Read Dii YAAKÚBU 2 Bible Online

YAAKÚBU 2 - Dii bible

YAAKÚBU 2

¹Dan kirtȩ́n vu̵, ı̵́ víí kíí 'yɛ́ zó̧ó̧ víí Yesu Krístu ı̵́ 'yɛ́lı̵́ baa ví ka mbaa na"ȩ́ na'a woolı̵́ yȩ, i səg nánán vu̵ sá.

²I taa moo waaná'; nánán tóó a dɔ́ la ya sú̵ggı̵́ víílí, a dɔd ka nag waa do̧', a dɔ́ sa̧a̧m du̵u̵, ma nán gíḿ tóó a dɔ́ la wu̵lı̵́ á̧ḿ, sa̧a̧m zɛ́gɛ́dná pȩ́ń tée,

³víń tə́g nán ı̵́ ka dɨ woo kan sa̧a̧m du̵u̵ yȩ, víń o̧ddu̵: “Ɨ́ víí máa, i ya mbaa ya du̵u̵ yɛlı̵́.” Ma víń o̧d nán gíḿ yȩ: “A̧m tii la móó zulí, tóó tée, a̧m mbaa la móó hágá yȩlȩ́.”

⁴Tow a dɨ ı̵́ yo̧go̧ tée, ví hɨ'ɨn hȩn sa̧a̧m víílí sú̵'ú̵, ví sə̧' moo kan moo taalı̵́ ɓı̵́d vu̵ sú̵'ú̵.

⁵Ɨ́ hí̧í̧lí̧ míí, dan kirtȩ́n vu̵, i ki ú! Tayɨɨ yee nán gíḿ vu̵ hágá yɛlı̵́, moo u̵u̵ 'yɛ́ zó̧ó̧ voo biilí du̵u̵lı̵́ na'a, u̵u̵ dɔ́ gbaŋ waalı̵́ ı̵́ ba kii tad nán hí̧í̧lí̧ bii vu̵ ya̧g wu̵lı̵́ yȩlȩ́. Ɨ́ yo̧go̧ pɛ́láa?

⁶A̧máa ı̵́ víí, ví tii kɔ́d víí nán gíḿ vu̵ hȩn sȩ́ḿ mɛ́ń. Nán naa vu̵u̵ baa duun ví kan moo, vu̵u̵ pa̧ŋ laan ví ya moo sə̧"ȩ́lȩ́ má nɔ náa?

⁷Vu̵u̵ baa haan yéé to̧o̧ Tayɨɨ ka 'yɛ́n ví yȩ má nɔ náa?

⁸Debtere o̧: “A̧m hí̧í̧ dam vu̵ kɔ́ ı̵́ káḿ hí̧í̧ fó̧ó̧ móó wɔgɔ;” moo yȩ́ńne, tow i kɔ́ hȩn dooká gbanii voo yȩ si̧' la gbug tée, ví kɔ́ hȩn du̵u̵ ú̵.

⁹A̧máa tow i səg nán tóó vu̵ gbɔ tée, ví kɔ́ hȩn ɓı̵́ddɨ. Dooká doo ví sú̵'ú̵ á̧ḿ, moo ví kinnɔ tɔ́g né,

¹⁰moo nán tóó a duu dooká Tayɨɨ woo vu̵, ma a kéé dágá gbɔ tée, kéé ı̵́ tóó yȩ vu̵ gbɔ 'waapád á̧ḿ.

¹¹Ɨ́ ka o̧: “A̧m kɔ́ ɓáa kan kȩ́ȩ́ nánán tóó woo sá” yȩ, wu̵ o̧: “A̧m nɔɔ nɔm sá” á̧ḿ yȩ nɔ. Tow a̧m kɔ́n ɓáa né, a̧máa a̧m nɔɔ nɔm tée, mɔ́ tii nán ka kin dooká tɔ́g né má nɔ.

¹²I moo moo, i kɔ́ hȩn dooká ka o̧ má nɔ, moo Tayɨɨ wú̵ń sə̧' moo duu dooká ı̵́ ka mbaad nán ku̵u̵ mbaa kan yúú voo yȩ nɔ.

¹³Tayɨɨ wú̵ń ho̧ gíḿ gaan nán ı̵́ ka ho̧ gíḿ gaan daga né máa á̧ḿ. A̧máa nán a ho̧ gíḿ gaad daga tée, Tayɨɨ wú̵ń sə̧'ə̧n moo yúú woolı̵́ né á̧ḿ.

¹⁴Dan kirtȩ́n vu̵, tow nán tóó a o̧: “Mí 'yɛ́ míí zó̧ó̧ míí dɨ Tayɨɨ woolı̵́,” a̧máa a kɔ́n ba'ad ka to̧o̧n Tayɨɨ né yȩ tée, ȩn wú̵ń du̵u̵du̵lá? Zó̧ó̧ 'yɛ́lı̵́ woo yȩ wú̵ń səddu̵ áa?

¹⁵Tóó tée dam sá̧ŋ́, tóó tée dam kȩ́ȩ́, vu̵ mbaa fó̧ó̧ leená, tóó tée hȩn lálı̵́ gee vu̵,

¹⁶ma mɔ́ń o̧d vu̵: “I laa nánná; i o̧o̧ vee, i lá hȩn, i ha̧' la ú̵!” A̧máa tow i pú̵n vu̵ hȩn ka maan vu̵ pú̵lı̵́ máa né tée, ȩn wú̵ń du̵u̵d vu̵lá?

¹⁷Zó̧ó̧ 'yɛ́lı̵́ dɨ ı̵́ yo̧go̧ á̧ḿ. Ba'ad ka to̧o̧d Tayɨɨ máa ka pɛ́lı̵́ tée, zó̧ó̧ 'yɛ́lı̵́ yȩ á̧ḿ zó̧ó̧ 'yɛ́lı̵́ nɔmme.

¹⁸A̧máa tóó tée nán tóó wú̵ń o̧ woo: “Mɔ́ 'yɛ́ móó zó̧ó̧ móó Tayɨɨ woolı̵́, a̧máa mí kɔ́ míí ba'ad ka to̧o̧d Tayɨɨ má nɔ.” Ma míń hí̧i̧du̵: “A̧m tú'un zó̧ó̧ 'yɛ́lı̵́ ı̵́ móó ka to̧o̧d Tayɨɨ ba'ad ka wu̵lı̵́ pɛ́lı̵́ má nɔ. Tée míń tú'um ba'ad ı̵́ míí ka to̧o̧d Tayɨɨ yȩ, tée mɔ́ń gaa zó̧ó̧ 'yɛ́lı̵́ míí wu̵lı̵́.”

¹⁹Mɔ́ 'yɛ́ zó̧ó̧ Tayɨɨ ba dɨ dágáa? Tée du̵u̵ ú̵. Yigid ɓı̵́d vu̵ fȩȩ moo yȩ á̧ḿ, a̧máa vu̵ tu̵u̵ kan dú̵ú̵.

²⁰Mɔ́ taa moo ho̧ á̧a̧? Mɔ́ hí̧í̧ bi gu̵g zó̧ó̧ 'yɛ́lı̵́ ba'ad ka wu̵lı̵́ pɛ́lı̵́, ba hȩn leene máa ho̧ á̧a̧?

²¹Dəŋ née Tayɨɨ ka 'yɛ́ a ba ví yée Ibrahí̧í̧ma nán to̧o̧g woo máalá̧? Moo ba'ad woo ku̵u̵ to̧o̧d Tayɨɨ máa vu̵ yu̵ pɛ́láa? Moo ka ɓɛ waa woo Iizág ha'ad Tayɨɨ ya hȩn ha"ı̵́lı̵́ má nɔ.

²²Mɔ́ ho̧ sı̵́ yȩ, zó̧ó̧ 'yɛ́lı̵́ woo, kan ba'ad woo, vu̵ sú̵g kɔ́ hȩn ma, zó̧ó̧ 'yɛ́lı̵́ woo dɔ́ sé' yúú ba'ad woo ka kɔ́ yȩlȩ́.

²³Hȩn woo kɔ́y kɔ́ ı̵́ debtere ka o̧ máa wɔgɔ, o̧: “Ibrahí̧í̧ma ká 'yɛ́ zó̧ó̧ woo Tayɨɨ woolı̵́, ma Tayɨɨ ho̧ zó̧ó̧ 'yɛ́lı̵́ woo, 'yɛ́gɛ nán to̧o̧g woo,” ma beewu̵ daga gboo.

²⁴Ví ho̧ sı̵́ yȩ náa? Nánán vu̵ to̧n kan Tayɨɨ yúú ba'ad kɔ́lı̵́ voo vu̵lı̵́, a̧máa yúú zó̧ó̧ 'yɛ́lı̵́lı̵́ɨ dágá pɛ́lı̵́.

²⁵Moo Raháb woo dɨ ı̵́ yo̧go̧ á̧ḿ, wakȩ́ȩ́ tálı̵́ kan wayée vu̵ yȩ nɔ. Ká vu̵ to̧n kan Tayɨɨ yúú ba'ad kɔ́lı̵́ woo vu̵lı̵́, moo ká fȩȩ waa ba'ad nán Izraɛ́l ku̵u̵ ba' vu̵ ya, ka maa vu̵, ka tú'ud vu̵ hi̧naa duulí tóó kə́d máa á̧ḿ.

²⁶Zó̧ó̧ 'yɛ́lı̵́ ka kan ba'ad kɔ́lı̵́ pɛ́lı̵́ tée, mbaa kɔ́ ı̵́ nán wə̧m ka pɛ́lı̵́ máa wɔgɔ. Sı̵́ nɔmme.