Read Dii NÁN EEBƏRӘ́Ə VɄ 7 Bible Online

NÁN EEBƏRӘ́Ə VɄ 7 - Dii bible

NÁN EEBƏRӘ́Ə VɄ 7

¹Mɛlkisedɛ́g yȩ, ká gbanaa kaa Salɛ́mme, nán hȩn ha"ı̵́ Tayɨɨ ı̵́ be"ı̵́ zu woo nɔ á̧ḿ. Sey Ibrahí̧í̧ma ka mba gbanaa tóó vu̵ kan sɨɨ ma, ka vȩ́' ya máa, Mɛlkisedɛ́g ya kan kannɔ, baggu̵ hȩn.

²Ibrahí̧í̧ma gɛ hȩn dágá dágá yúú hȩn woo ka wá' wa̧nɓó'ɓó"ı̵́ máa 'waapád pú̵gu̵. Yéé Mɛlkisedɛ́g yȩ də́ń kəd máa, tú' “gbanaa ı̵́ ka kɔ́ hȩn hí̧í̧lí̧ Tayɨɨ woo má nɔ.” Ká gbanaa kaa Salɛ́mme á̧ḿ. Yéé yȩ tú' “gbanaa to̧o̧gɨ.”

³Vu̵ gaan Mɛlkisedɛ́g ba' woo kan na' woo né; vu̵ gaan aa yée vu̵ dágá aga né á̧ḿ. Nán tóó o̧n moo yúú ha̧a̧lȩ́ woolı̵́ né sá̧ḿ, kan moo nɔm woo á̧ḿ. Man woo kan Waa Tayɨɨ woo nɔ; wu̵ mbaa nán hȩn ha"ı̵́ káákáá.

⁴I tə́g na"ȩ́ woo yȩ ho̧ lá ví! A ba ví yée gbo̧o̧ baa ví Ibrahí̧í̧ma ká wá' hȩn woo ka nuŋ ya sɨɨlı̵́ máa, wa̧nɓó'ɓó' ma gɛ dágá dágá pú̵gu̵ duu wu̵lı̵́ 'waapád.

⁵Zig Levíd woo ku̵u̵ mbaa nán hȩn ha"ı̵́ máa, vu̵u̵ baa ɓɛ hȩn dágá dágá yúú hȩn wa̧nɓó'ɓó"ı̵́ zig Izraɛ́l tóó voolı̵́ 'waapád kɔ́ ı̵́ dooká Múúsa woo ka o̧ wɔgɔ, kóó u̵u̵ zig Ibrahí̧í̧ma woo nɔ si̧' á̧ḿ.

⁶Mɛlkisedɛ́g ká zig Levíd woo nɔ pɛ́lı̵́. Kóó ı̵́ yo̧go̧ si̧', ɓɛ hȩn dágá dágá yúú hȩn wa̧nɓó'ɓó' Ibrahí̧í̧ma ka nuŋ máalȩ́! Ma duu bag ı̵́ Tayɨɨ ka taddu̵ ya̧g yȩ hȩn á̧ḿ.

⁷Moo yȩ́ńne, nán ka bag daga hȩn máa, wu̵ nán gbo̧o̧ yúú nán ı̵́ ka baggu̵ hȩn yȩ woolı̵́.

⁸Ka' ı̵́ Levíd woolı̵́ máa, nán ı̵́ u̵u̵ nɔɔ máa, vu̵u̵ ɓɛ hȩn dágá dágá yúú hȩn wa̧nɓó'ɓó"ı̵́. A̧máa ka' ı̵́ Mɛlkisedɛ́g woolı̵́ máa, woo nán ı̵́ ka nɔɔ né má nɔ, kɔ́ ı̵́ debtere ka o̧ máa wɔgɔ.

⁹Nán Levíd vu̵ baa ɓɛ hȩn dágá dágá yúú hȩn wa̧nɓó'ɓó"ı̵́ daga voolı̵́. A̧máa ba dɨ kan néélȩ́ o̧ ví ná': sey Ibrahí̧í̧ma ka pú̵ hȩn naa woo dágá dágá yúú hȩn wa̧nɓó'ɓó"ı̵́ máa, nán Levíd vu̵ pú̵ á̧ḿ,

¹⁰moo sey Mɛlkisedɛ́g ka ya kan kan Ibrahí̧í̧ma máa, vu̵ ha̧a̧ ná Levíd né. Ká mbaa dɨ lá sii aa yée Ibrahí̧í̧ma woolı̵́.

¹¹Tayɨɨ pú̵ Múúsa dooká yúú ba'ad Levíd waa voolı̵́, moo zig Izraɛ́l a duu ú. Tow hȩn ha"ı̵́ Levíd waa voo ka vu̵n kɔ́ ba'ad si̧' la gbug tée, nán hȩn ha"ı̵́ tóó kə́d kan duu yaa né. Nán hȩn ha"ı̵́ tóó ka yaa kan hȩn kɔ́lı̵́ ı̵́ Mɛlkisedɛ́g woo yȩ, yaan kan hȩn kɔ́lı̵́ ı̵́ Harúna woo nɔ né.

¹²A̧máa sey ba'ad hȩn ha"ı̵́ ka tii kə́d sú̵'ú̵ máa, dooká a tii á̧ḿ.

¹³Ɨ́ 'yɛ́lı̵́ baa ví ku̵u̵ moo moo yúú woolı̵́ yɛ, dɨ woo zig tóó kə́d. Zig woo, nán tóó kɔ́n woo ba'ad hȩn ha"ı̵́ wu̵lı̵́ né,

¹⁴moo nán 'waapád vu̵ gaa ı̵́ 'yɛ́lı̵́ baa ví ba dɨ woo zig Yúúda woolı̵́. Múúsa ká moo moo yúú nán hȩn ha"ı̵́ voolı̵́ máa, moon woo moo yúú zig ı̵́ yȩ woolı̵́ né.

¹⁵Sey nán hȩn ha"ı̵́ tóó kə́d ka vúd ya kɔ́ ı̵́ Mɛlkisedɛ́g wɔgɔ máa, ba ho̧ la hȩn yȩ kə́lə́ŋ́.

¹⁶Nán hȩn ha"ı̵́ tóó kə́d yȩ mbaan woo nán hȩn ha"ı̵́ kɔ́ ı̵́ moo mbɔ́ggı̵́ nánán voo vu̵ wɔgɔ né, a̧máa mbaa woo moo dɨ kan néélȩ́ vágád ı̵́ ka mbaa káákáá má nɔ,

¹⁷moo vu̵ bíńda debterelı̵́, vu̵ o̧: “Mɔ́ń mbaa nán hȩn ha"ı̵́ káákáá, kɔ́ ı̵́ hȩn kɔ́lı̵́ Mɛlkisedɛ́g woo wɔgɔ.”

¹⁸Moo woo nɔ ma, moo see mbɔ́ggı̵́ vu̵ ná'ád sú̵'ú̵, moo ká vu̵ née né, vu̵ hȩn lee vu̵ yu̵.

¹⁹Dooká Múúsa woo vu̵ kɔ́ hȩn si̧'i̧n gbug né. A̧máa Tayɨɨ mbɔ́g hi̧naa tóó, moo ba aa duuwu̵ ví tée, ba báń séé ví la Tayɨɨ woolı̵́ tíŋ́.

²⁰Hȩn tóó dɨlı̵́. Tayɨɨ sa̧a̧ hȩn, ma Yesu mbaa nán hȩn ha"ı̵́. Nán tóó vu̵ mbaa voo nán hȩn ha"ı̵́; Tayɨɨ sa̧a̧n vu̵ hȩn né.

²¹A̧máa Tayɨɨ ká mbɔ́g Yesu nán hȩn ha"ı̵́ kan hȩn sa̧a̧lȩ́ȩ, o̧d Yesu: “Ɨ́ 'yɛ́lı̵́ sa̧a̧ hȩn sú̵'ú̵, wú̵ń duu tiin ya̧g né, o̧: ‘Mɔ́ń mbaa nán hȩn ha"ı̵́ káákáá.’ ”

²²Moo woo nɔ ma, Yesu mbaad ba ví hȩn ya̧g talı̵́ ı̵́ ka du̵u̵ mba ı̵́ ká tíŋ́ máa á̧ḿ.

²³Hȩn tóó dɨlı̵́ á̧ḿ. Nán hȩn ha"ı̵́ tóó ká vu̵ dɨlı̵́ ɓu̵u̵lı̵́ na'a, moo kóó nɔ́nná wú̵ń nɔɔ wu̵lı̵́, wú̵ń laan tíŋ́ kan ba'ad káákáá né.

²⁴A̧máa Yesu dɨ woo mbaalı̵́ há̧á̧ káákáá. Ba'ad hȩn ha"ı̵́ woo yȩ dɨ mbaalı̵́ káákáá á̧ḿ.

²⁵Moo woo nɔ, nán ku̵u̵ séé ya Tayɨɨ woolı̵́ kan yɛ́g Yesu woo máa vu̵, Yesu dɨ kan néélȩ́ səd vu̵ du̵u̵lı̵́ na'a, moo dɨ sı̵́ mbaalı̵́ káákáá, dɨ Tayɨɨ ɓá"ı̵́ yúú voolı̵́ a kɔ́d vu̵ zó̧ó̧ nánne.

²⁶Tée Yesu wu̵ ı̵́ nii hȩn ha"ı̵́ ka maa ba ví máa. Mbaa də́ń kɔ́ ı̵́ Tayɨɨ ka mbaa wɔgɔ, kɔ́n hȩn ɓı̵́d tóó né, hȩn ví̧i̧g tóó woolı̵́ pɛ́lı̵́ á̧ḿ. Hı̵́'ı̵́n sı̵́ woo kan nán ɓı̵́d vu̵ ú̵, Tayɨɨ ɗaawu̵ dɔg sı̵́ be"ı̵́ ú̵.

²⁷Mbaan woo kɔ́ ı̵́ ı̵́ nii hȩn ha"ı̵́ tóó vu̵ wɔgɔ né. Maa ba ha'an woo hȩn zá̧ga̧ 'waapád né; ha'an woo hȩn moo hȩn ɓı̵́d dáń woo, ma duu ha'an moo zig woo voo né. A̧máa ha' woo hȩn do' dágá 'nɛ́ŋ́, sey ka ha' fó̧ó̧ woo má nɔ.

²⁸Dooká Múúsa woo mbɔ́g ı̵́ nii hȩn ha"ı̵́ ku̵u̵ kɔ́ hȩn si̧'i̧n gbug né máa vu̵ yu̵. A̧máa hȩn sa̧a̧lȩ́ Tayɨɨ woo ka yaa pig dooká Múúsa woolı̵́ yȩ, mbɔ́g Waa woo yȩ kɔ́ ı̵́ ı̵́ nii hȩn ha"ı̵́ wɔgɔ, mbaa la woo də́ń kɔ́ ı̵́ Tayɨɨ ka hí̧í̧ wɔgɔ há̧á̧ káákáá.