Read Dii NÁN EEBƏRӘ́Ə VɄ 5 Bible Online

NÁN EEBƏRӘ́Ə VɄ 5 - Dii bible

NÁN EEBƏRӘ́Ə VɄ 5

¹Nán vu̵ yee ı̵́ nii hȩn ha"ı̵́ 'waapád sa̧a̧m nánán voolı̵́, ma vu̵ 'yɛ́gɛ, moo a kɔ́d Tayɨɨ ba'ad moo biilí, a pú̵ Tayɨɨ hȩn, a ha' hȩn moo hȩn ɓı̵́d kɔ́lı̵́ voo vu̵ yu̵.

²Aga ı̵́ nii hȩn ha"ı̵́ sú̵u̵ ka gaa ba bin néen tíŋ́ Tayɨɨ woolı̵́ né máa, wú̵ń dɨ kan néélȩ́ tú' zó̧ó̧ nán yúú nán ku̵u̵ kɔ́ hȩn gaa né, ku̵u̵ bá̧a̧ hi̧naa máa voolı̵́ ú̵.

³Aga ka néen tíŋ́ Tayɨɨ woolı̵́ né á̧ḿ yȩ, a ha' hȩn moo fó̧ó̧ woo pȩ́ń, tée wú̵ń ha' hȩn moo hȩn ɓı̵́d kɔ́lı̵́ nán tóó voo vu̵ á̧ḿ.

⁴Nán tóó ɓɛn na"ȩ́ yȩ moo mbaalı̵́ ı̵́ nii hȩn ha"ı̵́ dáńná né. Na"ȩ́ yȩ yaa kan bee Tayɨɨ woo nɔ, kɔ́ ı̵́ Tayɨɨ ka bee Harúna máa wɔgɔ.

⁵Krístu á̧ḿ, ɓɛn na"ȩ́ ı̵́ yȩ moo bi mbaan ı̵́ nii hȩn ha"ı̵́ɨ né, a̧máa Tayɨɨ wu̵ o̧ddu̵: “Mɔ́ waa míí nu; mí ha̧a̧m sı̵́ ɓəə ú̵.”

⁶Ka' tóólı̵́ máa, duu o̧: “Mɔ́ń mbaa nán hȩn ha"ı̵́ káákáá, kɔ́ ı̵́ hȩn kɔ́lı̵́ Mɛlkisedɛ́g woo wɔgɔ.”

⁷Sey Yesu ka mbaa hágá yɛlı̵́ máa, o̧d Tayɨɨ moo kan ya̧g ká̧ń, kan wa̧ya̧g gbo̧o̧, kan mɛmɛ́ḿ, moo Tayɨɨ a səd bi nɔmmé. Tayɨɨ ki moo woo, moo Yesu ka baa kiddu̵ tɔ́g má nɔ.

⁸Kóó ká a Waa Tayɨɨ woo nɔ si̧', duu kúgú tɔ́g kilí ya hȩn ndɔ́gɔné woolı̵́.

⁹Pig Tayɨɨ ka tiiwu̵ kɔ́ ı̵́ ka hí̧í̧ wɔgɔ 'waa sú̵'ú̵ máa, Yesu tii mbaa sı̵́ ı̵́ sənné nán ı̵́ ku̵u̵ kiddu̵ tɔ́g máa voo ú̵, pú̵ vu̵ vágád káákáá.

¹⁰Tayɨɨ vud moo o̧ la yúú Yesu woolı̵́, ba ı̵́ nii hȩn ha"ı̵́ kɔ́ ı̵́ hȩn kɔ́lı̵́ Mɛlkisedɛ́g woo wɔgɔ.

¹¹Vɔ́ dɨ kan moo ɓu̵u̵lı̵́ na'a moo bi o̧d ví yúú moo yȩ vu̵lı̵́, a̧máa tú"í woo təə ú̵, moo ví kin moo vaŋná né.

¹²Ɨ́ víí máa, ka víń mbaa nán moo tú"í vu̵ yu̵, moo ví mbaa wu̵lı̵́ ɗii sú̵'ú̵, a̧máa ví duu kin ní, maa ba u̵u̵ duu tú'ud ví ya̧g ba'ad Tayɨɨ woo ka dəŋ yȩ nag 'maŋná. Hȩn ka maa ka vín lá hȩn ı̵́ ka zi̧i̧ ya̧gá̧ yȩ nɔ máa, ví tii hí̧í̧ va̧a̧ mɛ́ń zɔlı̵́.

¹³Nán ı̵́ ka zɔ woo va̧a̧ máa, lá náásá̧ŋ́ waaɨ. Ho̧ hȩn hí̧í̧lí̧ Tayɨɨ woo səgən kan hȩn ɓı̵́d né.

¹⁴A̧máa moo hȩn lálı̵́ ı̵́ ka zi̧i̧ la wu̵lı̵́ máa, vu̵ pú̵ ı̵́ nii vu̵ wu̵ yu̵, moo vu̵ baa səgən sı̵́ voo hȩn du̵u̵ kɔ́lı̵́, kan hȩn ɓı̵́ddú̵, ma vu̵ gaa hȩn u̵u̵ kɔ́ máa á̧ḿ.