Read Dii YAAKÚBU 1 Bible Online

YAAKÚBU 1 - Dii bible

YAAKÚBU 1

¹Mí Yaakúbu wu̵, nán ba'ad Tayɨɨ woo, kan ı̵́ 'yɛ́lı̵́ baa ví Yesu Krístu voo nɔ. Míi bíńda moo yɛ ba'ad ví nán sú̵ggı̵́ Tayɨɨ woo kíi hɨ'ɨ 'waa hág 'waapád yȩ víw. Mí vá' ví wu̵lı̵́.

²Dan kirtȩ́n vu̵, sey nán ku̵u̵ gu̵g ví, kóó kan ȩná si̧', i mbaa kan zó̧ó̧ dȩ"ȩ́ȩ,

³moo ví gaa u̵u̵ gu̵g zó̧ó̧ 'yɛ́lı̵́ víí tée, zó̧ó̧ ma"ȩ́ víí wú̵ń vúd wu̵lı̵́.

⁴A̧máa zó̧ó̧ ma"ȩ́ víí yȩ a mbaa kan ba'ad yȩ́ń, moo há̧á̧ i mbaa du̵u̵lı̵́ na'a, dȩ"ȩ́ na'a, hȩn tóó a kéed ví sá á̧ḿ.

⁵Tow nán tóó víílí sa̧a̧mé ka gaan moo né tée, a vi Tayɨɨ, tée Tayɨɨ wú̵ń tú'udu̵, moo Tayɨɨ wu̵ pú̵ hȩn hi̧' nag, vin woo ya̧g né á̧ḿ.

⁶A̧máa sey a vi Tayɨɨ moo woo tée, a 'yɛ́ zó̧ó̧ woo wu̵lı̵́, a faa moo sá, moo nán ka faa moo tée, mbaa kɔ́ ı̵́ sápéém ka nam mam gbo̧o̧ máa wɔgɔ, laanɔ yɛlı̵́, daa laanɔ zulí.

⁷Nán ı̵́ yo̧go̧ máa, a taa ba bíń nuŋ hȩn tóó ı̵́ 'yɛ́lı̵́ baa ví woolı̵́ ú̵ máa sá,

⁸moo dɨ kan zó̧ó̧ i'idú, 'yɛ́n zó̧ó̧ ya dágá né á̧ḿ.

⁹Nán kirtȩ́n tóó ka mbaa gíḿná tée, a dəm fó̧ó̧ woo sey Tayɨɨ ka pú̵gu̵ hȩn ha' wu̵lı̵́ máalȩ́.

¹⁰A̧máa nán naa a dəm fó̧ó̧ woo sey Tayɨɨ ka tiiwu̵ gíḿná yȩlȩ́, moo fó̧ó̧ woo wú̵ń dɨ yo̧né kɔ́ ı̵́ hȩn kó̧'o̧d vu̵ wɔgɔ.

¹¹Zá̧ga̧ ka ye' dɔg tée, pi, hȩn vu̵ mbɛ́ 'waa, kó̧'o̧d voo vu̵ yo̧ŋ 'waa, vu̵ só̧ó̧b 'waa á̧ḿ. Nán naa vú̵ń ti 'waa ba'ad voo vu̵lı̵́ sa̧a̧mé ı̵́ yo̧go̧ á̧ḿ.

¹²Du̵u̵d nán ku̵u̵ gu̵ggu̵ pȩ́ń, ka nda doo néélȩ́ na'a wu̵lı̵́ má nɔ, moo u̵u̵ gu̵g néélȩ́ woo ho̧ sú̵'ú̵ tée, wú̵ń nuŋ hȩn sú̵ú̵lı̵́ woo. Wu̵ vágád ı̵́ káákáá Tayɨɨ ka tad nán ku̵u̵ hí̧í̧wo̧ máa vu̵ ya̧g wu̵lı̵́ má nɔ.

¹³Sey hȩn zo"ı̵́ ka yaa nán tóó woolı̵́ tée, nán yȩ a o̧: “Tayɨɨ wu̵ zo'on” sá, moo hȩn ɓı̵́d zo'on woo Tayɨɨ né; Tayɨɨ zo'on woo nán tóó né á̧ḿ.

¹⁴Hȩn ka zo' nán vu̵ bi ma' vu̵ ú̵ tée, wu̵ hí̧í̧lí̧ dáń voo ku̵u̵ woo vu̵ laan;

¹⁵pig woolı̵́ tée, hȩn ɓı̵́d hí̧í̧lí̧ yaa kɔ́ ı̵́ ka fȩȩ ha̧g máa wɔgɔ, tée ha̧a̧ hȩn ɓı̵́d. Ma hȩn ɓı̵́d ka ɓu̵u̵ na'a tée, duu pa̧ŋ nɔm á̧ḿ yaan.

¹⁶Ɨ́ hí̧í̧lí̧ míí, dan kirtȩ́n vu̵, zó̧ó̧ a zo' ví moo sá!

¹⁷Hȩn pú̵lı̵́ ku̵u̵ du̵u̵, ku̵u̵ to̧o̧ 'waapád máa, vu̵ zu̵u̵ be"ı̵́. Ba'á ka yɨb ya túlí be"ı̵́ máa ba' vu̵ zu̵u̵ woolı̵́. Tiin woo né, gbɔn ba ví ya dimmí ní.

¹⁸Dəŋ hí̧í̧, ma ha̧a̧ ba ví kan moo yȩ́ń woo, moo aa mbaad bi ví kɔ́ ı̵́ hȩn gbo̧o̧ sa̧a̧m hȩn hágá yɛ vu̵lı̵́ wɔgɔ.

¹⁹Ɨ́ hí̧í̧lí̧ míí, dan kirtȩ́n vu̵, i gaa hȩn yȩ vu̵ du̵u̵ na'a. Kóó nɔ́nná a ki moo vaŋná, a̧máa tée a moo moo há̧ná sá, a kɔ́ zó̧ó̧ yȩ́ȩ́ há̧ná sá á̧ḿ,

²⁰moo nán ka kɔ́ zó̧ó̧ yȩ́ȩ́ tée, kɔ́n hȩn hí̧í̧lí̧ Tayɨɨ woo né.

²¹Moo woo nɔ, i gbɔ hȩn ka vi̧i̧ nán vu̵, kan ba'ad ɓı̵́d voo vu̵ 'waapád máa á̧ḿ. I nə' yúú duu moo Tayɨɨ ka 'yɛ́d ví zó̧ó̧lȩ́ yȩ nɔ, moo moo yȩ wú̵ńnɔ səd ví.

²²I sóó fó̧ó̧ víí vu̵ moo sá, i ki moo Tayɨɨ té' sá, a̧máa i duu ú,

²³moo nán ı̵́ ka ki moo, ka kɔ́n hȩn woo né tée, man kan nán tóó ka tə́g fó̧ó̧ woo daadugeelı̵́, ka ho̧ mbaalı̵́ woo má nɔ.

²⁴Ma sey ka daa lúú sú̵'ú̵ tée, záń mbaalı̵́ woo pee vaŋná.

²⁵A̧máa nán ı̵́ ka baa kúgú moo yȩ́ń Tayɨɨ woo, ka mbaad nán ku̵u̵ mbaa kan yúú voo yȩ, a záń gbɔn né, a̧máa a ki duu tée, Tayɨɨ wú̵ń baggu̵ hȩn ya̧g ba'ad woolı̵́ ú̵.

²⁶Tow nán tóó a taa ba bin nán Tayɨɨ woo nɔ, a̧máa a moo moo ma'an ya̧g né tée, sóó fó̧ó̧ woo moo sú̵'ú̵. Moo taalı̵́ woo yȩ moo yȩ́ńne pɛ́lı̵́.

²⁷Ba'ad Ba'á Tayɨɨ ka hí̧í̧ də́ń kəd máa, wu̵ waa sɛ́ɛg vu̵ tu̵lı̵́, kan wakȩ́ȩ́ yɛd vu̵ ya hȩn ndɔ́gɔné voolı̵́. Wu̵ aa mbaa ví dȩ"ȩ́ na'a yúú hȩn ví̧i̧g nánán hágá yɛ voolı̵́ á̧ḿ.