Read Dii 1 YOOHÁ̧NA 5 Bible Online

1 YOOHÁ̧NA 5 - Dii bible

1 YOOHÁ̧NA 5

¹Nán 'waapád ka fȩȩ Yesu ba wu̵ Krístu tée, Tayɨɨ wu̵ ha̧a̧wo̧. Kóó nɔ́nná ka hí̧í̧ waa ba'a tée, hí̧í̧ waa woo vu̵ á̧ḿ.

²Aa hí̧í̧ ví Tayɨɨ, aa duu ví dooká woo vu̵ tée, hȩn aa gaa ví ban hí̧í̧ ví waa Tayɨɨ woo vu̵ ú̵ máa, wu̵ yȩ nɔ.

³Tayɨɨ hí̧í̧lí̧ wu̵ yɛ nɔ: ba duu ví dooká woo vu̵ yu̵. Dooká woo vu̵ təən ba ví duulí ní;

⁴moo nán Tayɨɨ ka ha̧a̧ vu̵ 'waapád máa vú̵ń mba hȩn hágá yɛ vu̵ ú̵. Hȩn kaa mban ví hȩn hágá yɛ vu̵ wu̵lı̵́ máa, wu̵ moo zó̧ó̧ 'yɛ́lı̵́ baa ví.

⁵Nóo mba hȩn hágá yɛ vu̵lá? Séý nán ı̵́ ka fȩȩ moo Yesu ba Waa Tayɨɨ woo nɔ má nɔ.

⁶Yesu Krístu wu̵ ı̵́ ka yaa kan mam Tayɨɨ wooné kan mɛm nɔm woo má nɔ. Yaan kan mamme dágá né, a̧máa yaa kan mam kan mɛm á̧ḿ. Yigid Tayɨɨ woo dɨddu̵ ya̧g du̵lı̵́ á̧ḿ, moo yigid máa, moo woo moo yȩ́ńne.

⁷Ɨ́ ya̧g du̵lı̵́ vu̵ dɨ ta̧a̧nɔ́:

⁸yigid Tayɨɨ woo, kan mam, kan mɛm. Ya voo ta̧a̧nɔ́ á̧ḿ, ya̧g voo dágá.

⁹Kaa fȩȩ ví ya̧g du̵lı̵́ nánán voo máa, ya̧g du̵lı̵́ ı̵́ Tayɨɨ woo wu̵ mba. Du̵ woo ya̧g yúú Waa woolı̵́.

¹⁰Nán ka 'yɛ́ zó̧ó̧ Waa Tayɨɨ woolı̵́ máa, dɨ kan ya̧g du̵lı̵́ yȩ zó̧ó̧ woolı̵́ á̧ḿ. A̧máa nán ı̵́ ka 'yɛ́n zó̧ó̧ Tayɨɨ woolı̵́ né máa, 'yɛ́ Tayɨɨ ı̵́ vbáddɨ, moo fȩȩn moo Tayɨɨ ka du̵ddu̵ ya̧g yúú Waa woolı̵́ yȩ né.

¹¹Ya̧g du̵lı̵́ woo wu̵ yɛ nɔ: Tayɨɨ pú̵ ba ví vágád káákáá; vágád yɛ yaa yúú Waa woolı̵́.

¹²Nán ka mbaa kan Waa Tayɨɨ woo máa, nuŋ sı̵́ vágád yɛ ú̵. Nán ı̵́ ka mbaan kan Waa Tayɨɨ woo né máa, nugun vágád yɛ né á̧ḿ.

¹³Ɨ́ kíí 'yɛ́ zó̧ó̧ Waa Tayɨɨ woolı̵́ yȩ, mí bíńda ví hȩn yɛ, moo i gaa bin nuŋ sı̵́ vágád káákáá ú̵.

¹⁴Ba 'yɛ́ ví zó̧ó̧ Tayɨɨ woolı̵́, moo woo nɔ ba gaa ví tow aa ɓá' ví hȩn tóó woolı̵́ kɔ́ ı̵́ ka hí̧í̧ wɔgɔ tée, wú̵ń kid ba ví ú.

¹⁵Ba gaa ví Tayɨɨ ba dɨ moo baa ví kilí yúú hȩn 'waapáddı̵́; ba gaa ví á̧ḿ, hȩn kaa ɓá' ví woolı̵́ máa, ba nuŋ ví sú̵'ú̵.

¹⁶Tow nán tóó ka ho̧ kirtȩ́n tóó ka kɔ́ hȩn ɓı̵́d ka maan nɔm né tée, a ɓá' Tayɨɨ; Tayɨɨ wú̵ń pú̵ kirtȩ́n yȩ vágád, moo ka kɔ́n hȩn ɓı̵́d ı̵́ nɔm né má nɔ. A̧máa hȩn ɓı̵́d ı̵́ ka maa nɔm máa, dɨlı̵́. Mí o̧n ví i ɓá'an Tayɨɨ moo woo nɔ né.

¹⁷Ba'ad ɓı̵́d vu̵ 'waapád vu̵ hȩn ɓı̵́ddɨ, a̧máa hȩn ɓı̵́d tóó vu̵ maan nɔm né.

¹⁸Ba gaa ví nán ı̵́ Tayɨɨ ka ha̧a̧wo̧ máa, sȩgȩ hȩn ɓı̵́d kɔ́n sı̵́ né, a̧máa Waa Tayɨɨ woo wu̵ tu̵gu̵, tée gbaŋ hȩn ɓı̵́d duu za'anɔ sı̵́ né.

¹⁹Ba gaa ví ba ví nán Tayɨɨ woo vu̵ yu̵, a̧máa nán hágá yɛ vu̵ 'waapád, vu̵ dɨ voo nag gbaŋ hȩn ɓı̵́d woolı̵́.

²⁰Ba gaa ví Waa Tayɨɨ woo yaa, wu̵ pú̵ ba ví moo taalı̵́ du̵u̵, moo aa gaa ví Tayɨɨ ı̵́ yȩ́ńnɔ́. Ba sú̵gú̵n ví kan ı̵́ yȩ́ń sú̵'ú̵, moo kaa mbaa ví Waa woo Yesu Krístu woolı̵́ yɛ nɔ. Wu̵ Tayɨɨ ı̵́ yȩ́ń, wu̵ pú̵ nán vu̵ vágád káákáá.

²¹Waa míí vu̵, i gág tayɨɨ mbɔ́ggı̵́ vu̵ duulíi.