Read Dii 1 YOOHÁ̧NA 2 Bible Online

1 YOOHÁ̧NA 2 - Dii bible

1 YOOHÁ̧NA 2

¹Waa míí vu̵, mí bíńda ví hȩn yɛ, moo i kɔ́ hȩn ɓı̵́d sá. A̧máa nán tóó a kɔ́ hȩn ɓı̵́d tée, ba dɨ ví kan ı̵́ sɨɨlı̵́ dáŋ́ Ba'á Tayɨɨ woolı̵́, wu̵ Yesu Krístu wu̵, wu̵ ı̵́ hȩn hí̧í̧lí̧ Tayɨɨ woo kɔ́lı̵́.

²Pú̵ fó̧ó̧ woo, moo Tayɨɨ a kéé hȩn ɓı̵́d baa ví gbɔ ú, a̧máa moo baa ví nu dágá pɛ́lı̵́, a̧máa moo nán voo 'waapád.

³Tow aa duu ví dooká woo vu̵ tée, báń gaa ví ban gaa ví Tayɨɨ sú̵'ú̵ á̧ḿ.

⁴Tow nán tóó a o̧: “Mí gaa Tayɨɨ ú̵,” a̧máa a duun dooká woo vu̵ né tée, nán vbáddɨ, kan moo yȩ́ń pɛ́lı̵́ á̧ḿ.

⁵A̧máa nán ı̵́ ka duu moo woo máa, hí̧í̧ Tayɨɨ sí̧' la sı̵́ woo gbuggú. Hȩn aa gaa ví ban sú̵gú̵n ví dɨ woolı̵́ máa, wu̵ yȩ nɔ;

⁶nán ka o̧: “Mí sú̵gú̵n kan wu̵ yu̵” tée, a baa kɔ́ ba'ad kɔ́ ı̵́ Yesu ká baa kɔ́ máa wɔgɔ.

⁷Ɨ́ hí̧í̧lí̧ míí vu̵, mí bíńda ví dooká 'maŋŋɨ né, a̧máa dooká see ká ví nuŋ sey dəné woolı̵́ pee nɔ. Dooká see yȩ, wu̵ moo ká kíí ki pee nɔ.

⁸Kóó ı̵́ yo̧go̧ si̧', mí bíńda ví dooká yɛ 'maŋŋɨ á̧ḿ, yȩ́ń woo dəŋ dɨ Krístu woolı̵́, ma ví duu á̧ḿ. Moo dim lúú sú̵'ú̵, túlí yȩ́ń wu̵ tú.

⁹Nán ka o̧ ba bin mbaa dɨ ya túlílí, ma ka duu máń daga kirtȩ́n tóó tée, dɨ lá ya dimmí.

¹⁰Nán ı̵́ ka hí̧í̧ daga kirtȩ́n tée, kɔ́ ba'ad woo túlí na'a. Hȩn a há' nán tóó Tayɨɨ duulí máa, woolı̵́ pɛ́lı̵́.

¹¹A̧máa nán ı̵́ ka máń daga kirtȩ́n tóó tée, kɔ́ ba'ad woo dɨ ya dimmí; 'yȩm dɨ dimmí á̧ḿ, a̧máa gaan ya a dɨn laalı̵́ wu̵lı̵́ yȩ né, moo dim tiiwu̵ sı̵́ yə̧mmɔ́.

¹²Mí bíńda víw moo yɛ nɔ, waa míí vu̵, moo Tayɨɨ kéé hȩn ɓı̵́d víí vu̵ gbɔ, moo Krístu woo nɔ.

¹³Mí bíńda víw moo yɛ nɔ, ba'á vu̵, moo ví gaa ı̵́ ka mbaa diga ya dəné woolı̵́ máa ó̧. Mí bíńda víw moo yɛ nɔ, náásaa vu̵, moo ví mba gbaŋ hȩn ɓı̵́d sú̵'ú̵.

¹⁴Mí bíńda víw moo yɛ nɔ, náásá̧ŋ́ waa vu̵, moo ví gaa Ba'á Tayɨɨ ú̵. Mí bíńda víw moo yɛ nɔ, ba'á vu̵, moo ví gaa ı̵́ ka mbaa diga ya dəné woolı̵́ máa ó̧. Mí bíńda víw, náásaa vu̵, moo ví néé víí sú̵'ú̵; moo Tayɨɨ woo mbaa dɨ víílí, ma ví mba gbaŋ hȩn ɓı̵́d sú̵'ú̵.

¹⁵I soo hȩn hágá yɛ vu̵ sá, kóó hȩn nánán ku̵u̵ hí̧í̧ wu̵lı̵́ máa á̧ḿ. Tow nán tóó a hí̧í̧ hȩn hágá yɛ vu̵ tée, duu hí̧i̧n sı̵́ Ba'á Tayɨɨ né.

¹⁶Hȩn hí̧í̧lí̧ nán voo máa, wu̵ hȩn ɓı̵́d ı̵́ ka to̧o̧d fó̧ó̧ má nɔ, kan hȩn hı̵́ı̵́lı̵́, kan hȩn 'waapád nán ku̵u̵ na' yúú voo yúú voolı̵́ máa á̧ḿ. Hȩn yȩ vu̵ pád, vu̵ yaan Tayɨɨ woolı̵́ né, a̧máa vu̵ yaa dɨ nánán voolı̵́.

¹⁷Hȩn hágá yɛ vu̵ dɨ 'wáanée, kan hȩn hí̧í̧lí̧ nán voo yȩ á̧ḿ. A̧máa nán ı̵́ ka kɔ́ hȩn hí̧í̧lí̧ Tayɨɨ woo máa, wú̵ń mbaa há̧á̧ káákáá.

¹⁸Waa míí vu̵, hág 'wáané dɨ bə́'. Ká ví ki vu̵ o̧ ı̵́ maag Krístu woo ban yaa dɨlı̵́, a̧máa 'ya̧'a̧ yɛ ı̵́ maag Krístu woo vu̵ ɓu̵u̵lı̵́ na'a, vu̵ gbɔ vúd sú̵'ú̵. Moo woo nɔ ba gaa ví hág 'wáané dɨ sı̵́ bə́'.

¹⁹Nán yȩ ká vu̵ dɨ baa vílí sa̧a̧mé, a̧máa vu̵ lúú gbɔ ba ví, moo ká vu̵ nán baa ví yȩ́ńná pɛ́lı̵́. Ká ka vu̵n nán baa ví vu̵ yu̵ tée, ka vu̵n mbaa kan ba ví. A̧máa vu̵ kéé gbɔ ba ví sú̵'ú̵, moo ba ho̧ gaa ví la á̧ḿ, nán ku̵u̵ lúú gbɔ ba ví 'waapád yȩ, vu̵ nán baa ví vu̵ pɛ́lı̵́.

²⁰Ɨ́ víí máa, ví nuŋ yigid Tayɨɨ woo sú̵'ú̵, máa ví gaa moo yȩ́ń ya víí 'waapád sú̵'ú̵.

²¹Mí bíńda ví moo yɛ, moo ba vín gaan moo yȩ́ń né má nɔ pɛ́lı̵́, a̧máa moo ví gaa sú̵'ú̵; ví gaa moo vbád tóó ba vún moo yȩ́ń woolı̵́ né.

²²Nóo kɔ́ vbáddá? Wu̵ nán ı̵́ ka o̧ Yesu ba Krístu pɛ́lı̵́ má nɔ. Nán yȩ ı̵́ maag Krístu woo nɔ, su̵u̵ Ba'á Tayɨɨ kan Waa Tayɨɨ woo á̧ḿ.

²³Nán ka su̵u̵ Waa Tayɨɨ woo tée, ma Ba'á Tayɨɨ á̧ḿ. Nán ka du̵d Waa Tayɨɨ woo ya̧g la zo"ı̵́ tée, mbaa kan Ba'á Tayɨɨ á̧ḿ.

²⁴I tu̵ ya̧g ba'ad ká kíí dəŋ ki sey dəné woolı̵́ zó̧ó̧ víílí yȩ. Tow hȩn kíí dəŋ ki sey dəné woolı̵́ yȩ, a mbaa zó̧ó̧ víílí tée, víń sú̵gú̵n kan Waa Tayɨɨ woo, kan Ba'á Tayɨɨ á̧ḿ.

²⁵Hȩn Krístu ka ta ya̧g wu̵lı̵́, bi pú̵ ba ví ú máa, wu̵ vágád káákááɨ.

²⁶Mí bíńda ví hȩn yȩ yúú nán ku̵u̵ dɨ ví zo"ı̵́ yȩ voolı̵́.

²⁷Ɨ́ víí máa, Yesu pú̵ ví yigid woo. Maa nán tóó ba duu tú'un ví sı̵́ hȩn né, moo yigid woo wu̵ dɨd ví hȩn tú"í 'waapád. Hȩn ka tú'ud ví yȩ, moo yȩ́ńne. Vbáddɨ pɛ́lı̵́. Moo woo nɔ, i sú̵gú̵n kan Krístu kɔ́ ı̵́ ka tú'ud ví wɔgɔ.

²⁸Ee, waa míí vu̵, i sú̵gú̵n kan Krístu, moo sey a yaa tée, dú̵ú̵ a kɔ́ ba ví sá; sȩ́ḿ a kɔ́ ba ví tíŋ́ woolı̵́ sá á̧ḿ.

²⁹Ví gaa Krístu wu̵ baa kɔ́ hȩn hí̧í̧lí̧ Tayɨɨ woo. Moo woo nɔ, i gaa á̧ḿ nán 'waapád ku̵u̵ kɔ́ hȩn hí̧í̧lí̧ Tayɨɨ woo máa, vu̵ waa Tayɨɨ woo vu̵ yu̵.