sey u̵u̵ dɨ o̧lȩ́: “ɓəə nɔ, ɓəə nɔ” yȩlȩ́, moo nán tóó víílí sa̧a̧mé a ŋgó̧ó̧ tɔ́g moo hȩn ɓı̵́d kɔ́lı̵́ sá.

¹⁴Ba ví nán kaa sú̵g mbaa ví kan Krístu máa vu̵ yu̵, tow aa 'yɛ́ ví zó̧ó̧ woolı̵́ yȩ́ńná há̧á̧ bá' sí̧'í̧dí kɔ́ ı̵́ kaa dəŋ 'yɛ́ ví yȩ wɔgɔ tɛ́ nɔ.

¹⁵Hȩn debtere ka o̧ pee wu̵ yɛ nɔ: “Tow i ki yɛ́g Tayɨɨ woo ɓəə tée, i ŋgó̧ó̧ tɔ́g kɔ́ ı̵́ a ví yée ku̵u̵ lúú moo kannɔ sey tóólı̵́ máa wɔgɔ sá.”

¹⁶Nán ı̵́ ku̵u̵ ki yɛ́g Tayɨɨ woo, ma ku̵u̵ lúú moo kannɔ máa, wu̵ nóo vu̵lá? Wu̵ nán ı̵́ Múúsa ka vud vu̵ ya hág Mísiralı̵́ máa vu̵ yu̵ náa!

¹⁷Tayɨɨ ká kɔ́d nóo vu̵ zó̧ó̧ yȩ́ȩ́ ve' vo' ndaddú̵ máalá̧? Ká kɔ́d nán ku̵u̵ kɔ́ hȩn ɓı̵́d, ma ku̵u̵ nɔɔ hó̧g kȩŋŋı̵́ máa vu̵ yu̵.

¹⁸Sey Tayɨɨ ka sa̧a̧ hȩn kan zó̧ó̧ yȩ́ȩ́, ka o̧: “Vú̵ń dɔ́n ya u̵u̵ sú̵g nəən kan mí wu̵lı̵́ yȩlȩ́ né sá̧ḿ” máa, o̧d nóo vu̵ moo yȩlá? O̧d nán ku̵u̵ ŋgó̧ó̧ tɔ́g máa vu̵ yu̵.

¹⁹Ba ho̧ ví sú̵'ú̵; vú̵ń dɔ́n ya nəəlȩ́ yȩlȩ́ né, moo vu̵ 'yɛ́n zó̧ó̧ voo Tayɨɨ woolı̵́ né.