Read Dii YAAKÚBU 4 Bible Online

YAAKÚBU 4 - Dii bible

YAAKÚBU 4

¹Ya̧g kɔ́nné, kan háńné víílí sa̧a̧mé yȩ, vu̵ yaad ví tɛ́lá? Vu̵ yaan kan hȩn hí̧í̧lí̧ víí ka dɨ ví pinní fó̧lȩ́ yȩ nɔ náa?

²Ví hí̧í̧ hȩn, a̧máa ví nugu ní. Ví mbaa bə́' kan nɔm nɔɔné, ví sú̵ zó̧ó̧, a̧máa ví nugun hȩn woo né. Ví háń, ví kɔ́ ya̧g vu̵. Ví nugun hȩn kíí hí̧í̧n yȩ vu̵ né á̧ḿ, moo ví ɓá'an Tayɨɨ wu̵ hȩn yȩ né.

³Tow kíí ɓá' hȩn tée, ví nugu ní, moo moo taalı̵́ zó̧ó̧ víílí vu̵ du̵u̵ né. Hȩn kíí ɓá' yȩ, ví hí̧í̧ bi kɔ́n hȩn dáń bii nu.

⁴Nán kíí duun Tayɨɨ dágá né yȩ víw! Ví gaan mbaalı̵́ dag gboo hȩn hágá yɛ voo máa, ba hȩn maag Tayɨɨ woo nɔ máa náa? Nán ka hí̧í̧ bi mbaa dag gboo hȩn hágá yɛ voo nɔ máa, tii nán maag Tayɨɨ woo sú̵'ú̵.

⁵Ví taa moo debtere ka o̧ yȩ, ba moo lee naa? O̧: “Tayɨɨ moo sɨg moo yigid woo ka pú̵ ba ví yɛ, a mbaa baa vílí.”

⁶A̧máa Tayɨɨ duu kɔ́d ba ví zó̧ó̧ nán woo tóó á̧ḿ. Moo woo nɔ, debtere o̧: “Tayɨɨ há'án nɔ́ɔ́ kan nán yúú na"ȩ́ vu̵ yu̵, a̧máa nán ku̵u̵ na'an yúú né máa, kɔ́d vu̵ yu̵ zó̧ó̧ nán.”

⁷Moo woo nɔ, i kid Tayɨɨ wu̵ tɔ́g. I ma Seeɗán tée, wú̵ń lúú gbɔ ví la ɗiilí na'a.

⁸I séé ya Tayɨɨ woolı̵́ tée, wú̵ń séé la víílí á̧ḿ. Nán hȩn ɓı̵́d kɔ́lı̵́ yȩ ví, i nɛ' nag víí vu̵ du̵u̵lı̵́ na'a. Nán zó̧ó̧ ví̧i̧g yȩ ví, i mbɔ́g zó̧ó̧ víí vu̵ u̵u̵ mbaa dȩ"ȩ́ na'a.

⁹I mbaa kan zó̧ó̧ ví̧i̧ní, i ká̧ŋ́, i du'ud mɛmɛ́ḿ. Vı̵́d víí u̵u̵ tii ká̧ń, zó̧ó̧ dȩ"ȩ́ víí u̵u̵ tii zó̧ó̧ ví̧i̧ní.

¹⁰I nə'əy tíŋ́ ı̵́ 'yɛ́lı̵́ woolı̵́ tée, wú̵ń ka luu ví dɔg.

¹¹Dan kirtȩ́n vu̵, i ó̧ń moo ɓı̵́d vu̵ sá. Nán tóó a moo moo ɓı̵́d yúú daga kirtȩ́n woolı̵́, a sə̧' moo yúú woolı̵́ á̧ḿ tée, moo moo ɓı̵́d yúú dooká Tayɨɨ woo vu̵lı̵́ sú̵'ú̵, sə̧' moo yúú dooká yȩ vu̵lı̵́ á̧ḿ sú̵'ú̵. A̧máa tow a̧m sə̧' moo yúú dooká Tayɨɨ woo vu̵lı̵́ tée, mɔ́ duun sı̵́ dooká sú̵u̵ vu̵ né, a̧máa mɔ́ sə̧' moo wu̵ yúú voolı̵́.

¹²Tayɨɨ wu̵ dágá wu̵ pú̵ dooká vu̵. Wú̵ńnɔ sə̧' moo, wú̵ńnɔ səd nán vu̵ á̧ḿ, tóó tée wú̵ń nɔɔ vu̵. Ɨ́ móó káḿ sə̧'ə̧d dam tóó moo yȩ, mɔ́ móó nɔ́nná?

¹³I ki ú, ı̵́ víí kíí o̧: “Ɓəə vɔ́ń laa kaa yȩlȩ́, tóó tée yɔ́gɔ́, vɔ́ń səə wu̵lı̵́ ve' dágá, vɔ́ń kɔ́ lum wu̵lı̵́, vɔ́ń nuŋ sɨɨde wu̵lı̵́.”

¹⁴Ɨ́ víí kíí gaan hȩn yɔ́gɔ́ né, ví gaan mbaalı̵́ víí yɔ́gɔ́ né á̧ḿ, moo ví mbaa kɔ́ ı̵́ mam ka uu ya̧g ka̧'a̧mé máa wɔgɔ. Zaa tée daa 'wáa la.

¹⁵Moo woo ka víń baa o̧ máa, wu̵ yɛ nɔ: “Tow ı̵́ 'yɛ́lı̵́ baa ví a hí̧í̧ ú̧ tée, vɔ́ń mbaa, vɔ́ń kɔ́ hȩn yȩ vu̵.”

¹⁶A̧máa 'ya̧'a̧ yɛ ví na' yúú, ví zuŋ haa sú̵'ú̵. Yúú na"ȩ́ ı̵́ yo̧go̧ yȩ du̵u̵ né.

¹⁷Nán ka gaa hȩn du̵u̵ kɔ́lı̵́, ma ka kɔ́n né tée, kɔ́ hȩn ɓı̵́ddɨ.