Read Dii 1 Piɛ́r 4 Bible Online

1 Piɛ́r 4 - Dii bible

1 Piɛ́r 4

¹Krístu ka nuŋ hȩn ndɔ́gɔné fó̧ó̧ woolı̵́ yȩ, ví á̧ḿ, i nda doo, ví taa nán ka nuŋ hȩn ndɔ́gɔné fó̧ó̧ woolı̵́ yȩ, wú̵ń duu kɔ́n sı̵́ hȩn ɓı̵́d né.

²A dəŋ mbaa mbaalı̵́ ı̵́ Tayɨɨ ka hí̧í̧ máa, bá' ka kéedu̵ hágá yɛlı̵́ yɛ, moo hí̧í̧lí̧ fó̧ó̧ȩ pɛ́lı̵́.

³Ká ví kɔ́ hȩn kɔ́lı̵́ nánán gaa Tayɨɨ sá voo nɔ. Maa sú̵'ú̵; ká ví kɔ́ dȩdȩ́ȩm, kan hȩn hí̧í̧lí̧ dáń fó̧ó̧ víí, ví kíí doo, ví lá lálı̵́ vó'om, ví zɔ hȩn zɔlı̵́ vó'om, ví sú̵g kɔ́ hȩn ɓı̵́d kan yɛ́g tayɨɨ mbɔ́ggı̵́ voo vu̵.

⁴Nán gaa Tayɨɨ sá ku̵u̵ ho̧ 'ya̧'a̧ yɛ kíí sú̵g dɔ́ń kan vu̵ ya hȩn vó'om kɔ́lı̵́ ɓı̵́dná yȩlȩ́ né máa, kɔ́ vu̵ la ɓá', vu̵ haa ví.

⁵A̧máa ı̵́ ka mbaa bə́' moo moo sə̧"ȩ́ yúú nán zá̧a̧d voolı̵́ kan ı̵́ nɔm vu̵ yȩ, nán yȩ vú̵ń hí̧i̧du̵ ya̧g yúú ba'ad voo yȩlȩ́ ó̧.

⁶Moo woo nɔ nán nɔm ku̵u̵ nuŋ hȩn si̧'i̧ní fó̧ó̧ voolı̵́ kɔ́ ı̵́ nán tóó vu̵ wɔgɔ máa, vu̵ ki moo to̧o̧ 'maŋ á̧ḿ, moo yigid Tayɨɨ woo a pú̵ vu̵ vágád kɔ́ ı̵́ Tayɨɨ ka mbaa kan vágád yȩ wɔgɔ.

⁷Hȩn 'waapád zaa vú̵ń 'wáa sú̵'ú̵. Moo woo nɔ, i taa moo, i nə sá, moo i ɓá' Tayɨɨɨ.

⁸Hȩn i kɔ́ də́ń kəd máa, i hí̧í̧n ya víílí du̵u̵lı̵́ na'a ó̧, moo zó̧ó̧ nán wu̵ na'ad hȩn ɓı̵́d nánán voo ɓu̵u̵lı̵́ na'a.

⁹I fȩȩ da ví vu̵ nag idú, i dɔd vu̵ kíi víílí, i ŋguu moo yúú voolı̵́ sá á̧ḿ.

¹⁰Hȩn Tayɨɨ ka pú̵ ví kə́dkə́d leená yȩ, i kɔ́n da ví vu̵ ba'ad kannɔ kɔ́ ı̵́ nán ba'ad du̵u̵ vu̵ wɔgɔ.

¹¹Nán ka tú' moo tée, a tú' də́ń moo Tayɨɨ woo nɔ. Nán ka kɔ́ ba'ad tée, a kɔ́ kan néélȩ́ Tayɨɨ woo ka pú̵gu̵ má nɔ, moo hȩn 'waapád a kɔ́y moo ba na' ví Tayɨɨ kan yɛ́g Yesu Krístu woo wu̵lı̵́. Ba na' ví Yesu ú, hȩn mbalı̵́ woo a mbaa há̧á̧ káákáá. Aamɛ́n.

¹²Ɨ́ hí̧í̧lí̧ míí vu̵, hȩn u̵u̵ gu̵g ví wu̵lı̵́ néélȩ́ na'a máa, hȩn woo a la' ví kɛb kɔ́ ı̵́ hȩn sa̧ga̧ tóó vu̵ wɔgɔ sá!

¹³A̧máa kíí nuŋ hȩn ndɔ́gɔné Krístu woo ka' tóó yȩ, i dȩ' zó̧ó̧ víí, moo bá' gbaŋ waalı̵́ woo a vúd ya tée, víń duu dȩ' zó̧ó̧ tóó.

¹⁴Tow ku̵u̵ haa ví moo ba kíí waa duulí Krístu woo vu̵ yu̵ má nɔ tée, zó̧ó̧ víí a dȩ' la ú̵, moo yigid ı̵́ na"ȩ́, yigid Tayɨɨ woo mbaa dɨ víílí.

¹⁵Nán tóó sa̧a̧m víílí a nuŋ hȩn ndɔ́gɔné moo nɔm nɔɔné sá, tóó tée moo líw, tóó tée moo hȩn ɓı̵́d kɔ́lı̵́, tóó tée moo ka dɔd ya̧g yúú moo daga voolı̵́ má nɔ sá.

¹⁶A̧máa nán tóó a nuŋ hȩn ndɔ́gɔné moo ka kirtȩ́nne má nɔ tée, sȩ́ḿ a kɔ́gɔ sá, a̧máa a dȩn Tayɨɨ nag moo ka nuŋ yéé kirtȩ́n yȩ nɔ.

¹⁷Bá' moo sə̧"ȩ́ a dəŋ wu̵lı̵́ máa ya̧ sú̵'ú̵; wú̵ń dəŋ sə̧' zig Tayɨɨ woo wu̵ moo tíŋ́. A̧máa tow moo sə̧"ȩ́ a dəŋ kan ba víw tée, nán ı̵́ ku̵u̵ ma moo to̧o̧ 'maŋ Tayɨɨ woo fȩȩlȩ́ yȩ vú̵ń kɔ́ voo nɛ́nná?

¹⁸Debtere o̧: “Sənné nán to̧o̧ voo a təə ú̵ tée, nán ku̵u̵ duunɔ né máa vu̵, kan nán hȩn ɓı̵́d kɔ́lı̵́ vu̵ máa, vú̵ń mbaa voo nɛ́nná?”

¹⁹Moo woo nɔ nán Tayɨɨ ka hí̧í̧ u̵u̵ nuŋ hȩn ndɔ́gɔné yȩ, u̵u̵ laan tíŋ́ kan hȩn du̵u̵ woo kɔ́lı̵́, u̵u̵ 'yɛ́ zó̧ó̧ voo 'waapád ı̵́ hȩn yɨmné ka ta ya̧g buu ní yȩ woolı̵́.