Read Dii 1 Piɛ́r 5 Bible Online

1 Piɛ́r 5 - Dii bible

1 Piɛ́r 5

¹Moo woo nɔ, mí hí̧í̧ bi o̧d ı̵́ nii sú̵ggı̵́ vu̵ moo sa̧a̧m víílí. Mí ı̵́ nii sú̵ggı̵́ɨ á̧ḿ. Mí ı̵́ ya̧g du̵lı̵́ yúú hȩn ndɔ́gɔné Krístu woolı̵́ɨ á̧ḿ. Sey na"ȩ́ Tayɨɨ woo ka dɨ yaalı̵́ yȩ a yaa tée, míń nuŋ hȩn ka' ı̵́ míí wu̵lı̵́ á̧ḿ. Hȩn káń bi o̧d ví máa, wu̵ yɛ nɔ:

²I tu̵ hú' mbee Tayɨɨ woo ka gbɔd ví nagá yȩ ó̧. A̧máa i kɔ́ kɔ́ ı̵́ ku̵u̵ yú ví kɔɔgɨ zu wɔgɔ sá. I kɔ́ kan hí̧í̧lí̧ víí kɔ́ ı̵́ Tayɨɨ ka hí̧í̧ máa wɔgɔ. I kɔ́ moo bi nuŋ sɨɨde wu̵lı̵́ɨ sá, a̧máa i tú'ud vu̵ kan zó̧ó̧ víí yȩ́ńná.

³Nán ku̵u̵ pú̵ ví kan vu̵ i tu̵ vu̵ ú̵ yȩ, i mbaa gbanaa yúú voolı̵́ sá. I tú' mbaalı̵́ du̵u̵ víí tíŋ́ mbee víí voolı̵́.

⁴Sey waa tu̵ mbee gbo̧o̧ voo a gbɔ vúd ya tée, víń nuŋ hȩn sú̵ú̵lı̵́ ı̵́ ka lı̵́n né máa wu̵lı̵́. Na"ȩ́ Tayɨɨ woo máa wu̵ yȩ nɔ.

⁵Náásaa ví á̧ḿ, i kid ı̵́ nii víí vu̵ tɔ́ggú̵. Ya víí 'waapád, i nə' yúú, i kɔ́ń ba'adú̵, moo debtere o̧: “Tayɨɨ há'án nɔ́ɔ́ kan nán yúú na"ȩ́ vu̵ yu̵, a̧máa nán ku̵u̵ na'an yúú né máa, kɔ́d vu̵ yu̵ zó̧ó̧ nán.”

⁶Moo woo nɔ, i nə' yúú Tayɨɨ ı̵́ ka mba hȩn 'waapád yȩ woolı̵́ tíŋ́, moo a dii ví dɔg yúba zá̧ga̧ ka hí̧í̧ yȩlȩ́.

⁷I pid hȩn kíí gbɔ́ dam wu̵lı̵́ máa vu̵ 'waapád woolı̵́ tíŋ́, moo wu̵ tu̵ ví.

⁸I mbaa kan nɔ́ɔ́ to̧o̧ȩ, i gággú̵, moo ı̵́ maag víí Seeɗán dɨ ví gbagané kɔ́ ı̵́ kəə ka zə́' soo daa pú̵g bi ma"o̧ sə́ŋ́ŋɔ́ máa wɔgɔ.

⁹I dii néélȩ́ na'a yúú zó̧ó̧ 'yɛ́lı̵́ víílí. I ndad Seeɗán doo, moo ví gaa da ví kirtȩ́n ı̵́ ku̵u̵ fȩȩ hág 'waapád yȩ vu̵ nuŋ hȩn ndɔ́gɔné kɔ́ ı̵́ ví wɔgɔ á̧ḿ.

¹⁰Tayɨɨ kɔ́ zó̧ó̧ nán yúú hȩn 'waapáddı̵́, bee ví moo i sú̵g mbaa kan Krístu ya na"ȩ́ bii ı̵́ káákáá yȩlȩ́. A̧máa pig hȩn ndɔ́gɔné víí waaná' yȩlȩ́ yȩ, Tayɨɨ aga wú̵ńnɔ gbá̧' ví, wú̵ń nee ví, wú̵ń sȩn ví fó̧ó̧, wú̵ń mbɔ́g ví néélȩ́ na'a.

¹¹Hȩn mbalı̵́ máa woo nɔ há̧á̧ káákáá. Aamɛ́n.

¹²Ɗerwəl káń ba'ad ví waa kpə́ŋ́ yɛ, Silád wu̵ maan ba'ad woo. Mí ho̧go̧ máa, fó̧ó̧ woo yȩ kirtȩ́n ı̵́ ka ta ya̧g buu ní má nɔ. Mí hí̧í̧ bi zigid ví zó̧ó̧, bi o̧d ví moo kíí duu yȩ, moo zó̧ó̧ nán Tayɨɨ woo nɔ gínú. I nda doo wu̵lı̵́ néélȩ́ na'a!

¹³Nán sú̵ggı̵́ Tayɨɨ ka yee vu̵ kɔ́ ı̵́ ví wɔgɔ, kaa Baabilónné yȩ, vu̵ vá' ví wu̵lı̵́. Waa míí Márkus vá' ví wu̵lı̵́ á̧ḿ.

¹⁴I vá'án ya víílí kɔ́ ı̵́ dag sá̧ŋ́ vu̵ wɔgɔ, i ka pí̧í̧n ya zó̧ó̧lȩ́ kan zó̧ó̧ nánne. Nán Krístu woo ví 'waapád, Tayɨɨ a 'yɛ́ ví i mbaa ká̧'a̧dɨ.