Read Dii 1 Piɛ́r 1 Bible Online

1 Piɛ́r 1 - Dii bible

1 Piɛ́r 1

¹Mí Piɛ́rru̵, waa ba'ad Yesu Krístu woo nɔ. Míi ba'ad ví ɗerwəl yɛ, nán Tayɨɨ ka yee ví, kíí mbaa gááná hág Pó̧ŋŋı̵́, kan hág Galáddı̵́ kan hág Kapadósdı̵́ kan hág Aazíilí kan hág Bitiníilí̧ yȩ víw.

²Ba'á Tayɨɨ yee ví kɔ́ ı̵́ ká mbɔ́g tíŋ́ máa wɔgɔ, tii ví sı̵́ nán woo vu̵ kan yigid woo ú̵, moo i kid bi tɔ́ggɨ, bi tɛ ví kan mɛm Yesu Krístu woo nɔ á̧ḿ. Tayɨɨ a kɔ́d ví zó̧ó̧ nán ɓu̵u̵lı̵́ na'a, a 'yɛ́ ví i mbaa ká̧'a̧dɨ.

³Ba na' ví Tayɨɨ, Ba' ı̵́ 'yɛ́lı̵́ baa ví Yesu Krístu woo. Wu̵ ha̧a̧ ba ví 'maŋná kan zó̧ó̧ nán gbo̧o̧ woo yȩ, moo aa mbaa ví zá̧a̧d kɔ́ ı̵́ ka nim Yesu Krístu nɔmmé yȩ wɔgɔ á̧ḿ.

⁴Ba dȩ' ví zó̧ó̧ yúú hȩn ka 'yɛ́d ba ví, ka nɔɔ né, ka kɔ́n ví̧i̧g né, ka bugu ní, ka dɨ be"ı̵́ yȩlȩ́.

⁵Tayɨɨ tu̵ ví kan néélȩ́ woo, moo i 'yɛ́ zó̧ó̧ víí biilí. Bá' sí̧'í̧dí tée, báń ho̧ ví hȩn sənné ka mbɔ́g 'yɛ́d ba ví yȩ.

⁶Moo woo nɔ, kóó u̵u̵ gu̵g ví sey waaná', u̵u̵ kɔ́d ví hȩn zó̧ó̧ ví̧i̧ní vu̵ kə́dkə́d si̧', ví dȩ' zó̧ó̧ víí wu̵lı̵́ mbaa ná'.

⁷Vu̵ baa pɛ do̧' vɛlı̵́, tée vu̵ gaa du̵u̵ woo, a̧máa do̧' wú̵ń ti woo ú̵. Zó̧ó̧ 'yɛ́lı̵́ víí wu̵ mba do̧' kan gáálı̵́, vu̵ gu̵ggu̵ pȩ́ń á̧ḿ. Sey Yesu Krístu a fíí ya tée, víń nuŋ dəmné kan na"ȩ́, kan yɛ́g to̧o̧ yúú zó̧ó̧ 'yɛ́lı̵́ víí yȩlȩ́.

⁸Kóó kíi ho̧nnɔ kan nɔ́ɔ́ né yȩ nɔ si̧', ví hí̧í̧wo̧ ó̧. Kóó kíí ho̧nnɔ lá 'ya̧'a̧ yɛ né si̧' yȩ, ví 'yɛ́ zó̧ó̧ víí vu̵ dɨ woolı̵́, ma ví dɨ víí kan zó̧ó̧ dȩ"ȩ́ gbo̧o̧ ba'a, ba nugun kɛb u̵u̵ gú̵gú̵nɔ kan hȩn tóó vu̵ né.

⁹Tée ví nuŋ hȩn zó̧ó̧ 'yɛ́lı̵́ a pú̵ ví máa sú̵'ú̵, ví sə́d sú̵'ú̵ á̧ḿ.

¹⁰Yúú hȩn sənné yȩlȩ́ máa, anábi vu̵ soo, vu̵ soo du̵u̵lı̵́ na'a, moo bi gaa hȩn du̵u̵ Tayɨɨ ka dɨ ví pú̵lı̵́ leená yȩ ó̧, ma vu̵ o̧ moo ya̧g ba'ad yúú woolı̵́ á̧ḿ.

¹¹Vu̵ sȩn fó̧ó̧ soo hȩn yigid Krístu woo ka tú'ud vu̵ yȩ, moo bi gaa ve' woo, tóó tée, hȩn woo ban mbaa nɛ́nná. Ma yigid ká ku̵u̵ dɨ kannɔ yȩ tú'ud vu̵ hȩn ndɔ́gɔné Krístu woo a dɨ nuní máa, kan na"ȩ́ woo a dɨ yaalı̵́ pig woolı̵́ máa á̧ḿ.

¹²Tayɨɨ tú'ud vu̵ ya̧g ba'ad máa ba kii pú̵ vu̵ yȩ, ba ya̧g ba'ad moo voo nɔ pɛ́lı̵́, ba ya̧g ba'ad moo víí nu. Anábi vu̵ pa moo yȩ vu̵ kɔ́ ı̵́ waa ba'ad vu̵ wɔgɔ. 'Ya̧'a̧ yɛ máa, yigid Tayɨɨ woo be"ı̵́ ba' nán tóó vu̵ ya, nán ku̵u̵ dɨd ví moo to̧o̧ 'maŋ palı̵́ yȩ vu̵ yu̵. Ya̧g ba'ad woo maleeka vu̵ hí̧í̧ bi gaa á̧ḿ.

¹³Moo woo nɔ, i 'yɛ́ moo taalı̵́ víí vu̵ bə́' moo ba'ad kɔ́lı̵́ɨ; i nə sá; i 'yɛ́ zó̧ó̧ víí yúú zó̧ó̧ nán Tayɨɨ a kɔ́d ví zá̧ga̧ fíiní Yesu Krístu woolı̵́ yȩlȩ́.

¹⁴I mbaa waa tɔ́g kilí vu̵ yu̵, i duu tii mbaa mbaalı̵́ ɓı̵́d víí ká tíŋ́, kíí gaan hȩn né pee sá.

¹⁵A̧máa i mbaa kɔ́ ı̵́ Tayɨɨ ka hí̧í̧ wɔgɔ, moo Tayɨɨ ka bee ví yȩ kɔ́n hȩn ɓı̵́d né á̧ḿ.

¹⁶Tayɨɨ vud o̧ la ha̧d debtere woolı̵́, o̧: “I mbaa kɔ́ ı̵́ káń hí̧í̧ wɔgɔ, moo mí kɔ́n hȩn ɓı̵́d né.”

¹⁷Tayɨɨ səgən nán vu̵ né, sə̧' moo yȩ́ńná yúú nán voolı̵́ 'waapád yúú ba'ad voolı̵́ á̧ḿ. Kíí beewu̵ Ba'á yȩ, bá' ka kéed ví kíí dɨ lá mbaalı̵́ gááná hágá yɛlı̵́ yɛ, i kiddu̵ tɔ́ggú̵.

¹⁸Ká ví mbaa mbaalı̵́ lee a ví yée ká ku̵u̵ gbɔd ví yȩ nɔ, ma Tayɨɨ ya səd ví. Sən ví kan sɨɨde, kan do̧"ȩ né, moo vú̵ń duu lán sı̵́ né.

¹⁹A̧máa səd ví kan nɔm Krístu woo ka lá mba hȩn 'waapád yȩ nɔ. Fó̧ó̧ woo mbaa kɔ́ ı̵́ mbee waa tóó ka ko̧go̧ né, ndɔ́g laa ka fó̧ó̧ woolı̵́ pɛ́lı̵́ máa wɔgɔ.

²⁰Tayɨɨ ká mbaa kan Krístu tíŋ́ pȩ́ń, pú̵gu̵ ba'ad hȩn sənné yȩ, ma yɨb be' kan hág. Tayɨɨ duu vud Krístu tú' bá' sí̧'í̧d yȩlȩ́, moo víí nu.

²¹Yúú Krístu woolı̵́ ma ví 'yɛ́ zó̧ó̧ víí vu̵ Tayɨɨ ı̵́ ka nimmɔ nɔmmé yȩ woolı̵́, ı̵́ ka pú̵ Krístu na"ȩ́ yȩ nɔ. Moo woo nɔ, zó̧ó̧ 'yɛ́lı̵́ víí kan moo taalı̵́ víí vu̵ sú̵g mbaa dɨ Tayɨɨ woolı̵́.

²²I hí̧í̧n kan da ví kirtȩ́n vu̵ moo yȩ́ńná. Tow i kid moo yȩ́ń tɔ́g sú̵'ú̵ pȩ́ń tée, hȩn ɓı̵́d víí vú̵ń ná'ád. I pi zó̧ó̧, ví hí̧í̧n kan zó̧ó̧ víí 'waapád.

²³Vu̵ ha̧a̧ ví 'maŋná sú̵'ú̵. A̧máa ha̧a̧lȩ́ yȩ yaan kan ha̧a̧lȩ́ ı̵́ hágá yɛlı̵́ɨ né, a̧máa yaa woo kan hȩn á̧á̧ ı̵́ ka bugu ní má nɔ, wu̵ moo zá̧a̧d Tayɨɨ woo ka dɨ mbaalı̵́ há̧á̧ káákáá yȩ nɔ,

²⁴kɔ́ ı̵́ debtere ka o̧ máa wɔgɔ, o̧: “Nánán vu̵ mbaa kɔ́ ı̵́ hó̧d vu̵ wɔgɔ. Na"ȩ́ voo mbaa kɔ́ ı̵́ kó̧'o̧d voo vu̵ wɔgɔ. Kpag voo vu̵ mbɛ́, kó̧'o̧d voo vu̵ yo̧ŋ.

²⁵A̧máa moo ı̵́ 'yɛ́lı̵́ Tayɨɨ woo mbaa woo há̧á̧ káákáá.” Wu̵ moo to̧o̧ 'maŋ kíí ki yȩ nɔ.