Read Dii 1 YOOHÁ̧NA 1 Bible Online

1 YOOHÁ̧NA 1 - Dii bible

1 YOOHÁ̧NA 1

¹Vɔ́ bíńda ví ɗerwəl yɛ yúú Moo ı̵́ ka pú̵ vágád máa woolı̵́. Moo yɛ ká mbaa tíŋ́ pȩ́ń, hȩn 'waapád yı̵́b. Vɔ́ ki moo woo kan tɔ́g vóó, vɔ́ ho̧go̧ kan nɔ́ɔ́ vóó, vɔ́ tə́ggu̵, vɔ́ za"u̵ kan nag vóó á̧ḿ.

²Sey ı̵́ vágád pú̵lı̵́ yȩ ka gbɔ vúd máa, vɔ́ ho̧go̧ ó̧, vɔ́ du̵ddu̵ ya̧g, vɔ́ pá'ad ví moo vágád ı̵́ káákáá ká ka mbaa dáŋ́ Ba'á woolı̵́ yȩ, Tayɨɨ ká vud tú'ud vɔ́ kannɔ á̧ḿ.

³Hȩn kóó ho̧, kóó ki máa, vɔ́ pá'ad ví wu̵ yu̵ á̧ḿ, moo i sú̵gú̵n kan vɔ́, kɔ́ ı̵́ kóó sú̵gú̵n kan Ba'á kan Waa woo Yesu Krístu yɛ wɔgɔ á̧ḿ.

⁴Vɔ́ bíńda ví hȩn yɛ moo zó̧ó̧ vóó a dȩ' sí̧' la gbug.

⁵Ya̧g ba'ad kóó ki yúú Yesu Krístu woolı̵́ máa, vɔ́ o̧d ví wu̵ yu̵ yɛ nɔ: Tayɨɨ máa, wu̵ túlí, ya dim tóó woolı̵́ waaná' aga pɛ́lı̵́.

⁶Tow aa o̧ ví ban sú̵gú̵n ví kan wu̵ yu̵, ma aa baa kɔ́ ví hȩn dim tée, ba kɔ́ ví vbáddɨ, ba kɔ́n ví hȩn yȩ́ń né.

⁷A̧máa tow aa kɔ́ ví ba'ad túlí na'a kɔ́ ı̵́ Tayɨɨ ka mbaa túlíná yȩ wɔgɔ tée, ba sú̵gú̵n ví sú̵'ú̵; mɛm Yesu Waa Tayɨɨ woo wu̵ baa tɛ hȩn ɓı̵́d kɔ́lı̵́ baa ví 'waapád.

⁸A̧máa tow aa o̧ ví bin kɔ́n hȩn ɓı̵́d né tée, ba sóó ví fó̧ó̧ baa ví mooɨ; ba ví kan moo yȩ́ń pɛ́lı̵́ á̧ḿ.

⁹Tow aa vud ví hȩn ɓı̵́d kɔ́lı̵́ baa ví tú' tée, Tayɨɨ wú̵ń na'ad hȩn kə̧ə̧g kɔ́lı̵́ baa ví vu̵ 'waapád gbɔ la, moo Tayɨɨ ta ya̧g tée, buu ní, baa kɔ́ hȩn ka o̧ máa á̧ḿ.

¹⁰Tow aa o̧ ví ká ba bin kɔ́n hȩn ɓı̵́d né tée, ba 'yɛ́ ví Tayɨɨ ı̵́ vbáddɨ; moo Tayɨɨ woo zó̧ó̧ baa vílí pɛ́lı̵́.