Read Dii 1 Piɛ́r 3 Bible Online

1 Piɛ́r 3 - Dii bible

1 Piɛ́r 3

¹Ví á̧ḿ, wakȩ́ȩ́ vu̵, i kid wə̧ə̧ víí vu̵ tɔ́ggú̵. Nán tóó vu̵ sa̧a̧m wayée yȩ voolı̵́ ká u̵u̵ fȩȩn moo Tayɨɨ woo né, kóó i o̧n vu̵ moo tóó né si̧', vú̵ń ho̧ mbaalı̵́ víí ka du̵u̵, kíí na' vu̵ yȩ, vú̵ń tii zó̧ó̧ voo yúú mbaalı̵́ du̵u̵ víílí.

³I mbɔ́g fó̧ó̧ moo nán u̵u̵ ho̧ bi ú sá, kɔ́ ı̵́ yúú zané ku̵u̵ təə máa vu̵ wɔgɔ, kan la' tɔ́g du̵u̵ vu̵, kan sa̧a̧m bó̧' vu̵ á̧ḿ.

⁴A̧máa zó̧ó̧ víílí i mbaa nán to̧o̧, kan zó̧ó̧ ká̧'a̧dɨ, moo hȩn woo vu̵ lı̵́n né, wu̵ hȩn gbo̧o̧ tíŋ́ Tayɨɨ woolı̵́ á̧ḿ.

⁵Wakȩ́ȩ́ zó̧ó̧ 'yɛ́lı̵́ ká tíŋ́ ku̵u̵ baa 'yɛ́ zó̧ó̧ voo Tayɨɨ woolı̵́ máa, vu̵ baa kɔ́ ı̵́ yo̧go̧ du̵u̵lı̵́ na'a; vu̵ kid wə̧ə̧ voo vu̵ tɔ́g á̧ḿ.

⁶Sára ká kid Ibrahí̧í̧ma tɔ́g ı̵́ yo̧go̧, beewu̵ “ı̵́ 'yɛ́lı̵́ míí;” 'ya̧'a̧ yɛ i kɔ́ hȩn du̵u̵ɨ, i gbɔ hȩn fíginí tóó a mban ví kɛb né tée, ví sı̵́ waa Sára woo vu̵ yu̵.

⁷Ví á̧ḿ, wayée vu̵, i mbaa kan kȩ́ȩ́ víí vu̵ tée, i taa mbaalı̵́ voo ka née né yȩ, i na' vu̵ ú̵, moo víń sú̵g nuŋ hȩn Tayɨɨ a pú̵ ví leená yȩ á̧ḿ, wu̵ vágád káákáá yȩ nɔ. I kɔ́ ı̵́ yo̧go̧, moo hȩn tóó a há' Tayɨɨ moo víí vu̵ kilí sá.

⁸Ma mí o̧d ví, moo taalı̵́ víí a dágá, zó̧ó̧ ví̧i̧ní víí a dágá, i hí̧í̧n hí̧nní dag sá̧ŋ́ŋɨ, i ká̧'á̧n zó̧ó̧, i kíń tɔ́g.

⁹I vȩ' hȩn ɓı̵́d sú̵ú̵n sá, i háń sá. A̧máa nán ka haa ví tée, i tii baggu̵ víí hȩnne, moo Tayɨɨ bee ví i bag nánán vu̵ hȩn, moo bi bag ví hȩnne á̧ḿ.

¹⁰Debtere o̧ ı̵́ yo̧go̧, o̧: “Nán ka hí̧í̧ bi mbaa mbaalı̵́ zó̧ó̧ dȩ"ȩ́, bi ho̧ zá̧ga̧ zó̧ó̧ dȩ"ȩ́ȩ á̧ḿ tée, a gbɔ moo ɓı̵́d móólȩ́ vu̵, a sóo daga vu̵ sá.

¹¹A kéé hȩn ɓı̵́d gbɔ, a kɔ́ hȩn du̵u̵ɨ. A soo mbaalı̵́ to̧o̧g, a sȩn fó̧ó̧ duu wu̵ yu̵ dágá,

¹²moo ı̵́ 'yɛ́lı̵́ 'yɛ́ nɔ́ɔ́ dɨ nán ı̵́ ku̵u̵ kɔ́ hȩn hí̧í̧lí̧ woo máa voolı̵́, kid vu̵ moo ku̵u̵ vigi máa á̧ḿ. A̧máa tiid nán ı̵́ ku̵u̵ kɔ́ hȩn ɓı̵́d máa vu̵ yu̵ pig.”

¹³Tow i pi zó̧ó̧ moo hȩn du̵u̵ kɔ́lı̵́ tée, nóo wú̵ń kɔ́d ví hȩn ɓı̵́ddá?

¹⁴Kóó i nuŋ hȩn ndɔ́gɔné moo kíí kɔ́ hȩn hí̧í̧lí̧ Tayɨɨ woo yȩ nɔ si̧', zó̧ó̧ a dȩ' ví la ú̵! I ndɔg hȩn nán ku̵u̵ baa ndɔg vu̵ máa sá, zó̧ó̧ a tó̧' ví sá á̧ḿ.

¹⁵A̧máa i na' Krístu ı̵́ 'yɛ́lı̵́ víí zó̧ó̧ víílí; nán ku̵u̵ vi ví i tú'ud bi moo víí kíí 'yɛ́ zó̧ó̧ wu̵lı̵́ yȩ nɔ tée, i tú'ud vu̵ vaŋná.

¹⁶A̧máa i kɔ́ kan zó̧ó̧ ká̧'a̧d, i na' vu̵ á̧ḿ. Hȩn ı̵́ ka du̵u̵ máa, i kɔ́ wu̵ yu̵. Tée i gaa á̧ḿ, moo nán ku̵u̵ doo ví, ku̵u̵ haa ví máa, sȩ́ḿ a kɔ́ vu̵, moo kíí mbaa du̵u̵lı̵́ na'a moo Krístu woolı̵́ yȩ nɔ.

¹⁷Tow a hí̧í̧lí̧ Tayɨɨ woo nɔ tée, du̵u̵ ú̵ kaa nuŋ ví hȩn ndɔ́gɔné moo hȩn du̵u̵ kɔ́lı̵́lı̵́ má nɔ, a̧máa moo hȩn ɓı̵́ddɨ pɛ́lı̵́.

¹⁸Krístu nɔɔ do' dágá 'nɛ́ŋ́ moo hȩn ɓı̵́d kɔ́lı̵́ nánán voo nɔ. Ká kɔ́ woo hȩn hí̧í̧lí̧ Tayɨɨ woo nɔ, ma səd nán ku̵u̵ kɔ́ hȩn Tayɨɨ ka sɛ́n né máa vu̵, moo bi pa̧ŋ ví laan Tayɨɨ woolı̵́. Nánán vu̵ dɔd fó̧ó̧ Yesu woo nɔmmé, a̧máa yigid Tayɨɨ woo duu nimmɔ nɔmmé.

¹⁹Sey woolı̵́ máa laa la pad yigid ku̵u̵ si̧'i̧d vu̵ yȩ vu̵ moo Tayɨɨ woo.

²⁰Yigid yȩ vu̵ yigid ı̵́ ku̵u̵ kin Tayɨɨ tɔ́g sey Núúhu̧ woolı̵́ né máa vu̵ yu̵; sey woo Tayɨɨ ká ma' zó̧ó̧ mbaa laa Núúhu̧ a du̵d nɛ́ŋ́ 'waa pȩ́ń. Nán waaná' ká vu̵u̵ dɔ́ nɛ́ŋ́ yȩlȩ́, vu̵ dɨ fó̧ó̧ ka'andaddú̵ aga nɔ, ma vu̵ sə́d mam yȩlȩ́.

²¹Mam yȩ ká kɔ́ ı̵́ mam Tayɨɨ woolı̵́ ka səd ví 'ya̧'a̧ yɛ wɔgɔ. Tɛn hȩn ví̧i̧g ı̵́ fó̧lȩ́ȩ né, a̧máa woo hȩn zó̧ó̧ mbɔ́ggı̵́ kan Tayɨɨ yúú nímní Yesu Krístu woo nɔmmé yȩlȩ́.

²²Yesu ɗáá dɔg be"ı̵́ sú̵'ú̵, mbaa dɨ ka' nag nán Tayɨɨ woolı̵́, waa gbaŋ yúú maleeka voolı̵́, kan nán gbo̧o̧ tóó vu̵, kan hȩn mbalı̵́ tóó vu̵ á̧ḿ.