Read Dii NÁN EEBƏRӘ́Ə VɄ 6 Bible Online

NÁN EEBƏRӘ́Ə VɄ 6 - Dii bible

NÁN EEBƏRӘ́Ə VɄ 6

¹Moo woo nɔ, ba gbɔ ví moo ku̵u̵ tú'ud kaatekumɛ́n vu̵ máa, ba duu tú"u̵ ví tóó nag 'maŋná sá. Ba laan ví tíŋ́ kan moo tú"í ı̵́ nii voo nɔ. Moo gbo̧o̧ vu̵ máa, vu̵ baa tú' vu̵, aa gbɔ ví ba'ad lee vu̵, aa 'yɛ́ ví zó̧ó̧ baa ví Tayɨɨ woolı̵́.

²Vu̵ tú' moo yúú mam Tayɨɨ woolı̵́ vu̵lı̵́, kan nag ha"ı̵́ yúú nánán voolı̵́, kan moo tú"í yúú nímní nɔmmé, kan moo sə̧"ȩ́ də́ń kəd máa á̧ḿ.

³Tayɨɨ a pú̵ ba ví néélȩ́ ó̧ tée, báń gbɔ ví moo yȩ vu̵, báń tú' ví moo tóó vu̵ laan tíŋ́ tíŋ́.

⁴Nán tóó vu̵ nuŋ ya túlí Tayɨɨ woo, vu̵ gu̵g nuŋ hȩn yȩ"ȩ́ ı̵́ be"ı̵́ máa sú̵'ú̵, vu̵ nuŋ yigid Tayɨɨ woo sú̵'ú̵ á̧ḿ.

⁵Vu̵ gaa moo Tayɨɨ woo ba moo to̧o̧ȩ; vu̵ gaa sı̵́ néélȩ́ gbaŋ waalı̵́ Tayɨɨ woo ú̵ á̧ḿ.

⁶Ma u̵u̵ duu kéé zó̧ó̧ 'yɛ́lı̵́ voo gbɔ tée, zó̧ó̧ tiiní voo máa sı̵́ń təə ú̵, tée vu̵ duu ga' Waa Tayɨɨ woo la' vbagadı̵́ sú̵'ú̵. Vu̵ vuddu̵ fó̧ó̧ kan du̵g nɔ́ɔ́ nánán voolı̵́ sú̵'ú̵ á̧ḿ.

⁷Sey hág a zɔ mam ka nannɔ na'a yȩ, ma hȩn bab u̵u̵ tá̧'a̧d nán ı̵́ ku̵u̵ baawu̵ máa vu̵ du̵u̵lı̵́ na'a tée, Tayɨɨ baggu̵ hȩn sú̵'ú̵.

⁸A̧máa tow a tá̧' gaŋhu̵u̵ kan ŋgagame tée, duu maan sı̵́ hȩn tóó kɔ́lı̵́ né. Tayɨɨ wú̵ń ga'adu̵ nag vaŋná, tée vú̵ń a̧nnɔ kan vee.

⁹Dan gboo vu̵, kóó oo o̧ moo ı̵́ yo̧go̧ si̧', vɔ́ 'yɛ́ zó̧ó̧ dɨ yúú víílí. Vɔ́ gaa ví dɨ hi̧naa du̵u̵lı̵́, hi̧naa sə́nnée.

¹⁰Tayɨɨ kɔ́ hȩn yagalı̵́. Wú̵ń zán ba'ad kíí dɨn kɔ́lı̵́ yȩ né, gaa ba vín hí̧í̧ bi á̧ḿ, moo zó̧ó̧ nán ká kíí kɔ́d da ví kirtȩ́n vu̵ tíŋ́ yȩ, ví duu kɔ́d vu̵ wu̵ yu̵ 'ya̧'a̧ yɛ nɔ.

¹¹A̧máa vɔ́ hí̧í̧ kóó nɔ́nná víílí sa̧a̧mé a gu̵g kɔ́ hȩn yȩ kan zó̧ó̧ pilí há̧á̧ a ya̧ sí̧'í̧d woo, moo hȩn kíí 'yɛ́ zó̧ó̧ wu̵lı̵́ yȩ a kɔ́yyú̵.

¹²Vɔ́ hí̧í̧ i kɔ́ zu̵b sá, a̧máa i duu hȩn kɔ́lı̵́ ı̵́ nán zó̧ó̧ 'yɛ́lı̵́ voo nɔ. Vu̵ ma' zó̧ó̧, ma vu̵ nuŋ hȩn Tayɨɨ ka ta ya̧g wu̵lı̵́ yȩ.

¹³Sey Tayɨɨ ka tad Ibrahí̧í̧ma ya̧g máa, su̵g kɔ́ kan hȩn sa̧a̧lȩ́ á̧ḿ. Ma nugun nán tóó ka mbannɔ na"ȩ́, a sa̧a̧n hȩn kannɔ máa né. Ma nán tóó ka pɛ́lı̵́ máa, Tayɨɨ aga sa̧a̧ hȩn kan fó̧ó̧ woo,

¹⁴vud o̧: “Míń bagam hȩn baggı̵́ gbo̧o̧ȩ; míń kɔ́ zig móó wú̵ń ɓu̵u̵ la wu̵lı̵́.”

¹⁵Ibrahí̧í̧ma ka ma' zó̧ó̧ laa hȩn yȩ máa, nuŋ hȩn Tayɨɨ ka taddu̵ ya̧g wu̵lı̵́ yȩ.

¹⁶Sey nán ku̵u̵ sa̧a̧ hȩn tée, vu̵ sa̧a̧ kan yɛ́g nán ı̵́ ka mbaga máa woo nɔ. Hȩn sa̧a̧lȩ́ máa, tú' woo hȩn ka si̧'i̧d moo fanné sa̧a̧m nánán voolı̵́ má nɔ.

¹⁷A̧máa Tayɨɨ hí̧í̧ bi tú'ud nán u̵u̵ nuŋ hȩn yȩ vu̵ du̵u̵lı̵́ na'a, yúú hȩn ka ta ya̧g wu̵lı̵́ yȩ, ba bíń duu vȩ'ȩn ya̧g pigim né. Moo woo nɔ ma, sa̧a̧ hȩn ha' ya̧g talı̵́ woolı̵́.

¹⁸Tée ba'ad vu̵ du̵u̵lı̵́ idú;[1] nán tóó vú̵ń dɨ kan néélȩ́ vȩ'ȩn vu̵ pigim né. Yúú ba'ad idú yȩ vu̵lı̵́ Tayɨɨ ba kɔ́ vbád yúú voolı̵́ máa pɛ́lı̵́ sá̧ḿ. Ɨ́ baa ví kaa nuŋ ví ya yú̵ggı̵́ Tayɨɨ woolı̵́ yȩ, ba dɨ ví baa kan hȩn a zigid ba ví zó̧ó̧ ma, aa tíd ví zó̧ó̧ 'yɛ́lı̵́ baa ví nag idú néélȩ́ na'a máa á̧ḿ. Tayɨɨ tad ba ví ya̧g wu̵lı̵́ sú̵'ú̵.

¹⁹Hȩn zó̧ó̧ 'yɛ́lı̵́ máa yȩ mbaad ba ví zó̧ó̧ baa vílí kɔ́ ı̵́ hȩn nɛ́ŋ́ ga"ı̵́ wɔgɔ. Dii la woo dəg, néé la wu̵lı̵́, dɔ́ la pig sa̧a̧m ku̵u̵ yȩȩ du̵n zu̵u̵ lig hȩn ha"ı̵́ ı̵́ be"ı̵́ zu woolı̵́ sag, há̧á̧ ya̧ la ya gbo̧o̧ mba hȩnné.

²⁰Ya woo Yesu dəŋ dɔ́ wu̵lı̵́ tíŋ́ baa vílí sú̵'ú̵, dɔ́ moo baa ví nu. Tii ı̵́ nii hȩn ha"ı̵́ káákáá kɔ́ ı̵́ hȩn kɔ́lı̵́ Mɛlkisedɛ́g woo wɔgɔ.