Read Dii NÁN EEBƏRӘ́Ə VɄ 4 Bible Online

NÁN EEBƏRӘ́Ə VɄ 4 - Dii bible

NÁN EEBƏRӘ́Ə VɄ 4

¹Tayɨɨ ta ya̧g gbɔd ba ví ba báń sú̵g nəə ví kan bi ya nəəlȩ́ biilí á̧ḿ. Tée ba gág ví nán tóó víílí sa̧a̧mé, ya nəəlȩ́ yȩ a sɔ́ddu̵ sá,

²moo ba ki ví sı̵́ moo to̧o̧ 'maŋ yɛ kɔ́ ı̵́ nán kú̵u̵ mbaa hó̧g kȩŋŋı̵́, ku̵u̵ ki máa vu̵ wɔgɔ ú̵. Vu̵ ki ya̧g ba'ad yȩ sú̵'ú̵, a̧máa kɔ́n vu̵ hȩn tóó né, moo sey ku̵u̵ ki máa, vu̵ fȩȩn moo yȩ né.

³Ɨ́ baa ví kaa fȩȩ ví moo yɛ, báń la dɔ́ ví ya nəəlȩ́ Tayɨɨ ka o̧ yȩlȩ́, ká o̧: “Mí sa̧a̧ hȩn kan zó̧ó̧ yȩ́ȩ́, mí o̧ ba vú̵ń dɔ́n ya u̵u̵ sú̵g nəən kan mí wu̵lı̵́ yȩ né sá̧ḿ.” Tayɨɨ moo moo yȩ, kóó ba'ad bii ba kan 'wáa sı̵́ woo gbó̧ŋ́ na'a, sey ká ba kii yɨb hág máalȩ́ si̧'.

⁴Ka' tóólı̵́ debterelı̵́ máa, vu̵ o̧ moo yɛ yúú zá̧ga̧ ı̵́ gúndɛm woolı̵́: “Bá' gúndɛm woolı̵́ máa, Tayɨɨ nəə yúú ba'ad woo vu̵lı̵́.”

⁵Tayɨɨ duu o̧ moo yúú moo yȩlȩ́ debterelı̵́, o̧: “Vú̵ń dɔ́n ya u̵u̵ sú̵g nəən kan mí wu̵lı̵́ yȩ né sá̧ḿ.”

⁶Nán ı̵́ ku̵u̵ dəŋ ki moo to̧o̧ 'maŋ yɛ, vú̵ń dɔ́n ya nəəlȩ́ yȩlȩ́ né, moo vu̵ fȩȩn moo yȩ né. Moo woo nɔ, nán tóó vú̵ń dɔ́ wu̵lı̵́.

⁷Moo woo nɔ ma, pig ve' ɓu̵u̵lı̵́ na'alȩ́ máa, Tayɨɨ duu 'yɛ́ zá̧ga̧ tóó nag 'maŋná, beewu̵ “ɓəə” ya̧g Daavíd woolı̵́, o̧: “Tow i ki yɛ́g Tayɨɨ woo ɓəə tée, i ŋgó̧ó̧ tɔ́g sá.”

⁸Tow Yuusúwa kan pa̧ŋ zig yȩ vu̵ laan sı̵́ ya nəəlȩ́ yȩlȩ́ ó̧ tée, Tayɨɨ kan duu pa̧ŋ moo yȩ o̧n yúú zá̧ga̧ tóólı̵́ né.

⁹Moo woo nɔ, nəəlȩ́ tóó mbaad nán Tayɨɨ woo vu̵ yu̵. Nəəlȩ́ woo man kan nəəlȩ́ ı̵́ Tayɨɨ woo bá' gúndɛm yȩ nɔ,

¹⁰moo nán a dɔ́ ya nəəlȩ́ dáŋ́ Tayɨɨ woolı̵́ yȩ tée, nəə sı̵́ yúú ba'ad woo vu̵lı̵́ ú̵, kɔ́ ı̵́ Tayɨɨ ka nəə yúú ba'ad woo vu̵lı̵́ máa wɔgɔ.

¹¹Moo woo nɔ, ba sȩn ví fó̧ó̧, ba dɔ́ ví ya nəəlȩ́ yȩlȩ́. Ba kɔ́ ví ı̵́ yo̧go̧, moo nán tóó baa vílí sa̧a̧mé a ŋgó̧ó̧ tɔ́g kɔ́ ı̵́ a ba ví yée kú̵u̵ kɔ́ hó̧g kȩŋŋı̵́ máa wɔgɔ sá.

¹²Moo Tayɨɨ woo mbaa zá̧a̧dɨ, sȩ́ńna wu̵lı̵́, hag mba pag naa ı̵́ ka hag ka' idú máa vu̵ 'waapád. Dɔ́ ya̧ la ya vágád woolı̵́ sag, kan ya bé'ené yigid woolı̵́, kan ya kúḿ 'nɔ́'ɔd ka zá'án nɛ́ŋ́ŋı̵́ 'waapád. Moo Tayɨɨ woo sə̧' moo yúú hȩn hí̧í̧lí̧ nánán voolı̵́ zó̧ó̧lȩ́, kan moo taalı̵́ voo á̧ḿ.

¹³Hȩn tóó yú̵gu̵n Tayɨɨ woolı̵́ né. Hȩn Tayɨɨ ka mbɔ́g máa vu̵ 'waapád, vu̵ mbaa la dɨ ya nanaalȩ́, vu̵ yú̵gu̵n nɔ́ɔ́ Tayɨɨ woolı̵́ né. Báń wá' ví hȩn 'waapád tíŋ́ woolı̵́.

¹⁴Ba dɨ ví kan ı̵́ nii hȩn ha"ı̵́ ka mba hȩn, ka dii tíŋ́ Tayɨɨ woolı̵́ má nɔ. Wu̵ Yesu Waa Tayɨɨ woo nɔ. Moo woo nɔ, ba 'yɛ́ ví zó̧ó̧ baa ví néélȩ́ na'a yúú moo kaa tú' ví yɛlı̵́.

¹⁵Ɨ́ nii hȩn ha"ı̵́ baa ví ho̧ gíḿ gaad ba ví, gaa ban néen ví ní. Seeɗán ká zo"u̵ á̧ḿ kɔ́ ı̵́ ka zo' ba ví yɛ wɔgɔ, a̧máa Yesu kɔ́n woo hȩn ɓı̵́d né.

¹⁶Ba séé ví la láan Tayɨɨ woolı̵́ bə́', ba 'yɛ́ ví zó̧ó̧ baa ví woolı̵́, ya zó̧ó̧ nán ka du̵u̵lı̵́ yȩ nɔ. Tée báń nuŋ ví zu̵u̵ hȩn ɓı̵́d kéélı̵́ gbɔlı̵́ wu̵lı̵́. Wú̵ń maa ba ví sey hȩn kɛb mbalı̵́ vu̵lı̵́ á̧ḿ.