Read Dii 1 Piɛ́r 2 Bible Online

1 Piɛ́r 2 - Dii bible

1 Piɛ́r 2

¹I gbɔ lı̵́nné, kan hȩn sóoné, kan ya̧g nán zó̧ó̧ ví̧i̧g voo, kan zó̧ó̧ sú̵lı̵́ hȩn da ba ví voolı̵́; i ó̧ń moo ɓı̵́d ya víílí sá á̧ḿ.

²I baa hí̧í̧ moo yȩ́ń kɔ́ ı̵́ waa pə̧́ə̧d ku̵u̵ hí̧í̧ va̧a̧ máa wɔgɔ, moo i ki tée, víń na', víń sə́d á̧ḿ.

³Kɔ́ ı̵́ debtere ka o̧ wɔgɔ, o̧: “Ví dəŋ ki to̧m ı̵́ 'yɛ́lı̵́ woo ho̧ sú̵'ú̵.”

⁴I séé ya ı̵́ 'yɛ́lı̵́ Yesu woolı̵́. Wu̵ 'yɛgɛ zá̧a̧d nán ku̵u̵ ma gbɔ máa, a̧máa Tayɨɨ yee 'yɛ́gɛ hȩn gbo̧o̧ sú̵'ú̵.

⁵Ví á̧ḿ, ví mbaa kɔ́ ı̵́ 'yɛgɛ zá̧a̧d yigid Tayɨɨ woo ka yo̧o̧n lig Tayɨɨ woo wu̵lı̵́ máa wɔgɔ. Tée víń mbaa nán hȩn ha"ı̵́ Tayɨɨ woo vu̵, víń kɔ́ ba'ad ı̵́ yigid Tayɨɨ woo ka pú̵ ví, ı̵́ ka to̧o̧d Tayɨɨ yúú Yesu Krístu woolı̵́ máa.

⁶I ki hȩn Tayɨɨ ka o̧ debtere woolı̵́ má nɔ, o̧: “Mí yee 'yɛgɛ tóó 'yɛ́ kaa Sió̧ŋŋı̵́. Wu̵ 'yɛgɛ ndam, sɔ́g woo néé mba kɛb á̧ḿ. Nán a 'yɛ́ zó̧ó̧ woo woolı̵́ tée, sȩ́ḿ wú̵ń kɔ́nnɔ né sá̧ḿ.”

⁷Ɨ́ víí kíí 'yɛ́ zó̧ó̧ woolı̵́, sɔ́g woo ka néé na'a yȩ, sı̵́ hȩn víí nu. A̧máa nán ı̵́ ku̵u̵ fȩȩn moo woo né yȩ, vú̵ń ho̧ “'yɛgɛ nán hȩn yo̧o̧lȩ́ ku̵u̵ ma gbɔ yȩ, ba wu̵ duu tii 'yɛgɛ ndam,” kɔ́ ı̵́ debtere ka o̧ wɔgɔ.

⁸Duu o̧: “'Yɛgɛ yȩ nán vú̵ń baa fə́ń wu̵lı̵́, vú̵ń ii wá̧á̧ wu̵lı̵́ á̧ḿ.” Vú̵ń fə́ń woolı̵́, moo ku̵u̵ 'yɛ́n zó̧ó̧ voo moo Tayɨɨ woolı̵́ né má nɔ. Tayɨɨ wu̵ mbɔ́g hȩn woo ı̵́ yo̧go̧.

⁹A̧máa ı̵́ víí máa, ví zig Tayɨɨ ka yee máa vu̵ yu̵; ví nán hȩn ha"ı̵́ gbanii woo vu̵ yu̵; ví zig Tayɨɨ woo vu̵ yu̵ á̧ḿ. Tayɨɨ 'yɛ́ ví zig woo moo i tú' ba'ad du̵u̵ bii vu̵ yu̵. Wu̵ bee ví moo i vúd ya ya dimmí, i yaa ya túlí bii ka mba hȩn 'waapád yȩlȩ́.

¹⁰Ká tíŋ́ máa, ká ví zig Tayɨɨ woo vu̵ yu̵ pɛ́lı̵́, a̧máa 'ya̧'a̧ yɛ máa, ví sı̵́ zig woo vu̵ yu̵. Ká ví nugun zó̧ó̧ nán Tayɨɨ woo né, a̧máa 'ya̧'a̧ yɛ máa, kɔ́d ví sı̵́ zó̧ó̧ nánnɔ́.

¹¹Ɨ́ hí̧í̧lí̧ míí vu̵, mí hí̧í̧ bi o̧d ví, kíí dɨ mbaalı̵́ hágá yɛlı̵́ gááná yɛ, i gág kan hȩn hí̧í̧lí̧ nánán voo ku̵u̵ dɨ sɨɨ kɔ́lı̵́ kan zó̧ó̧ víí yȩ vu̵ ú̵.

¹²I mbaa mbaalı̵́ du̵u̵ víí sa̧a̧m nán gaa Tayɨɨ sá voolı̵́. Tée kóó u̵u̵ o̧ ba vín nán hȩn ɓı̵́d kɔ́lı̵́ vu̵ yu̵ si̧', vú̵ń ho̧ ba'ad du̵u̵ víí, vú̵ń na' Tayɨɨ sey zá̧ga̧ a fíí vu̵ ya giiní téelı̵́.

¹³I kid nán gbo̧o̧ vu̵ tɔ́g 'waapád moo ı̵́ 'yɛ́lı̵́ woo nɔ. I kid gbanii tɔ́g, moo ka 'yɛ́ nán vu̵ 'waapád;

¹⁴kan guvɛrnə́ər vu̵, moo Tayɨɨ wu̵ 'yɛ́ vu̵ moo u̵u̵ si̧'i̧d nán hȩn ɓı̵́d kɔ́lı̵́ vu̵, u̵u̵ na' ı̵́ hȩn du̵u̵ kɔ́lı̵́ máa vu̵ á̧ḿ.

¹⁵Hȩn Tayɨɨ ka hí̧í̧ máa wu̵ yɛ nɔ; nán ku̵u̵ taan moo né, ku̵u̵ moo moo ɓı̵́d yúú víílí yȩ, i kɔ́ víí hȩn du̵u̵ tée, wú̵ń tú̵' vu̵ ya̧g.

¹⁶I mbaa mbaalı̵́ waa vəg lee vu̵ yu̵, a̧máa i wáá nɔ́ɔ́ moo hȩn ɓı̵́d kɔ́lı̵́ sá. I mbaa kɔ́ ı̵́ nán ba'ad Tayɨɨ woo vu̵ wɔgɔ.

¹⁷I na' nán vu̵ 'waapád; i hí̧í̧n ya kirtȩ́n víílí; i ndɔg Tayɨɨ ú̵; i na' gbanii víí á̧ḿ.

¹⁸Nán ba'ad vu̵, i kid baa lig víí vu̵ tɔ́g du̵u̵lı̵́ na'a, baa lig ı̵́ ku̵u̵ to̧o̧, ku̵u̵ ka̧' zó̧ó̧ máa vu̵ yu̵ dágá pɛ́lı̵́, a̧máa ı̵́ ku̵u̵ 'wɔ́ nag máa vu̵ á̧ḿ.

¹⁹Du̵u̵ ú̵, kaa nuŋ hȩn ndɔ́gɔné la té', a̧máa kaa ma' zó̧ó̧ moo Tayɨɨ woolı̵́ má nɔ.

²⁰Tow i zi̧i̧ zó̧ó̧ mbaa moo kíí kɔ́ hȩn ɓı̵́d, ma ku̵u̵ gbɔ́ ví yȩ nɔ tée, ví kɔ́ hȩn gbo̧o̧ wu̵ yȩ naa? A̧máa tow i nuŋ hȩn ndɔ́gɔné pig hȩn du̵u̵ kɔ́lı̵́ víílí, ma i zi̧i̧ zó̧ó̧ wu̵lı̵́ tée, tíŋ́ Tayɨɨ woolı̵́ máa hȩn du̵u̵ɨ.

²¹Tayɨɨ bee ví moo woo nɔ, moo Krístu ká nuŋ hȩn ndɔ́gɔné moo víí, ma gbɔd ví hȩn gú̵gu̵né woo, i duu doo woo ú̵.

²²Kɔ́n woo hȩn ɓı̵́d né, ba kin moo vbád ya̧g woolı̵́ né, kɔ́ ı̵́ debtere ka o̧ wɔgɔ.

²³Ku̵u̵ haawu̵ tée, duu haan vu̵ voo né; ka nuŋ hȩn ndɔ́gɔné máa, kɔ́n hȩn tóó moo bi séen vu̵ ú̵ né, a̧máa gbɔd vu̵ kan Tayɨɨ ı̵́ ka sə̧' moo yȩ́ńná má nɔ.

²⁴Krístu gaŋ hȩn ɓı̵́d kɔ́lı̵́ baa ví dɔgɔn la' vbagadı̵́ kan fó̧ó̧ woo, moo aa si̧' ví hȩn ɓı̵́d kɔ́lı̵́, aa duu mbaa ví kɔ́ ı̵́ Tayɨɨ ka hí̧í̧ máa wɔgɔ. Ndɔ́g víí vu̵ yó̧ yúú ndɔ́g woo ka nuŋ vu̵ yȩlȩ́,

²⁵moo ká ví bá̧a̧ daa kɔ́ ı̵́ mbee vu̵ wɔgɔ; a̧máa 'ya̧'a̧ yɛ vu̵ vȩ' ví yaan woolı̵́ sú̵'ú̵. Wu̵ waa tu̵ mbee, wu̵ baa gii ví á̧ḿ.