Read Dii NÁN EEBƏRӘ́Ə VɄ 9 Bible Online

NÁN EEBƏRӘ́Ə VɄ 9 - Dii bible

NÁN EEBƏRӘ́Ə VɄ 9

¹Ya̧g talı̵́ ı̵́ ká tíŋ́ máa, tú' hȩn kɔ́lı̵́ yúú lig hȩn ha"ı̵́ hágá yɛlı̵́, kan hȩn ku̵u̵ kɔ́ tíŋ́ woolı̵́ máa vu̵ á̧ḿ.

²Ká vu̵ dəŋ sé' lig tóó, vu̵ du̵n ya idú; ı̵́ dəné woo máa, vu̵ beewu̵ “ya gbo̧o̧ȩ.” Ya woo lám ká vu̵ du̵u̵lı̵́, kan táabələ ku̵u̵ baa ha'ad Tayɨɨ beréd wu̵lı̵́ máa á̧ḿ.

³Ɨ́ idú woo dɨ pig sa̧a̧m ku̵u̵ yȩȩ du̵n zu̵u̵ lig sa̧a̧mé yȩlȩ́, vu̵ beewu̵ “ya gbo̧o̧ mba hȩnne.”

⁴Ya woo ká vu̵ 'yɛ́ ya hȩn ha"ı̵́ ı̵́ do̧' kú̵u̵ baa uu zu̵gu̵ sa̧g to̧o̧ wu̵lı̵́ máa wu̵lı̵́. Akɔti ya̧g talı̵́ ká du̵u̵lı̵́ á̧ḿ. Vu̵ sú"u̵ kan do̧' 'waapád. Akɔti yȩ, gbág do̧' tóó ká dɨ tíŋ́ woolı̵́ á̧ḿ, vu̵ 'yɛ́ mána kéélı̵́ vu̵ tíŋ́ woolı̵́; vu̵ 'yɛ́ vbə́ə́ Harúna woo ka sa kpag, ka ko̧' á̧ḿ máa akɔti yȩlȩ́, kan aluwa 'yɛgɛ ya̧g talı̵́ Tayɨɨ woo ku̵u̵ bíńda moo ya̧g talı̵́ wu̵lı̵́ máa vu̵ á̧ḿ.

⁵Fóto seerubə̧́ŋ voo vu̵ dii mbaa yúú akɔti yȩlȩ́, kpakpag voo vu̵ wáá ya ku̵u̵ ha' hȩn moo hȩn ɓı̵́d kéélı̵́ gbɔlı̵́ máalȩ́. A̧máa sey ban tú' moo yȩ vu̵ duu yúú hȩn yȩ vu̵lı̵́ kə́dkə́d máa pɛ́lı̵́.

⁶Hȩn woo ká vu̵ mbɔ́g vu̵ ná', ma nán hȩn ha"ı̵́ ká vu̵ baa dɔ́ zá̧ga̧ 'waapád ya ı̵́ ku̵u̵ dəŋ du̵ máalȩ́, moo ba'ad voo vu̵ kɔ́lı̵́.

⁷A̧máa séý ı̵́ nii hȩn ha"ı̵́ wu̵ dɔ́ la wu̵ dágá ya ı̵́ idú woo yȩlȩ́; ve' dágá tée, dɔ́ wu̵lı̵́ do' dágá. Pa̧ŋ mɛm hȩn buulí la ha'ad Tayɨɨ hȩn wu̵lı̵́, moo fó̧ó̧ woo, kan moo hȩn ɓı̵́d kɔ́lı̵́ zig woo ku̵u̵ kɔ́, ku̵u̵ gaa né máa voo á̧ḿ.

⁸Yigid Tayɨɨ woo tú' yɛlı̵́, sey lig hȩn ha"ı̵́ ı̵́ hágá yɛlı̵́ yɛ ba ka dɨ lá mbaalı̵́ máa, hi̧naa laalı̵́ ya gbo̧o̧ mba hȩnné yȩ ba tú̵'u̵ ná né.

⁹Hȩn yȩ vu̵ tú' hȩn ha"ı̵́ kə́dkə́d ku̵u̵ ha'ad Tayɨɨ 'ya̧'a̧ yɛ máa, ba tɛn zó̧ó̧ nán ka ha'an vu̵ hȩn yȩ woo né.

¹⁰Hȩn kɔ́lı̵́ yȩ vu̵ moo moo yúú hȩn lálı̵́ vu̵lı̵́, kan hȩn zɔlı̵́, kan mam ɓɛlı̵́; vu̵ moo moo séý yúú hȩn fó̧ó̧ mbɔ́ggı̵́ vu̵lı̵́ mɛ́ń. Hȩn kɔ́lı̵́ yȩ ká vu̵u̵ kɔ́ ba'ad há̧á̧ ya̧ sey Tayɨɨ a duu mbɔ́g hȩn 'waapád nag 'maŋná pȩ́ń.

¹¹A̧máa Krístu yaa yaalı̵́ ı̵́ nii hȩn ha"ı̵́ɨ, ya mbaa yúú hȩn du̵u̵ ı̵́ ku̵u̵ dɨ mbaalı̵́ 'ya̧'a̧ yɛ voolı̵́. Lig hȩn ha"ı̵́ máa Krístu ká kɔ́ ba'ad wu̵lı̵́ yȩ, wu̵ hȩn gbo̧o̧, wu̵ mbaa du̵u̵lı̵́ na'a á̧ḿ. Nánán vu̵u̵ yo̧o̧ né, hágá yɛlı̵́ pɛ́lı̵́ á̧ḿ.

¹²Sey Krístu ka dɔ́ la ya gbo̧o̧ mba hȩnné do' dágá 'nɛ́ŋ́ máa, ha'an woo mɛm ɓee kan ndaaɨ né, səd ba ví kan mɛm dáń woo nɔ há̧á̧ káákáá.

¹³Tow mɛm ɓee, kan mɛm ndaa, kan hú̧u̧m ndaa ku̵u̵ a̧n vɛlı̵́ ma ku̵u̵ mɛ́d nán vu̵ moo hȩn ví̧i̧g voo vu̵ na'ané yȩ, a vu̵u̵ tɛ hȩn ví̧i̧g fó̧ó̧ voolı̵́ yȩ tée,

¹⁴dan tóó mɛm ı̵́ Krístu woo naa? Krístu ha'ad Tayɨɨ fó̧ó̧ woo kan néélȩ́ yigid woo ka mbaa káákáá yȩ nɔ. Hȩn ha"ı̵́ woo yȩ kɔ́n ví̧i̧g né. Mɛm woo wú̵ń tɛ moo taalı̵́ lee zó̧ó̧ víílí, a mbaa dȩ"ȩ́ na'a, tée víń gbɔ ba'ad lee víí vu̵, víń kɔ́d Tayɨɨ ı̵́ zá̧a̧d ba'ad.

¹⁵Moo woo nɔ Krístu dɔ́ moo mbɔ́ggı̵́ kan ya̧g talı̵́ 'maŋ, moo nán ı̵́ Tayɨɨ ka bee vu̵ máa, u̵u̵ nuŋ hȩn Tayɨɨ ka tad vu̵ ya̧g tíŋ́ wu̵lı̵́ máa kɔ́ ı̵́ hȩn gaga wɔgɔ káákáá. Vú̵ńnɔ dɨ kan néélȩ́ woo, moo nɔm tóó dɔ́ ya sa̧a̧m voolı̵́ sú̵'ú̵. Nɔm yȩ wu̵ səd nán vu̵ ya hȩn ɓı̵́d ku̵u̵ kɔ́, sey ku̵u̵ duu lá voo ya̧g talı̵́ ká tíŋ́ yȩ má nɔ.

¹⁶Ɗerwəl ya̧g talı̵́ ka dɨlı̵́ yȩ, vu̵u̵ tú' nán ba ka bíńda hȩn yȩ ba nɔɔ sú̵'ú̵,

¹⁷moo nán ka bíńda ɗerwəl ya̧g talı̵́ yȩ ka nɔɔ ná né máa, ɗerwəl woo yȩ kɔ́n ná ba'ad né. A̧máa kɔ́ wú̵ń kɔ́ ba'ad pig nɔm woolı̵́.

¹⁸Moo woo nɔ, ya̧g talı̵́ Tayɨɨ woo ká tíŋ́ máa kɔ́n ba'ad né, séý vu̵ yɛd mɛm pȩ́ń.

¹⁹Dəné woo máa, Múúsa ká tú'ud zig woo vu̵ dooká yȩ vu̵ 'waapád ya sú̵ggı̵́lı̵́ duu debtere Tayɨɨ woo; pig woo máa, ɓɛ dȩ' tóó, ta kan sugud yȩ́ȩ́, yoo mɛm ndaa waalı̵́ kan mam, mɛ́d yúú debtere peelı̵́, kan dúú voolı̵́ fó̧lȩ́ á̧ḿ,

²⁰o̧d vu̵: “Ɨ́ yɛ mɛm Tayɨɨ ka mbɔ́g moo yúú woolı̵́ má nɔ. I buu ya̧g talı̵́ woo sá.”

²¹Múúsa duu mɛ́d mɛm yȩ daa lig hȩn ha"ı̵́lı̵́, kan yúú hȩn ku̵u̵ kɔ́n ba'ad wu̵lı̵́ moo Tayɨɨ na"ȩ́ máa á̧ḿ.

²²Hȩn ví̧i̧g 'waapád vú̵ń ná'ád kan mɛm kɔ́ ı̵́ moo Tayɨɨ woo ka o̧ wɔgɔ. Tow mɛm yɛnné a pɛ́lı̵́ tée, hȩn ɓı̵́d kéélı̵́ gbɔlı̵́ wú̵ń pɛ́lı̵́ á̧ḿ.

²³Hȩn kɔ́lı̵́ ı̵́ ka 'yȩ́ŋ́ hȩn kɔ́lı̵́ ı̵́ be"ı̵́ máa, dɨ ı̵́ yo̧go̧. A̧máa hȩn ı̵́ be"ı̵́ sú̵u̵ aga vu̵ hí̧í̧ hȩn ha"ı̵́ ı̵́ ka du̵u̵ mba hȩn yȩ vu̵ máa.

²⁴Ma Krístu dɔ́n woo lig hȩn ha"ı̵́ nán ku̵u̵ yo̧o̧n máalȩ́ né, moo lig hȩn ha"ı̵́ ı̵́ ka dɔ́ wu̵lı̵́ máa, man woo kan hȩn ı̵́ də́ń kəd yȩ mannée. Krístu dɔ́ woo dɨ be"ı̵́ pi nu. 'Ya̧'a̧ yɛ dii la dɨ tíŋ́ Tayɨɨ woolı̵́ moo baa ví.

²⁵Ve' 'waapád ı̵́ nii hȩn ha"ı̵́ nán Yúúda voo dɔ́ woo ya gbo̧o̧lȩ́, pa̧ŋ mɛm hȩn buulí wu̵ laan. A̧máa Yesu Krístu dɔ́n woo moo fó̧ó̧ woo ha"ı̵́ do' ɓu̵u̵lı̵́ na'a né.

²⁶Kan ı̵́ yo̧go̧ tée, Krístu kan nuŋ hȩn ndɔ́gɔné do' ɓu̵u̵lı̵́ na'a diga sey hág ka mbɔ́gɔyyı̵́ máalȩ́. A̧máa 'ya̧'a̧ yɛ, sey hág 'wáané ka dɨ bə́' máa, gbɔ vúd ya do' dágá 'nɛ́ŋ́, pú̵ fó̧ó̧ woo kɔ́ ı̵́ hȩn ha"ı̵́ wɔgɔ, bi na'ad hȩn ɓı̵́d kɔ́lı̵́ vu̵ yu̵.

²⁷Nán 'waapád vú̵ń nɔɔ ó̧; pig woo tée, Tayɨɨ wú̵ń sə̧'ə̧d vu̵ moo.

²⁸Krístu ha' fó̧ó̧ woo do' dágá 'nɛ́ŋ́ ı̵́ yo̧go̧ á̧ḿ, moo hȩn ɓı̵́d kɔ́lı̵́ nán ɓu̵u̵lı̵́ na'a voo na'anée. Wú̵ń duu vȩ́' ya do' idú woo dɨlı̵́; wú̵ń duu yaan sı̵́ moo hȩn ɓı̵́d kɔ́lı̵́ na'anée né, a̧máa moo bi səd nán ı̵́ ku̵u̵ laawu̵ máa vu̵ yu̵.