Read Dii YAAKÚBU 5 Bible Online

YAAKÚBU 5 - Dii bible

YAAKÚBU 5

¹'Ya̧'a̧ yɛ máa, i ki moo míí yɛ ú̵, ı̵́ naa vu̵! I ká̧ŋ́, i hí̧d moo hȩn ndɔ́gɔné ka dɨ yaalı̵́ víílí yȩ nɔ.

²Hȩn naa víí vu̵, vú̵ń mbúggú! Ga'ad vú̵ń lá sa̧a̧m víí vu̵ 'waa ú̵!

³Do̧' víí, kan sardi víí, vú̵ń tɔ ha'ad 'waa á̧ḿ! Ha'ad tɔlı̵́ voo yȩ wú̵ń mbaa hȩn ya̧g du̵lı̵́ yúú víílí, vú̵ń lá fó̧ó̧ yo̧go̧ víí vu̵ kɔ́ ı̵́ vee wɔgɔ. Ví su̵g hȩn naa víí vu̵ bá' sí̧'í̧dí yɛlı̵́ sú̵'ú̵.

⁴Ví sú̵u̵n nán ku̵u̵ kɔ́d ví ba'ad babbı̵́ máa vu̵ sɨɨde ba'ad voo né. I ki dam sɨɨde voo gbɔ́lı̵́ ú̵! Ká̧ń nán yȩ voo ya̧ dɔg ı̵́ 'yɛ́lı̵́ baa ví ka mba hȩn 'waapád yȩ woolı̵́ sú̵'ú̵.

⁵Ví dɨ víí mbaalı̵́ kan hȩn naa hágá yɛlı̵́, ví mbaa víí hȩn hí̧í̧lí̧ hágá yɛlı̵́ vu̵lı̵́. Ya̧g víí vu̵ sig, há̧á̧ ya̧ zá̧ga̧ u̵u̵ sə̧' ví wu̵lı̵́.

⁶Ví si̧'i̧d hȩn, ví nɔɔ nán ı̵́ ku̵u̵ kan moo pɛ́lı̵́ máa vu̵, a̧máa nán yȩ vu̵ há'an ví fó̧ó̧ voo né á̧ḿ.

⁷Dan kirtȩ́n vu̵, i ma' zó̧ó̧ mbaa há̧á̧ a ya̧ bá' fíiní ya ı̵́ 'yɛ́lı̵́ baa ví woolı̵́. I ma' zó̧ó̧ mbaa kɔ́ ı̵́ nán hȩn baalı̵́ ku̵u̵ ma' zó̧ó̧ laa hȩn bab voo ka yó̧d vu̵ máa wɔgɔ. Vu̵ ma' zó̧ó̧ mbaa laa mam hí̧i̧g, há̧á̧ ya̧ zó̧'o̧d.

⁸I ma' zó̧ó̧ víí la á̧ḿ, i zi̧i̧ zó̧ó̧ la ú̵, moo bá' fíiní ya ı̵́ 'yɛ́lı̵́ baa ví woo dɨ bə́'.

⁹Dan kirtȩ́n vu̵, i ví̧í̧n zó̧ó̧ sá, moo Tayɨɨ kan sə̧'ə̧d ví mooɨ. Ɨ́ moo sə̧"ȩ́ dɨ bə́', zaa wú̵ń dɔ́ ya sú̵'ú̵.

¹⁰Dan kirtȩ́n vu̵, i duu taa hȩn anábi ku̵u̵ pa moo kan yɛ́g ı̵́ 'yɛ́lı̵́ woo máa vu̵ yu̵. I 'yȩ́ŋ́ duu vu̵ yu̵ kan zó̧ó̧ ma"ȩ́ ya hȩn ndɔ́gɔnélȩ́.

¹¹Ba o̧ ví, du̵u̵d nán ı̵́ ku̵u̵ ma' zó̧ó̧ máa vu̵ yu̵. Ká ví ki moo zó̧ó̧ ma"ȩ́ Zóob woo sú̵'ú̵. Ví gaa hȩn ı̵́ 'yɛ́lı̵́ ka duu pú̵gu̵ sí̧'í̧d woolı̵́ máa sú̵'ú̵ á̧ḿ, moo ı̵́ 'yɛ́lı̵́ wu̵ hi̧' kan zó̧ó̧ nán, ho̧ gíḿ gaad nán vu̵ á̧ḿ.

¹²Dan kirtȩ́n vu̵, də́ń kəd máa, i sa̧a̧ hȩn sá. I sa̧a̧ hȩn kóó kan be', kóó kan hág, kóó kan kɛb tóó sá. Hȩn ka maa o̧lȩ́ ee tée, i o̧: “Ee;” ı̵́ ka maa o̧lȩ́ áá'a tée, i o̧: “Áá'a;” moo Tayɨɨ kan sə̧' moo yúú víílí.

¹³Nán tóó víílí sa̧a̧mé ka nuŋ hȩn ndɔ́gɔné tée, a ɓá' Tayɨɨɨ. Zó̧ó̧ ka dȩ' nán tóó tée, a bee yéé na' Tayɨɨ.

¹⁴Hȩn ka ho̧o̧ nán tóó víílí sa̧a̧mé tée, a bee ı̵́ nii sú̵ggı̵́ vu̵, u̵u̵ túudu̵ kúḿ kan yɛ́g ı̵́ 'yɛ́lı̵́ baa ví woo, tée u̵u̵ ɓá' Tayɨɨ yúú woolı̵́.

¹⁵I 'yɛ́ zó̧ó̧ ı̵́ 'yɛ́lı̵́ baa ví woolı̵́ tée, hȩn ɓá"ı̵́ víí wú̵ń səd nán ho̧o̧ yȩ. Ɨ́ 'yɛ́lı̵́ wú̵ń kɔ́ ho̧o̧ woo wú̵ń ka̧"o̧, ma a kɔ́ dɨ hȩn ɓı̵́ddaa, tée ı̵́ 'yɛ́lı̵́ wú̵ń kéé hȩn ɓı̵́d woo gbɔ á̧ḿ.

¹⁶Moo woo nɔ, i tú'ún hȩn ɓı̵́d víí vu̵ ú̵! Kóó nɔ́nná a dȩn Tayɨɨ nag moo daga tóó woo, moo há̧á̧ ho̧o̧ víí u̵u̵ ka̧'. Nán ka kɔ́ hȩn hí̧í̧lí̧ Tayɨɨ woo máa, ka ɓá' Tayɨɨ kan zó̧ó̧ woo 'waapád tée, moo yȩ kɔ́ hȩn gbo̧o̧ á̧ḿ.

¹⁷Elía ká nánánne kɔ́ ı̵́ ba ví wɔgɔ, a̧máa ɓá' Tayɨɨ kan zó̧ó̧ pilí, moo mam a naŋ sá, ma mam nagan hágá yɛlı̵́ né há̧á̧ ve' ta̧a̧nɔ́ kan sȩȩ gúú.

¹⁸Pig woolı̵́ máa, Elía duu ɓá' Tayɨɨ, ma be' gbɔ mam naŋ zu̵u̵, hȩn vu̵ tá̧', vu̵ yó̧ tú̵d.

¹⁹Dan kirtȩ́n vu̵, nán tóó víílí sa̧a̧mé ka bá̧a̧ hi̧naa moo yȩ́ń pȩ́ń, daga tóó ka vȩ"o̧ ya tée,

²⁰i gaa nán ka kɔ́ daga tóó ka gbɔ hi̧naa bá̧a̧né woo yȩ, səddu̵ nɔmmé sú̵'ú̵. Kɔ́ hȩn ɓı̵́d woo vu̵ ɓu̵u̵lı̵́ na'a yȩ vu̵ ná'ád sú̵'ú̵ á̧ḿ.