Read Dii 2 Piɛ́r 1 Bible Online

2 Piɛ́r 1 - Dii bible

2 Piɛ́r 1

¹Mí Simɔ́ŋ Piɛ́rru̵, nán ba'ad kan waa ba'ad Yesu Krístu woo nɔ. Mí ba'ad ví ɗerwəl yɛ, nán ı̵́ kíí nuŋ zó̧ó̧ 'yɛ́lı̵́ du̵u̵ kan nag Tayɨɨ woo, kan ı̵́ sənné baa ví Yesu Krístu woo yȩ víw. Tayɨɨ kɔ́ hȩn yȩ́ń, ma ví nuŋ zó̧ó̧ 'yɛ́lı̵́ yȩ man kan ı̵́ vóó á̧ḿ.

²Yúú gaalı̵́ kíí gaa Tayɨɨ kan ı̵́ 'yɛ́lı̵́ baa ví Yesu yȩ, Tayɨɨ a kɔ́d ví zó̧ó̧ nán ɓu̵u̵lı̵́ na'a, a 'yɛ́ ví i mbaa ká̧'a̧dɨ.

³Tayɨɨ mbaa na"ȩ́ na'a, wu̵ kɔ́ hȩn du̵u̵ á̧ḿ. Bee ba ví, aa 'yɛ́ ví zó̧ó̧ baa ví biilí, ma pú̵ ba ví vágád káákáá kan zó̧ó̧ 'yɛ́lı̵́ á̧ḿ. Aga kɔ́ hȩn yȩ vu̵ 'waapád kan néélȩ́ dáń woo nɔ.

⁴Tayɨɨ tad ba ví ya̧g ba bíń kɔ́ hȩn yȩ vu̵ ı̵́ yo̧go̧, ba bíń buun ya̧g talı̵́ bii ní sá̧ḿ, moo i sɔ́d hȩn hí̧í̧lí̧ ı̵́ hȩn lı̵́nné voo hágá yɛlı̵́ yȩlȩ́, há̧á̧ i mbaa mbaalı̵́ ı̵́ bii á̧ḿ.

⁵Moo woo nɔ, kíí fȩȩ moo woo, kíí 'yɛ́ zó̧ó̧ wu̵lı̵́ yȩ, i sȩn fó̧ó̧ mbaa du̵u̵lı̵́ na'a; tée hȩn gaalı̵́ víí a há'ay á̧ḿ.

⁶I sȩn fó̧ó̧ zi̧i̧ zó̧ó̧, i ma' zó̧ó̧, i duu Tayɨɨ du̵u̵lı̵́ na'a,

⁷i hí̧í̧ da ví kirtȩ́n vu̵, i kɔ́ zó̧ó̧ nán á̧ḿ.

⁸Tow i kɔ́ hȩn yȩ vu̵ mbaan wu̵lı̵́ ɓu̵u̵lı̵́ na'a tée, tú' ba víńnɔ kɔ́d Yesu Krístu ı̵́ 'yɛ́lı̵́ baa ví ba'ad yȩ́ńná, ba víńnɔ gaa Yesu laa tíŋ́ tíŋ́.

⁹A̧máa nán a kɔ́n hȩn yȩ vu̵ né tée, man kan nán dii nɔ́ɔ́e. Duu gaan sı̵́ hȩn ɓı̵́d bii ká tíŋ́ máa, vu̵n ná'an sú̵'ú̵ né.

¹⁰Moo woo nɔ, dan kirtȩ́n vu̵, Tayɨɨ ka yee bee ví yȩ, i sȩn fó̧ó̧ za̧a̧ná, i 'yɛ́ zó̧ó̧ woolı̵́ kəd, moo i baa kɔ́ hȩn yȩ tée, hȩn ɓı̵́d wú̵ń ba̧a̧n ví ní sá̧ḿ.

¹¹Tée Tayɨɨ wú̵ń gbɔd ví hi̧naa neelȩ́ na'a, moo dɔ́lı̵́ la ya gbaŋ waalı̵́ káákáá Yesu Krístu woo yȩlȩ́. Wu̵ ı̵́ 'yɛ́lı̵́ baa ví, kan ı̵́ sənné baa ví á̧ḿ.

¹²Moo woo nɔ, káń baa ta'ad hȩn yȩ vu̵ o̧d ví bə́' bə́' yɛ nɔ, kóó kíí gaa moo yȩ́ń, kíí nda doo wu̵lı̵́ 'ya̧'a̧ yɛ nɔ si̧'.

¹³Mí taa bi kɔ́d ví hȩn yagalı̵́, bi baa ta'ad moo yɛ o̧d ví, bá' káń nɔɔ ná né yɛlı̵́,

¹⁴moo mí gaa zaa tée, míń lúú fó̧ó̧ nɔm yɛ gbɔ sú̵'ú̵. Ɨ́ 'yɛ́lı̵́ baa ví Yesu Krístu tú'un hȩn yɛ sú̵'ú̵.

¹⁵Míń kɔ́ hȩn ı̵́ a̧n kɔ́ máa 'waapád, moo bi tú'ud ví hȩn i baa ta'ad mban moo wu̵lı̵́ pig nɔm míílí̧ má nɔ.

¹⁶Yúú néélȩ́ ı̵́ 'yɛ́lı̵́ baa ví Yesu Krístu woo kan yaalı̵́ woo yɛlı̵́ máa, vɔ́ tú'unɔ víílí kan moo pa'ané vbád ı̵́ kɛb tóó kóó yɨm té' né má nɔ. Aga ká vɔ́ ho̧ vóó na"ȩ́ woo kan nɔ́ɔ́ vóó nɔ.

¹⁷Yesu ká nuŋ dəmné kan na"ȩ́ Ba'á Tayɨɨ woolı̵́. Ɨ́ ka mba hȩn 'waapád yȩ, yɛ́g woo kiy zu̵u̵ be"ı̵́, o̧: “Ɨ́ yɛ Waa míí nu; mí hí̧í̧wo̧ ó̧. Zó̧ó̧ míí dȩ' yúú woolı̵́.”

¹⁸Ká vɔ́ ki yɛ́g ka zu̵u̵ be"ı̵́ yȩ kan tɔ́g vóó nɔ. Sey woo vɔ́ sú̵g mbaa kannɔ dɨ gu̵u̵ Tayɨɨ woolı̵́.

¹⁹Ba dɨ ví kan ya̧g ba'ad yȩ́ń dȩ"ȩ́ na'a, ı̵́ anábi ku̵u̵ tú' má nɔ. I bi tɔ́g du̵u̵ na'a, moo moo woo mbaa kɔ́ ı̵́ lám ka tú ya dimmí máa wɔgɔ, há̧á̧ ya̧g ka̧'a̧m a tú wu̵lı̵́, há̧á̧ zu̵u̵ yɔ́g a tú zó̧ó̧ víílí wu̵lı̵́ á̧ḿ.

²⁰Də́ń kəd máa, i gaa du̵u̵lı̵́ na'a, nán tóó ban tú'un moo anábi voo debterelı̵́ yȩ kan néélȩ́ dáń woo né,

²¹moo moo anábi tóó yaan kan hí̧í̧lí̧ nánán tóó woo nɔ né sá̧ḿ, a̧máa yigid Tayɨɨ woo wu̵ tú'ud nán vu̵, ma vu̵ fȩȩ moo Tayɨɨ woo moo.