Read Dii 1 YOOHÁ̧NA 3 Bible Online

1 YOOHÁ̧NA 3 - Dii bible

1 YOOHÁ̧NA 3

¹I ho̧ lá ví zó̧ó̧ nán Ba'á Tayɨɨ woo ka kɔ́d ba ví yɛ nɔ! Bee ba ví waa woo vu̵ yu̵, máa ba ví waa woo vu̵ yu̵ gínú. Moo woo nɔ, nán tóó vu̵ to̧n kan ba ví ní, moo vu̵ gaan Tayɨɨ né á̧ḿ.

²Ɨ́ hí̧í̧lí̧ míí vu̵, 'ya̧'a̧ yɛ ba ví waa Tayɨɨ woo vu̵ yu̵, a̧máa mbaalı̵́ baa ví kɔ́ aa tii mbaa ví máa, tún ba ví lá du̵u̵lı̵́ na'a né. Kóó ı̵́ yo̧go̧ si̧', ba gaa ví hȩn ı̵́ yȩ ó̧; sey Krístu a gbɔ vúd ya tée, báń tii man ví kannɔ, moo báń ho̧ ví mbaalı̵́ woo də́ń kəddú̵.

³Nán 'waapád ku̵u̵ 'yɛ́ zó̧ó̧ Krístu woolı̵́ ı̵́ yo̧go̧ máa, vu̵ dɨ zó̧ó̧ mbɔ́ggı̵́, bi mbaa dȩ"ȩ́ na'a kɔ́ ı̵́ ka mbaa yȩ wɔgɔ á̧ḿ.

⁴Nán 'waapád ku̵u̵ kɔ́ hȩn ɓı̵́d máa, vu̵ kin Tayɨɨ tɔ́g né, moo hȩn ɓı̵́d kɔ́lı̵́ wu̵ ki tɔ́g sáɨ.

⁵Ví gaa Yesu Krístu ba gbɔ vúd ya, moo bi gaŋ hȩn ɓı̵́d nán voo luu ú. Ɨ́ woo máa, kan hȩn ɓı̵́d tóó woolı̵́ pɛ́lı̵́.

⁶Nán ka sú̵gú̵n kannɔ máa, gbɔ hȩn ɓı̵́d kɔ́lı̵́ á̧ḿ. A̧máa nán ka sȩgȩ hȩn ɓı̵́d kɔ́lı̵́ máa, ho̧n Krístu lá né, gaanɔ né á̧ḿ.

⁷Waa míí vu̵, i gbɔd nán tóó fó̧ó̧ a zo' ví moo sá. Nán ka kɔ́ hȩn hí̧í̧lí̧ Tayɨɨ woo tée, kɔ́ hȩn woo kɔ́ ı̵́ Yesu Krístu ka kɔ́ hȩn hí̧í̧lí̧ Tayɨɨ woo máa wɔgɔ á̧ḿ.

⁸Nán ka sȩgȩ hȩn ɓı̵́d kɔ́lı̵́ tée, nán Seeɗán woo nɔ, moo Seeɗán ká dəŋ ya hȩn ɓı̵́d kɔ́lı̵́ pi nu. Waa Tayɨɨ woo gbɔ vúd ya də́ń moo bi tud ba'ad Seeɗán woo ú̵.

⁹Nán ı̵́ Tayɨɨ ka ha̧a̧wo̧ máa, gbɔ hȩn ɓı̵́d kɔ́lı̵́, moo hȩn yȩ́ń Tayɨɨ woo mbaa dɨ woolı̵́. Wú̵ń duu sȩn fó̧ó̧ kɔ́n hȩn ɓı̵́d né, moo Tayɨɨ wu̵ ha̧a̧wo̧.

¹⁰Hȩn ka səgən waa Tayɨɨ woo vu̵ kan waa Seeɗán woo vu̵ kə́d máa, wu̵ yȩ nɔ; kóó nɔ́nná a kɔ́n hȩn hí̧í̧lí̧ Tayɨɨ woo né, tow a hí̧i̧n daga kirtȩ́n vu̵ né tée, nán Tayɨɨ woo nɔ pɛ́lı̵́.

¹¹Ya̧g ba'ad ká ví dəŋ ki ya sey dəné woolı̵́ máa, wu̵ yɛ nɔ: ba hí̧í̧n ví ú.

¹²Ba mbaa ví kɔ́ ı̵́ Kayí̧n wɔgɔ sá. Ká woo nán gbaŋ hȩn ɓı̵́d woo nɔ, ká nɔɔ daa sá̧ŋ́. Nɔɔwo̧ moo ȩná? Moo ba'ad woo aga ka kɔ́ máa, ba'ad ɓı̵́ddɨ, ba'ad daa sá̧ŋ́ woo ká wu̵ to̧o̧d Tayɨɨ.

¹³Dan kirtȩ́n vu̵, nán hágá yɛ u̵u̵ máń ví tée, hȩn woo a kɔ́ ví ɓá' sá.

¹⁴Kaa hí̧í̧ ví da ba ví kirtȩ́n vu̵ yȩ, ba gaa ví ba gbɔ ví ya nɔm, ba dɔ́ ví ya vágádı̵́. Nán ka hí̧i̧n daga kirtȩ́n né tée, dɨ lá ya nɔmmé.

¹⁵Nán 'waapád ka máń daga tóó tée, nán nɔm nɔɔnée. Ví gaa nán nɔm nɔɔné vu̵ kan vágád káákáá voolı̵́ pɛ́lı̵́.

¹⁶Hȩn aa gaan ví hí̧nní wu̵lı̵́ máa, wu̵ yɛ nɔ: Yesu Krístu pú̵ fó̧ó̧ woo moo baa ví. Tée ba pú̵ ví fó̧ó̧ baa ví moo da ba ví kirtȩ́n voo á̧ḿ.

¹⁷Nán tóó ka kɔ́ naa pȩ́ń, ka ho̧ daga kirtȩ́n tóó ka 'yɛ́n hȩn né, a̧máa ka sȩȩ nɔ́ɔ́ ya̧a̧wo̧ daa tée, wú̵ń duu o̧ ba bin hí̧í̧ Tayɨɨ zó̧ó̧ biilí áa?

¹⁸Waa míí vu̵, hí̧nní víí a nda woo doo séý kan moo moolȩ́, kan ya̧g to̧o̧ȩ sá, a̧máa i kɔ́ń zó̧ó̧ nán yȩ́ńná.

¹⁹Tée báń gaa ví ban ví nán ı̵́ moo yȩ́ń woo nɔ, báń kin ví dú̵ú̵ tóó tíŋ́ woolı̵́ né á̧ḿ.

²⁰Moo zó̧ó̧ baa ví a sə̧'ə̧d ba ví moo tée, ba gaa ví Tayɨɨ wu̵ mba zó̧ó̧ baa ví, wu̵ gaa hȩn 'waapád á̧ḿ.

²¹Ɨ́ hí̧í̧lí̧ míí vu̵, tow zó̧ó̧ baa ví a sə̧'ə̧n ba ví moo né tée, báń duu kin ví dú̵ú̵ tíŋ́ Tayɨɨ woolı̵́ né.

²²Báń nuŋ ví hȩn 'waapád aa ɓá' ví máa woolı̵́, moo kaa duu ví dooká woo vu̵, kaa kɔ́ ví hȩn to̧o̧ woo vu̵ á̧ḿ má nɔ.

²³Hȩn ka vi ba ví wu̵lı̵́ máa, wu̵ yɛ nɔ: moo aa 'yɛ́ ví zó̧ó̧ yúú Waa woo Yesu Krístu woolı̵́, aa hí̧í̧n ví ya baa vílí kɔ́ ı̵́ Krístu ka o̧d ba ví máa wɔgɔ.

²⁴Nán ka duu dooká Tayɨɨ woo vu̵ máa, sú̵gú̵n kan Tayɨɨ sú̵'ú̵, Tayɨɨ sú̵gú̵n kannɔ á̧ḿ. Hȩn aa gaan ví Tayɨɨ ba sú̵gú̵n kan ba ví ú máa, wu̵ yȩ nɔ: wu̵ pú̵ ba ví yigid woo.