Read Dii NÁN EEBƏRӘ́Ə VɄ 8 Bible Online

NÁN EEBƏRӘ́Ə VɄ 8 - Dii bible

NÁN EEBƏRӘ́Ə VɄ 8

¹A̧máa moo sú̵u̵ də́ń kəd kóó dɨ o̧lȩ́ yɛ, do̧do̧o̧ woo də́ń kəd máa, ba dɨ ví kan ı̵́ nii hȩn ha"ı̵́ ı̵́ yo̧go̧. Dɨ mbaalı̵́ ka' nag nán láan gbaŋ Tayɨɨ woolı̵́ na"ȩ́ na'a be"ı̵́.

²Kɔ́ ba'ad woo lig hȩn ha"ı̵́ woo ı̵́ də́ń kəd máalȩ́; moo yɛ tú' lig hȩn ha"ı̵́ ı̵́ 'yɛ́lı̵́ baa ví ka sé' máalȩ́, a̧máa lig ı̵́ nánán voo nɔ pɛ́lı̵́.

³Vu̵ yee ı̵́ nii hȩn ha"ı̵́ vu̵ 'waapád moo u̵u̵ ha' hȩn vu̵ kə́dkə́d. Moo woo nɔ ma, ı̵́ nii hȩn ha"ı̵́ baa ví a 'yɛ́ hȩn ha"ı̵́ ı̵́ a ha' máa á̧ḿ.

⁴A̧máa Krístu kan dɨ hágá yɛlı̵́ tée, kan nán hȩn ha"ı̵́ɨ pɛ́lı̵́ á̧ḿ, moo nán hȩn ha"ı̵́ vu̵ du̵u̵lı̵́ hágá yɛlı̵́. Vu̵ ha' voo hȩn kɔ́ ı̵́ dooká nán Yúúda voo ku̵u̵ o̧ máa wɔgɔ.

⁵Ba'ad nán hȩn ha"ı̵́ ku̵u̵ kɔ́ yȩ, vu̵ man kan hȩn ku̵u̵ kɔ́ be"ı̵́ máa vu̵ yu̵. Múúsa á̧ḿ, sey ka dɨ lig Tayɨɨ sé"ı̵́ máa, Tayɨɨ o̧ddu̵: “Tée a̧m mbɔ́g hȩn 'waapád, u̵u̵ man kan hȩn káń tú'um yúú gu̵u̵lı̵́ máa kííd.”

⁶A̧máa 'ya̧'a̧ yɛ Yesu ɓɛ ba'ad ka du̵u̵ mba ı̵́ voo máa sú̵'ú̵, moo wu̵ dii moo mbɔ́ggı̵́ yúú ya̧g talı̵́ ka du̵u̵ mba yȩlȩ́. Tayɨɨ táń ya̧g yɛ du̵u̵ mba sı̵́ ı̵́ ka ta tíŋ́ yȩ ó̧.

⁷Tow ya̧g talı̵́ ı̵́ yȩ[2] kan du̵u̵ 'waa ú̵ tée, ka vu̵n pínnɔ kan tóó né.

⁸A̧máa Tayɨɨ ká̧n nán woo vu̵ debterelı̵́, o̧: “Zá̧ga̧ tóó wú̵ń yaa dɨlı̵́, míń mbɔ́g ya̧g talı̵́ 'maŋ tóó kan zig Izraɛ́l, kan zig Yúúda á̧ḿ.

⁹Wú̵ń man kan ya̧g talı̵́ ı̵́ ká káń tan aa yée vu̵ máa né. Zá̧ga̧ woo ká mí pa̧ŋ vu̵ kan nag míí, mí ɓɛ vud vu̵ hág Mísiralı̵́. A̧máa vu̵ duun ya̧g talı̵́ ı̵́ míí yɛ né. Moo woo nɔ, ka̧a̧n mí kan vu̵ né.

¹⁰Ya̧g a̧n tad zig Izraɛ́l pig bá' yȩlȩ́ máa, wu̵ yȩ nɔ. Míń 'yɛ́d vu̵ dooká míí vu̵ zó̧ó̧ voolı̵́. Míń bíńda 'yɛ́d vu̵ zó̧ó̧lȩ́. Míń mbaa Tayɨɨ voo, tée vú̵ń mbaa zig míí.

¹¹Kóó nɔ́nná wú̵ń duu tú'un sı̵́ daga moo né. Nán tóó wú̵ń o̧n daga: ‘A̧m gaa Tayɨɨ la ú̵’ né, moo nán 'waapád vú̵ń gaan, kóó waa vu̵, kóó ı̵́ nii vu̵.

¹²Míń kéé hȩn kə̧ə̧g kɔ́lı̵́ voo vu̵ gbɔ la, míń duu taan sı̵́ hȩn ɓı̵́d kɔ́lı̵́ voo yȩ vu̵ né.”

¹³Sey Tayɨɨ ka moo moo yúú ya̧g talı̵́ 'maŋŋı̵́ máa, tii ı̵́ tíŋ́ pee hȩn see sú̵'ú̵. A̧máa hȩn ka tii hȩn see, ka gbo̧o̧ sú̵'ú̵ tée, dɨ bə́' kan á̧ynée.