Read Dii 2 Piɛ́r 2 Bible Online

2 Piɛ́r 2 - Dii bible

2 Piɛ́r 2

¹Anábi vbád ká vu̵ vúd zig yȩlȩ́. Akaw vbád vú̵ń dɨ vúnní sa̧a̧m víílí á̧ḿ. Vú̵ń tú'ud nán vu̵ moo vbád a tud vu̵ yȩlȩ́. Vú̵ń gbɔ daa gbanaa voo ka səd vu̵ yȩ, tée hȩn nag tunní wú̵ń yaa voolı̵́ há̧ná.

²Nán ɓu̵u̵lı̵́ na'a vú̵ń kɔ́ dȩdȩ́ȩm. Nán tóó vú̵ń haa hi̧naa moo yȩ́ń moo voo.

³Akaw vbád yȩ vú̵ń naa ví kan moo vbád voo vu̵ moo sɨɨde hí̧í̧lí̧ voo yȩ nɔ. A̧máa ı̵́ moo sə̧"ȩ́ voo ka nən né yȩ, mbaa dɨ woo bə́' gbó̧ŋ́ na'a, moo bi tud vu̵ ú̵.

⁴Maleeka ı̵́ kú̵u̵ kɔ́ hȩn ɓı̵́d máa, Tayɨɨ gbɔn vu̵ té' né, a̧máa tú̵' 'yɛ́ vu̵ ya dimmí, dəə gbo̧o̧lȩ́, ga' vu̵ 'yɛ́ wu̵lı̵́ laan zá̧ga̧ moo sə̧"ȩ́ȩ.

⁵Tayɨɨ gbɔn hág ı̵́ tíŋ́ máa té' né á̧ḿ, a̧máa kɔ́ mam gbo̧o̧ naŋ, hi̧' hág nán ku̵u̵ duun Tayɨɨ né máa voolı̵́, a̧máa səd Núúhu̧ ka pa moo yȩ́ń Tayɨɨ woo máa, səddu̵ kan nán tóó vu̵ á̧ḿ gúndɛm.

⁶Tayɨɨ ká tud kaa Súúduma kan Gomór, a̧n vu̵ kan vee, moo nán disa̧n u̵u̵ ho̧ hȩn ba ii dɨ vu̵ kɔ́lı̵́ má nɔ.

⁷Səd nán to̧o̧ Lód á̧ḿ, ká vi̧i̧ zó̧ó̧ yúú mbaalı̵́ nán dȩdȩ́ȩm ɓı̵́d yȩ voolı̵́ á̧ḿ,

⁸moo Lód ká kɔ́ hȩn hí̧í̧lí̧ Tayɨɨ woo nɔ, ká mbaa voolı̵́ sa̧a̧mé, ká baa ho̧ ba'ad ɓı̵́d voo yȩ, hȩn ka baa ki bá' 'waapád yȩ, zó̧ó̧ to̧o̧ woo yȩ tó̧"ó̧.

⁹Ɨ́ 'yɛ́lı̵́ gaa woo hȩn a kɔ́, a səd nán ı̵́ ku̵u̵ duuwu̵ ma hȩn zo"ı̵́ ka duu vu̵ máa vu̵ ú̵. Gaa hȩn a kɔ́ kan nán ɓı̵́d vu̵ á̧ḿ, ga' 'yɛ́ vu̵ laan zá̧ga̧ moo sə̧"ȩ́ȩ.

¹⁰Wú̵ń si̧'i̧d də́ń nán ı̵́ ku̵u̵ duu də́ń hȩn hí̧í̧lí̧ ɓı̵́d kan hȩn sí̧i̧d kɔ́lı̵́, ku̵u̵ ɓéé gbaŋ waalı̵́ Tayɨɨ woo máa vu̵ yu̵. Akaw vbád yȩ vu̵ nán hȩn ɓéélı̵́ vu̵ yu̵, vu̵ nán yúú na"ȩ́ vu̵ yu̵, vu̵ ndɔgɔn maleeka gbo̧o̧ vu̵ haalı̵́ né á̧ḿ.

¹¹Maleeka Tayɨɨ woo ku̵u̵ mba nán vbád yȩ vu̵ kan néélȩ́ yȩ si̧', vu̵ pa̧ga̧n dom maleeka gbo̧o̧ yȩ voo laan tíŋ́ ı̵́ 'yɛ́lı̵́ woolı̵́ kan du̵g né.

¹²A̧máa nán yȩ vu̵ kɔ́ hȩn man kan pú̵g hó̧g ku̵u̵ ma' vu̵, ku̵u̵ nɔɔ vu̵ má nɔ. Vu̵ taan moo né, vu̵ haa hȩn ı̵́ ku̵u̵ gaan vu̵ né máa vu̵, vu̵ lı̵́d sú̵'ú̵, vú̵ń tú á̧ḿ.

¹³Vú̵ń nuŋ hȩn sú̵ú̵lı̵́ yúú ba'ad kə̧ə̧g voo yȩlȩ́. Hȩn ku̵u̵ hí̧í̧ na'a máa, fóólı̵́ kɔ́lı̵́ vid kan zá̧ga̧ á̧ḿ. Vu̵ lı̵́d ví yɛ́g, vu̵ kɔ́d ví hȩn sȩ́ḿ kan hȩn sóoné voo yȩ. Vu̵ lá hȩn vó'om ya hȩn lálı̵́ víí vu̵lı̵́.

¹⁴Vu̵ taa ɓáa kɔ́lı̵́ mbaan də́ń wu̵ yu̵. Hȩn ɓı̵́d voo maan vu̵ né sá̧ḿ. Vu̵ zo' nán zó̧ó̧ 'yɛ́lı̵́ waaná' yȩ vu̵ dɔd hȩn ɓı̵́ddı̵́. Vu̵ kɔ́ ba'ad kan zó̧ó̧ voo 'waapád moo bi nuŋ sɨɨde ha'an wu̵lı̵́. Tayɨɨ ga'ad vu̵ nag sú̵'ú̵.

¹⁵Vu̵ kéé hi̧naa moo yȩ́ń gbɔ, vu̵ bá̧a̧ sú̵'ú̵ á̧ḿ. Vu̵ duu hi̧naa Balám Bosór waa woo ka hí̧í̧ hȩn kə̧ə̧g kɔ́lı̵́, moo sɨɨde nuní yȩ á̧ḿ.

¹⁶A̧máa Balám nuŋ hȩn séené moo ki tɔ́g sá woo yȩ nɔ; wamnde na'a ka mbaa kpo̧o̧gná yȩ, bé'edu̵ moo moolȩ́ kan yɛ́g nánán, sə̧' ba'ad ya̧ŋ anábi woo yȩ gbɔ.

¹⁷Nán yȩ vu̵ mbaa kɔ́ ı̵́ mam tóó ka 'wɔ́d máa wɔgɔ. Vu̵ mbaa kɔ́ ı̵́ sápéém ka gaŋ mam hi̧i̧g laan máa wɔgɔ á̧ḿ. Tayɨɨ 'yɛ́d vu̵ ya mbaalı̵́ voo dɨ ya dim tóó ka sa̧' mbaa kpo̧ló̧g máalȩ́.

¹⁸Vu̵ pa moo ya̧ŋ vu̵, vu̵ na' yúú wu̵lı̵́. Vu̵ kɔ́ hȩn hí̧í̧lí̧ fó̧ó̧ kan lo'om, moo bi zo' nán ı̵́ ku̵u̵ há̧á̧ sə́dda sa̧a̧m nán bá̧a̧né voolı̵́ yȩ vu̵ yu̵.

¹⁹Nán vbád yȩ vu̵ tad vu̵ ya̧g, hȩn tóó ban buun vu̵ né, a̧máa aga vu̵ mbaa gba'a ı̵́ hȩn tunní voo, moo kóó nɔ́nná mbaad də́ń hȩn buulí woo wu̵ gba'a.

²⁰Nán vu̵ sɔ́d mbaalı̵́ ɓı̵́d nán hágá yɛ voolı̵́, moo ku̵u̵ gaa ı̵́ 'yɛ́lı̵́ baa ví Yesu Krístu ka səd ba ví yɛ má nɔ. Ma u̵u̵ duu gbɔ fó̧ó̧ voo hȩn tóó u̵u̵ mba vu̵ tée, mbaalı̵́ sí̧'í̧d voo wú̵ń lı̵́n mba ı̵́ tíŋ́ máa á̧ḿ.

²¹Nán yȩ ku̵u̵ gaa hi̧naa to̧nné kan Tayɨɨ ma, ku̵u̵ kéé moo Tayɨɨ woo ku̵u̵ tú'ud vu̵ yȩ gbɔ máa, du̵u̵d vu̵ ka vu̵n gaan hi̧naa woo né má nɔ.

²²Hȩn yȩ kɔ́ vu̵ kɔ́ ı̵́ gɛŋ zílí yȩ́ń tóó ka o̧ máa wɔgɔ, o̧: “Ya̧'a̧d ka gbú'úd tée, duu lá;” tóó o̧ á̧ḿ, o̧: “Ŋgurya ka woo mam tée, duu vȩ́' la gbɔ́d bəd.”