Read Dii 2 Piɛ́r 3 Bible Online

2 Piɛ́r 3 - Dii bible

2 Piɛ́r 3

¹Ɨ́ hí̧í̧lí̧ míí vu̵, ı̵́ yɛ ɗerwəl ı̵́ idú woo wu̵ káń bíńda ví yȩ nɔ. Ya voo idú á̧ḿ máa, mí hí̧í̧ bi ta'ad o̧d ví, i taa moo zó̧ó̧ víílí du̵u̵lı̵́ na'a.

²I taa víí hȩn anábi Tayɨɨ woo voo kú̵u̵ o̧ yȩ, i taa kan dooká ı̵́ 'yɛ́lı̵́ baa ví kan ı̵́ sənné baa ví woo vu̵, waa ba'ad Yesu woo kú̵u̵ tú'ud ví yȩ nɔ.

³I dəŋ gaa ú̵, zá̧ga̧ sí̧'í̧d woo u̵u̵ yaa tée, nán ba̧a̧m kɔ́lı̵́ vú̵ń dƗ yaalı̵́ɨ. Vú̵ń kɔ́ də́ń hȩn hí̧í̧lí̧ voo nɔ.

⁴Vú̵ń o̧: “Yesu ta ya̧g ba bíń fíí ya dɨlı̵́ náa? Máa dɨ tée? A ba ví yée ká vu̵ nɔɔ ya sı̵́ káákáá pi nu, a̧máa hȩn 'waapád vu̵ dɨ mbaalı̵́ nag dágá yȩ nɔ kɔ́ ı̵́ Tayɨɨ ka yɨb vu̵ máa wɔgɔ.”

⁵Hȩn nán yȩ ku̵u̵ sɛ́n taalı̵́ né máa, wu̵ yɛ nɔ, Tayɨɨ ká ba moo moo ma be' ba yı̵́b, hág ba hu vúd dɔg mammé, hág ba yı̵́b kan mamme,

⁶ma Tayɨɨ ba duu kɔ́ mam dágá yȩ ba naŋ há̧á̧ zu̵u̵ hi̧' hág, ba tud hág yɛ á̧ḿ.

⁷A̧máa be' kan hág 'ya̧'a̧ yɛ, moo Tayɨɨ woo dágá yȩ wu̵ 'yɛ́ vu̵, moo bi a̧n vu̵ ú̵, a̧máa zá̧ga̧ moo sə̧"ȩ́lȩ́ nán ku̵u̵ duun Tayɨɨ né máa u̵u̵ tú wu̵lı̵́ yȩ, a ya̧ pȩ́ń.

⁸A̧máa ı̵́ hí̧í̧lí̧ míí vu̵, tée i záń moo ı̵́ yɛ sá, ı̵́ 'yɛ́lı̵́ woolı̵́ máa, zá̧ga̧ dágá mbaa kɔ́ ı̵́ ve' uzinɛɛre wɔgɔ, ve' uzinɛɛre mbaa kɔ́ ı̵́ zá̧ga̧ dágá wɔgɔ á̧ḿ.

⁹Ɨ́ 'yɛ́lı̵́ wú̵ń duu di̧'i̧n daa né, wú̵ń kɔ́ hȩn ka ta ya̧g wu̵lı̵́ yȩ si̧' la gbug pȩ́ń. Nán tóó vu̵ doowu̵, moo ȩn ba yaan há̧ná nélá? A̧máa Tayɨɨ ma' woo zó̧ó̧ yúú víílí, hí̧í̧ nán tóó a ti sá, a̧máa moo nán 'waapád u̵u̵ tii zó̧ó̧ gbɔ hȩn ɓı̵́d voo vu̵ pȩ́ń.

¹⁰A̧máa zá̧ga̧ ı̵́ 'yɛ́lı̵́ woo wú̵ń yaa dɨlı̵́ kɔ́ ı̵́ líw wɔgɔ. Zá̧ga̧ woo be' wú̵ń túḿ wu̵lı̵́ pilib. Hȩn 'waapád be"ı̵́ vú̵ń a̧n tú wu̵lı̵́. Hág kan ba'ad woo ku̵u̵ kɔ́ wu̵lı̵́ máa, vú̵ń duu yú̵gu̵n sı̵́ né.

¹¹Hȩn yȩ vú̵ń yı̵́ı̵́b 'waa ı̵́ yo̧go̧. Moo woo nɔ, yúú mbaalı̵́ víílí i baa kɔ́ də́ń hȩn Tayɨɨ ka hí̧í̧ má nɔ, i dugu kəd.

¹²I laa zá̧ga̧ Tayɨɨ woo, i kɔ́ ba'ad moo a yaa há̧ná. Zá̧ga̧ woo be' wú̵ń má' vee, wú̵ń tú, hȩn 'waapád be"ı̵́ vú̵ń yı̵́ı̵́b wu̵lı̵́ á̧ḿ.

¹³A̧máa hȩn kaa laa ví baa máa, wu̵ be' 'maŋ kan hág 'maŋŋɨ, kɔ́ ı̵́ Tayɨɨ ka ta ya̧g wu̵lı̵́ máa wɔgɔ, ya hȩn a mbaa wu̵lı̵́ kɔ́ ı̵́ Tayɨɨ ka hí̧í̧ wɔgɔ má nɔ.

¹⁴Moo woo nɔ, ı̵́ hí̧í̧lí̧ míí vu̵, kaa dɨ ví hȩn yȩ vu̵ laalı̵́ yɛ, i pi zó̧ó̧, i mbaa dȩ"ȩ́ na'a, hȩn ɓı̵́d tóó a sá, i mbaa nán to̧o̧g vu̵ yu̵.

¹⁵I taa la ú̵; zó̧ó̧ ma"ȩ́ ı̵́ 'yɛ́lı̵́ baa ví woo wu̵ pú̵ ví sey moo i sə́d wu̵lı̵́ kɔ́ ı̵́ nán baa ví Pól, kaa hí̧í̧wo̧ ví na'a yȩ, ká bíńda o̧d ví yȩ wɔgɔ á̧ḿ. Tayɨɨ wu̵ pú̵gu̵ hȩn gaalı̵́ yȩ.

¹⁶Hȩn Pól ka bíńda ɗerwəl woo vu̵lı̵́ 'waapád, ya ka moo moo yúú hȩn yȩ vu̵lı̵́ máa wu̵ yȩ nɔ. Kaa záŋ́ga ví tée ka' tóó vu̵ təə kilí á̧ḿ, a̧máa nán ı̵́ ku̵u̵ gaan hȩn né, ku̵u̵ néen zó̧ó̧ 'yɛ́lı̵́ voolı̵́ né á̧ḿ máa, vu̵ tii moo woo vu̵ tú' kə́d kɔ́ ı̵́ ku̵u̵ kɔ́ kan debtere tóó vu̵ wɔgɔ á̧ḿ, ma vú̵ń ti.

¹⁷Ɨ́ hí̧í̧lí̧ míí vu̵, káń o̧d ví sı̵́ moo yɛ ha̧ddú̵ máa, i gággú̵, moo nán ɓı̵́d yȩ ka vu̵n ba̧a̧ ví ú. I gbɔ mbaalı̵́ du̵u̵ víí yȩ sá.

¹⁸A̧máa kíí gaa ı̵́ 'yɛ́lı̵́ baa ví Yesu Krístu ka səd ba ví, kíí mbaa zó̧ó̧ nán woolı̵́ yȩ, i nuŋ néélȩ́ tóó wu̵lı̵́ laan tíŋ́ tíŋ́ á̧ḿ. Ba na"o̧ ví 'ya̧'a̧ yɛ há̧á̧ káákáá. Aamɛ́n.