Read Dii 3 YOOHÁ̧NA 1 Bible Online

3 YOOHÁ̧NA 1 - Dii bible

3 YOOHÁ̧NA 1

¹Míi ı̵́ nii sú̵ggı̵́, míi ba'ad Gayús ı̵́ káń hí̧í̧wo̧ na'a yȩ, ɗerwəl yɛ nɔ.

²Dan gboo ı̵́ hí̧í̧lí̧ míí, Tayɨɨ a bagam hȩn yúú hȩn 'waapáddı̵́. A̧m mbaa nánná kɔ́ ı̵́ káḿ 'yɛ́ zó̧ó̧ móó Tayɨɨ woolı̵́ yȩ wɔgɔ.

³Sey da ba ví kirtȩ́n tóó ku̵u̵ ya̧ ya, káń ki ba mɔ́n man moo yȩ́ń né, mɔ́n dɨ moo yȩ́ń yɛ duulíi máa, mí mbaa də́ń kan zó̧ó̧ dȩ"ȩ́ȩ kəd.

⁴Hȩn tóó dȩ'ȩn mí zó̧ó̧ kɔ́ ı̵́ káń ki waa míí ba vu̵n duu moo yȩ́ńne yȩ wɔgɔ né.

⁵Ɨ́ hí̧í̧lí̧ míí, mɔ́ kɔ́ ba'ad yȩ́ńná, sey káḿ kɔ́d kirtȩ́n vu̵ kan gáá yȩ vu̵ hȩn du̵u̵ yȩ nɔ.

⁶Vu̵ pa'a hȩn káḿ kɔ́d vu̵ yȩ nán sú̵ggı̵́ vóólı̵́ yɛlı̵́ á̧ḿ. Mí dȩm nag, a̧m ba' vu̵ gáá la kɔ́ ı̵́ ka to̧o̧d Tayɨɨ wɔgɔ,

⁷moo vu̵ dɔ́ hi̧naa ba'ad Krístu woolı̵́ sú̵'ú̵. Vu̵ vin hȩn tóó nán ı̵́ ku̵u̵ duun Yesu né máa voolı̵́ né.

⁸Ɨ́ baa ví kirtȩ́n vu̵, maa ban tíd ví nán ı̵́ yo̧go̧ máa vu̵ ú̵. Tée báń sú̵g kɔ́d ví ı̵́ hȩn yȩ́ń ba'ad.

⁹Ká mí bíńda nán sú̵ggı̵́ vu̵ ɗerwəl waaná', a̧máa Diotɛrɛ́f ka hí̧í̧ bi mbaad vu̵ gbanaaɨ yȩ, fȩȩn moo káń o̧n yȩ né.

¹⁰Moo woo nɔ, sey a̧n laa tée, míń tú' hȩn ɓı̵́d woo ka kɔ́ yȩ vu̵, ya̧g disa̧n woo kan ya̧g vbád ka kɔ́ yúú vóólı̵́ yȩ. A̧máa hȩn yȩ maanɔ lá né, ma nán kirtȩ́n ku̵u̵ ya̧ voolı̵́ máa, Diotɛrɛ́f fȩȩn vu̵ né á̧ḿ, há' nán ı̵́ ku̵u̵ bi fȩȩ vu̵ máa vu̵, nɛŋ vu̵ ya sú̵ggı̵́lı̵́ á̧ḿ.

¹¹Ɨ́ hí̧í̧lí̧ míí, a̧m 'yȩ́ŋ́ hȩn ɓı̵́d kɔ́lı̵́ máa sá, a̧máa a̧m 'yȩ́ŋ́ hȩn du̵u̵ɨ. Nán ka kɔ́ hȩn du̵u̵ máa, nán Tayɨɨ woo nɔ. Nán ka kɔ́ hȩn ɓı̵́d máa, ho̧n ná Tayɨɨ né.

¹²Nán 'waapád vu̵ moo moo yúú hȩn du̵u̵ Demetiríi woolı̵́. Kɔ́ ba'ad woo duu moo yȩ́ń; vɔ́ du̵ddu̵ ya̧g á̧ḿ, ma mɔ́ gaa moo vóó ba moo yȩ́ńne.

¹³Mí dɨ kan moo tóó vu̵ ɓu̵u̵lı̵́ na'a bi o̧mmɔ́, a̧máa mí sɛ́n bi duu bíńda ví ú ní.

¹⁴Mí 'yɛ́ zó̧ó̧ zaa míń ho̧m sú̵'ú̵, tée báń mba moo woo ya baalı̵́.

¹⁵Tayɨɨ a 'yɛ́m ká̧'a̧dɨ. Dam gboo vu̵ vá'am wu̵lı̵́. A̧m vá' da ba ví gboo vu̵ wu̵lı̵́ 'waapád, dágá dágá.