Read Dii 1 YOOHÁ̧NA 4 Bible Online

1 YOOHÁ̧NA 4 - Dii bible

1 YOOHÁ̧NA 4

¹Ɨ́ hí̧í̧lí̧ míí vu̵, i ká̧ŋ́ moo nánán voo fȩȩlȩ́ȩ sá, a̧máa i gu̵g vu̵ ho̧ yigid máa ku̵u̵ dɨ kannɔ yȩ, a yaa dɨ Tayɨɨ woolı̵́ tɛ́ nɔ. Mí o̧ ı̵́ yo̧go̧ moo anábi vbád vu̵ hi̧' dɨ hágá yɛlı̵́.

²Hȩn i gaan yigid Tayɨɨ woo wu̵lı̵́ máa, wu̵ yɛ nɔ: nán 'waapád ka vud o̧ Yesu Krístu ba tii ya nánán yȩ́ńná sú̵'ú̵ tée, yaa dɨ Tayɨɨ woolı̵́.

³A̧máa nán ı̵́ ka sɛ́n Yesu né máa, yaan Tayɨɨ woolı̵́ né. Yigid ı̵́ ka dɨ kannɔ yȩ, yigid ı̵́ maag Krístu woo nɔ. Ká ví ki ban yaa dɨlı̵́, a̧máa 'ya̧'a̧ yɛ máa, yaa sı̵́ hágá yɛlı̵́ ú̵.

⁴A̧máa ı̵́ víí máa, ví nán Tayɨɨ woo nɔ, waa míí vu̵. Ví mba sı̵́ anábi vbád vu̵ ú̵, moo yigid máa kíí dɨ kannɔ yȩ, wu̵ mba yigid ı̵́ ka mbaa nán hágá yɛ voolı̵́ yȩ.

⁵Vu̵ voo nán hágá yɛ vu̵ yu̵. Moo woo nɔ, vu̵ moo voo moo hȩn hágá yɛ vu̵ yu̵, ma nán hágá yɛ vu̵ baa kid vu̵ tɔ́g.

⁶A̧máa ı̵́ baa ví máa, ba ví baa nán Tayɨɨ woo vu̵ yu̵. Nán ı̵́ ka gaa Tayɨɨ máa, kid ba ví tɔ́g. Nán ı̵́ ka gaan Tayɨɨ né máa, kin ba ví tɔ́g né. Báń ho̧ ví yigid moo yȩ́ń səgən kan yigid hȩn zo"ı̵́ ı̵́ yo̧go̧.

⁷Ɨ́ hí̧í̧lí̧ míí vu̵, ba hí̧ń ví ú, moo hí̧nní máa, yaa Tayɨɨ woolı̵́. Kóó nɔ́nná ka hí̧í̧ daga tée, nán Tayɨɨ woo nɔ, gaa Tayɨɨ á̧ḿ.

⁸Nán ka hí̧i̧n daga né tée, gaan Tayɨɨ né, moo Tayɨɨ wu̵ zó̧ó̧ nán.

⁹Tayɨɨ ba' Waa woo dágá kpə́gkpə́g yaa hágá yɛlı̵́, moo aa nuŋ ví vágád káákáá yúú ba'ad Waa woo woolı̵́. Hȩn ka tú' Tayɨɨ ba hí̧í̧ ba ví ú máa, wu̵ yɛ nɔ.

¹⁰Aa hí̧í̧ ví Tayɨɨ ú̵ tée, zó̧ó̧ nánne pɛ́lı̵́. Zó̧ó̧ nán wu̵ yɛ nɔ: Tayɨɨ wu̵ hí̧í̧ ba ví, ma ba' Waa woo ya nɔɔ, moo a pú̵ fó̧ó̧ woo, a səd ba ví yúú hȩn ɓı̵́d baa vílí.

¹¹Ɨ́ hí̧í̧lí̧ míí vu̵, Tayɨɨ ka hí̧í̧ ba ví na'a ı̵́ yo̧go̧ yȩ, ba hí̧í̧n ví á̧ḿ.

¹²Nán tóó ho̧n ná Tayɨɨ né sá̧ḿ. Tow, aa hí̧í̧n ví tée, Tayɨɨ dɨ mbaalı̵́ zó̧ó̧ baa vílí; zó̧ó̧ nán woo kɔ́ ba'ad baa vílí sí̧' la sı̵́ gbuggú á̧ḿ.

¹³Pú̵ ba ví yigid woo sú̵'ú̵. Moo woo nɔ ba gaa ví ba sú̵gú̵n ví kan Tayɨɨ, Tayɨɨ wu̵ sú̵gú̵n kan ba ví á̧ḿ.

¹⁴Vɔ́ ho̧, ma vɔ́ baa du̵ ya̧g: Ba'á Tayɨɨ ba' Waa woo, moo a ya səd nán vu̵ hágá yɛlı̵́.

¹⁵Tow nán tóó a o̧ kan zó̧ó̧ woo 'waapád Yesu ba Waa Tayɨɨ woo nɔ tée, Tayɨɨ sú̵gú̵n kannɔ sú̵'ú̵, nán sú̵u̵ sú̵gú̵n kan Tayɨɨ sú̵'ú̵ á̧ḿ.

¹⁶Ba ho̧ ví baa zó̧ó̧ nán Tayɨɨ ka kɔ́d ba ví yɛ, ba 'yɛ́ ví zó̧ó̧ wu̵lı̵́ á̧ḿ. Tayɨɨ wu̵ zó̧ó̧ nán. Nán ka baa kɔ́ zó̧ó̧ nán máa, nán yɛ sú̵gú̵n kan Tayɨɨ sú̵'ú̵, Tayɨɨ sú̵gú̵n kannɔ á̧ḿ.

¹⁷Zó̧ó̧ nán woo a kɔ́ ba'ad baa vílí sí̧' sı̵́ gbuggú tée, dú̵ú̵ wú̵ń kɔ́n ba ví zá̧ga̧ moo sə̧"ȩ́lȩ́ né á̧ḿ, moo mbaalı̵́ baa ví hágá yɛlı̵́ yɛ, man kan mbaalı̵́ ı̵́ Yesu Krístu woo sú̵'ú̵.

¹⁸Hí̧nní máa, dú̵ú̵ wu̵lı̵́ pɛ́lı̵́. Hí̧nní ı̵́ ka sí̧' la gbug máa, hȩd dú̵ú̵ gbɔ la zulí. Dú̵ú̵ ka kɔ́ nán tée, gaa hȩn si̧'i̧ní bii ba dɨlı̵́, moo gaa ba bin hí̧í̧ da bi vu̵ sí̧'i̧n gbug ní.

¹⁹Ɨ́ baa ví máa, ba hí̧í̧ ví Tayɨɨ, moo ká wu̵ dəŋ hí̧í̧ ba ví.

²⁰Tow nán tóó a o̧: “Mí hí̧í̧ Tayɨɨ ú̵,” a̧máa a máń daga tóó tée, kɔ́ vbáddɨ. Nán sú̵u̵ a ho̧ daga vu̵ nɔ́lȩ́ ma, a hí̧i̧n vu̵ né tée, wú̵ń hí̧i̧n Tayɨɨ né á̧ḿ, moo nán sú̵u̵ ho̧n Tayɨɨ né.

²¹Dooká Krístu woo ka pú̵ ba ví máa, wu̵ yɛ nɔ: nán ka hí̧í̧ Tayɨɨ tée, a hí̧í̧ daga vu̵ á̧ḿ.