Read Dii 2 YOOHÁ̧NA 1 Bible Online

2 YOOHÁ̧NA 1 - Dii bible

2 YOOHÁ̧NA 1

¹Míi ı̵́ nii sú̵ggı̵́, míi ba'ad naa lig ı̵́ Tayɨɨ ka yee ví yȩ, kan waa vu̵ ɗerwəl yɛ nɔ. Mí hí̧í̧ ví dam pɛ́lı̵́. Míi hí̧i̧n ví dágá né, a̧máa nán ı̵́ ku̵u̵ gaa moo yȩ́ń máa vu̵ 'waapád, vu̵ hí̧í̧ ví á̧ḿ,

²moo moo yȩ́ń mbaa dɨ baa vílí, wú̵ń dɨ mbaalı̵́ kan ba ví há̧á̧ káákáá.

³Ba'á Tayɨɨ kan Yesu Krístu Waa Ba'á woo, u̵u̵ bag ba ví hȩn, u̵u̵ kɔ́d ba ví zó̧ó̧ nán, u̵u̵ 'yɛ́ ba ví ká̧'a̧d; ba mbaa ví kan moo yȩ́ń, kan hí̧nníi.

⁴Zó̧ó̧ míí dȩ' mbaa ná' káń ho̧ waa móó tóó ku̵u̵ duu moo yȩ́ń, kɔ́ ı̵́ Ba'á Tayɨɨ ka o̧ wɔgɔ yȩ nɔ.

⁵'Ya̧'a̧ yɛ máa, mí o̧m: ba hí̧í̧n ví ú, naa lig míí. Mí bíńda mɔ́ dooká 'maŋŋɨ né, a̧máa dooká kaa dəŋ nuŋ ví ya sey dəné woolı̵́ pee nɔ.

⁶Hí̧nní máa wu̵ dooká Tayɨɨ woo vu̵ duulíi. Ká ví dəŋ ki dooká yȩ sey dəné woolı̵́ sú̵'ú̵, tée i hí̧ńnú.

⁷Nán hȩn zo"ı̵́ vu̵ hi̧' dɨ hágá yɛlı̵́. Vu̵ ma Yesu Krístu, vu̵ sɛ́n o̧lȩ́ ba tiin nánán yȩ́ńná sú̵'ú̵ né. Nán ka kɔ́ ı̵́ yo̧go̧ tée, nán hȩn zo"ı̵́ɨ, ı̵́ maag Krístu woo nɔ.

⁸I gág kan fó̧ó̧ víí ú, moo ka vín tid hȩn kíí nuŋ ba'ad vóólı̵́ máa gbɔ ú̵. A̧máa hȩn sú̵ú̵lı̵́ víí a mbaa yagalı̵́.

⁹Kóó nɔ́nná a mbaan moo tú"í Krístu woolı̵́ né, a̧máa a tú' moo tóó kə́d tée, kan Tayɨɨ pɛ́lı̵́. Nán ı̵́ a mbaa moo tú"í yȩlȩ́ tée, mbaa kan Ba'á Tayɨɨ kan Waa á̧ḿ.

¹⁰Nán tóó ka yaa víílí, ka pa̧ga̧n moo tú"í yȩ né tée, i fȩȩwo̧ víílí sa̧a̧mé sá, i vá"u̵ sá á̧ḿ,

¹¹moo nán a vá"u̵ tée, kɔ́ ba'ad ɓı̵́d nán yȩ ka kɔ́ yȩ sú̵'ú̵ á̧ḿ.

¹²Mí dɨ kan hȩn tóó vu̵ ɓu̵u̵lı̵́ na'a, bi o̧d ví ú, a̧máa mí sɛ́n bi duu bíńda ví ú ní. Mí 'yɛ́ zó̧ó̧ moo laalı̵́ víílí, moo bi o̧d ví kan ya̧g míí nu, moo zó̧ó̧ baa ví a dȩ' sí̧' la gbug.

¹³Dam nii ı̵́ Tayɨɨ ka yeewu̵ yȩ, waa woo vu̵ vá'am wu̵lı̵́ á̧ḿ.