Read Dii YAAKÚBU 3 Bible Online

YAAKÚBU 3 - Dii bible

YAAKÚBU 3

¹Dan kirtȩ́n vu̵, i hí̧í̧ mbaalı̵́ akaw vu̵ ɓu̵u̵lı̵́ na'a sá, moo ví gaa ı̵́ vóó kóó akaw máa vɔ́ń nuŋ moo sə̧"ȩ́ píím mba nán tóó vu̵ ú̵.

²Ya baa ví 'waapád, ba baa dɨ ví hȩn kɔ́lı̵́ sɔnné kə́dkə́d. Nán tóó a sɔn moo ya̧g woolı̵́ né tée, nán hȩn yȩ́ń kɔ́lı̵́ɨ, tée wú̵ń dɨ kan néélȩ́ tu̵ fó̧ó̧ woo 'waapád á̧ḿ.

³Ba 'yɛ́d ví go'oy vu̵ yȩ́g ya̧gá̧, moo u̵u̵ kid ba ví tɔ́ggɨ. Ma ba tú'ud vu̵ ví 'yȩ́ȩm kan wu̵ yu̵, ba tu̵ ví fó̧ó̧ voo 'waapád.

⁴Tóó tée ba taa ho̧ ví nɛ́ŋ́ vee vu̵ yu̵. Kóó u̵u̵ na' gbo̧o̧ ba'a, kóó sápéém gbo̧o̧ u̵u̵ ndaa vu̵ laan si̧', faan waaná' aga wu̵ tú'ud vu̵ hi̧naa á̧ḿ, pa̧ŋ vu̵ laan ya ı̵́ nɛ́ŋ́ yú̵ú̵lı̵́ ka hí̧í̧ máalȩ́.

⁵Ya̧g dɨ ı̵́ yo̧go̧ á̧ḿ. Fó̧ó̧ móólȩ́, ya̧g dɨ waaná' aga nɔ, a̧máa káḿ dáb moo tée, tii hȩn gbo̧o̧ ba'a. I ho̧ lá ví vee kan zúgudi, a̧n hȩn kɔddı̵́ ɓu̵u̵lı̵́ na'a.

⁶Ya̧g mbaa dɨ kɔ́ ı̵́ vee wɔgɔ. Hȩn ɓı̵́d hi̧' dɨ woolı̵́, dɨ ka' tóólı̵́ fó̧ó̧ baa vílí á̧ḿ, ma bé' vi̧i̧ fó̧ó̧ baa ví kan ya̧gá̧ á̧ḿ. Baa a̧n ba ví bá' mbaalı̵́ zá̧a̧d baa ví yɛlı̵́. Vee woo vúd ya dɨ Seeɗán woolı̵́.

⁷Nánán dɨ kan néélȩ́ tii pú̵g hó̧g vu̵ 'waapád, buu vu̵. Buu nɔ́g vu̵, kan hȩn wóoné hágá vu̵, kan hȩn mammé vu̵ á̧ḿ.

⁸A̧máa nán dágá aga kɛn ya̧g woo né. Wu̵ hȩn ɓı̵́d ı̵́ ka mba kɛb má nɔ. Nɔŋ ı̵́ hȩn nɔɔné hi̧' dɨ woolı̵́ á̧ḿ.

⁹Ba ɓɛ ya̧g yȩ na'an ví Ba' ı̵́ 'yɛ́lı̵́ baa ví woo wu̵lı̵́, a̧máa ba fáan ví nán Tayɨɨ ka mbɔ́g vu̵, ku̵u̵ man kannɔ máa vu̵ wu̵lı̵́ á̧ḿ.

¹⁰Ya̧g dágá yȩlȩ́, ba dȩn ví Tayɨɨ nag wu̵lı̵́, ba ga'an ví nag wu̵lı̵́ á̧ḿ. Dan kirtȩ́n vu̵, hȩn tóó a mbaa ı̵́ yo̧go̧ sá.

¹¹Dəə mam dágá gan mam to̧o̧, kan mam lágad á̧ḿ né.

¹²Dan kirtȩ́n vu̵, zɔgɔb dɨ kan néélȩ́ liin líid ko̧'o̧b né, mbu̵' liin líid zɔgɔb né á̧ḿ. Dɨ ı̵́ yo̧go̧, mam ta̧m dɨ kan néélȩ́ lɛn mam to̧o̧ né á̧ḿ.

¹³Nán moo gaalı̵́, tóó tée, nán moo taalı̵́ tóó a dɨ víílí ú tée, mbaalı̵́ du̵u̵ woo, kan yúú nə"ȩ́ woo a wu̵ tú' moo gaalı̵́ woo yȩ.

¹⁴A̧máa tow i dɨ kan sɨg mɔ́nné maag zó̧ó̧ víílí, kan moo fá̧né vu̵ víílí ú tée, i na' yúú sá, i kɔ́ vbád yúú moo yȩ́ńné sá á̧ḿ.

¹⁵Moo gaalı̵́ ı̵́ yo̧go̧ yȩ vu̵ zu̵u̵n be"ı̵́ né. Vu̵ voo hȩn hágá yɛ vu̵ yu̵, kan hȩn hí̧í̧lí̧ nánán voo vu̵ yu̵ á̧ḿ. Vu̵ yaa voo Seeɗán woolı̵́,

¹⁶moo ya sɨg mɔ́nné ka du̵u̵lı̵́, kan moo fá̧né vu̵ máa, hȩn hı̵́'ɨné kan hȩn kə̧ə̧g kɔ́lı̵́ vu̵ kə́dkə́d vu̵ du̵u̵lı̵́ á̧ḿ.

¹⁷A̧máa moo gaalı̵́ ı̵́ ka zu̵u̵ be"ı̵́ máa, dəné woo, mbaa woo dȩ"ȩ́ na'a, kan zó̧ó̧ ká̧'a̧d kan zó̧ó̧ to̧o̧, faan moo né, hi̧' kan zó̧ó̧ nán, ba'ad du̵u̵ woo vu̵ laa tíŋ́ tíŋ́, səgən nánán vu̵ né, kɔ́n zó̧ó̧ ví̧i̧g né á̧ḿ.

¹⁸Nán ku̵u̵ mbɔ́g moo to̧o̧g kan daga vu̵, kan zó̧ó̧ ká̧'a̧d máa, vú̵ń mbaa ı̵́ to̧o̧g Tayɨɨ woo vu̵ ú̵ á̧ḿ.