Read Dii Yúúda 1 Bible Online

Yúúda 1 - Dii bible

Yúúda 1

¹Mí Yúúda wu̵, Yaakúbu daa sá̧ŋ́ŋɨ, nán ba’ad Yesu Krístu woo nɔ. Mí ba’ad ví ɗerwəl yɛ, nán ı̵́ Ba’á Tayɨɨ ka bee ví, kíí mbaa kan hí̧í̧lí̧ woo, Yesu Krístu ka tu̵ ví yȩ víw.

²Tayɨɨ a ho̧ gíḿ gaad ví, a ’yɛ́ ví i mbaa ká̧’a̧dɨ, a kɔ́d ví zó̧ó̧ nán ɓu̵u̵lı̵́ na’a.

³Ɨ́ hí̧í̧lí̧ míí vu̵, mí pi zó̧ó̧ moo bi bíńda ví ɗerwəl yúú hȩn kaa sú̵g sə́d ví wu̵lı̵́ yɛlı̵́, hȩn woo ndaan moo a̧n zigid ví zó̧ó̧, moo i kɔ́ sɨɨ yúú zó̧ó̧ ’yɛ́lı̵́ Tayɨɨ ka pú̵ zig woo vu̵ do’ dágá ’nɛ́ŋ́ yȩlȩ́.

⁴Ma, nán ı̵́ tóó ku̵u̵ duun Tayɨɨ né máa, vu̵ pu̧u̧ dɔ́ ya sa̧a̧m baa vílí. Vu̵ tii ya̧g ba’ad ı̵́ ka tú’ moo zó̧ó̧ nán Tayɨɨ woo yȩ, moo bi kɔ́ bii dȩdȩ́ȩme. Vu̵ kéé Yesu Krístu, gbanaa baa ví, kan ı̵́ ’yɛ́lı̵́ baa ví dágá yȩ gbɔ á̧ḿ. Moo Tayɨɨ o̧ moo si̧’i̧ní voo ɗii sú̵’ú̵ á̧ḿ.

⁵Ví gaa hȩn yȩ vu̵ ’waa sú̵’ú̵. Ma mí duu ta’ad o̧d ví, ı̵́ ’yɛ́lı̵́ ká səd zig Izraɛ́l hág Mísiralı̵́, a̧máa tud nán ı̵́ ku̵u̵ sɛ́n zó̧ó̧ voo ’yɛ́lı̵́ woolı̵́ né máa vu̵.

⁶I duu taa, maleeka ı̵́ ku̵u̵ dȩ’ȩn zó̧ó̧ mbaalı̵́ nii voo ku̵u̵ ’yɛ́n vu̵ yȩlȩ́ né, a̧máa ku̵u̵ kéé ya mbaalı̵́ dáń voo gbɔ yȩ; Tayɨɨ ’yɛ́ vu̵ dɨ dəəlı̵́, ya dimmí, ga’ vu̵ ’yɛ́ ɗággı̵́ du̵u̵lı̵́ káákáá, moo zá̧ga̧ gbo̧o̧ a ya̧ tée, bi sə̧’ə̧d vu̵ moo wu̵lı̵́ má nɔ.

⁷I taa moo Súúduma woo, kan moo Gomór woo, kan kaa tóó dáŋ́ voolı̵́ máa vu̵ yu̵. Nán kaa yȩ ká vu̵ kɔ́ kɔ́ ı̵́ maleeka yȩ vu̵ wɔgɔ. Vu̵ kɔ́ ɓáa, kan hȩn ka maan kɔ́lı̵́ né máa vu̵. Vú̵ń nuŋ si̧’i̧ní ı̵́ vee dɔ́lı̵́ káákááɨ. Hȩn gú̵gu̵né voo yȩ mbaad nán vu̵ yu̵ ’waapád.

⁸A̧máa nán vbád baa ví yȩ vu̵ kɔ́ zu̵u̵ hȩn dágá yȩ nɔ, vu̵ ho̧ hȩn tóó vu̵ nəəgı̵́ ma, vu̵ kɔ́ hȩn sí̧i̧d, vu̵ ho̧ gbaŋ waalı̵́ Tayɨɨ woo hȩn leená, vu̵ haa maleeka gbo̧o̧ vu̵ á̧ḿ.

⁹Hȩn ı̵́ yȩ, kóó maleeka Misɛ́llu̵ si̧’, kɔ́n né. Wu̵ maleeka gbo̧o̧, a̧máa ku̵u̵ fan moo kan Seeɗán yúú fó̧ó̧ Múúsa woolı̵́ máa, Misɛ́l ndɔg Seeɗán haalı̵́. Moo Misɛ́l ká o̧d Seeɗán də́ń máa wu̵ yɛ nɔ: “Ɨ́ ’yɛ́lı̵́ wú̵ń si̧’i̧mɔ́.”

¹⁰A̧máa nán yȩ, hȩn ku̵u̵ gaa né máa, vu̵ haa wu̵ yu̵. Hȩn gaalı̵́ voo máa, mbaa kɔ́ ı̵́ pú̵g hó̧g voo wɔgɔ. Zó̧ó̧ pı̵́’ɨn vu̵ dɔg hı̵́ı̵́ də́ń né. Hȩn yȩ vú̵ńnɔ kɔ́ ma vú̵ń ti.

¹¹Zó̧ó̧ wú̵ń ví̧i̧ vu̵! Vu̵ duu hȩn kɔ́lı̵́ Kayí̧n woo nɔ. Vu̵ dɔd yúú voo moo sɨɨdelı̵́ kɔ́ ı̵́ Balám wɔgɔ. Vu̵ ti sú̵’ú̵, moo vu̵ lúú moo kɔ́ ı̵́ Koorée wɔgɔ.

¹²Kíí láń hȩn lálı̵́ zig kirtȩ́n tée, vu̵ lı̵́d ví yɛ́g, vu̵ lá hȩn vó’om, vu̵ kan sȩ́ḿ nɔ́lȩ́ pɛ́lı̵́, aga vu̵ ká̧ŋ́ də́ń fó̧ó̧ voo nɔ. Vu̵ mbaa kɔ́ ı̵́ mam hi̧i̧g tóó sápéém ka gaŋŋɔ, ma ka nagan mam né máa wɔgɔ. Vu̵ mbaa kɔ́ ı̵́ la’ tóó ka lii ní máa wɔgɔ, kóó gaagı̵́ si̧’. Vu̵ mbaa kɔ́ ı̵́ la’ tóó ku̵u̵ bugu vu̵ kan zágád vu̵ á̧ḿ máa wɔgɔ, vu̵ ’wɔ́ ’waapád.

¹³Vu̵ man kan mam gbo̧o̧, ka nam, ka fúŋ́ dag dag máa wɔgɔ. Vu̵ kɔ́ hȩn sȩ́ḿ vu̵ la zo"ı̵́. Vu̵ mbaa kɔ́ ı̵́ zoo waa tóó ku̵u̵ mbaan ya dágá né máa vu̵ wɔgɔ, a̧máa Tayɨɨ ’yɛ́d vu̵ ya mbaalı̵́ voo dɨ ya dimmí káákáá, ya dəə súlí yȩlȩ́.

¹⁴Zig Adamú woo ku̵u̵ ha̧y ’waa, tóó ka pu̵d daga ha̧a̧ la, ha̧a̧ la máa, ı̵́ gúndɛm woo Enóg, ká moo moo anábi yúú akaw vbád yȩ voolı̵́, o̧: “I ki ú, ı̵́ ’yɛ́lı̵́ wú̵ń dɨ yaalı̵́ kan maleeka woo, kaa wá’ vu̵ ’waa né yȩ vu̵ yu̵,

¹⁵moo bi sə̧’ moo yúú nán voolı̵́ ’waapád, bi si̧’i̧d nán ku̵u̵ duunɔ né, ku̵u̵ kɔ́ hȩn zó̧ó̧ fá̧á̧lȩ́ Tayɨɨ woo yȩ nɔ. Nán ku̵u̵ haawu̵ na’aa, ku̵u̵ sɛ́nnɔ duulí ní yȩ, wú̵ń sə̧’ moo yúú nán hȩn ɓı̵́d kɔ́lı̵́ yȩ voolı̵́.”

¹⁶Nán yȩ vu̵ baa ŋguu moo, vu̵ baa gbɔ́ dam yúú mbaalı̵́ voolı̵́. Vu̵ mbaa mbaalı̵́ ı̵́ hí̧í̧lí̧ voo nɔ. Vu̵ móó moo yúú na"ȩ́ vu̵, vu̵ naa nán vu̵, moo bi nuŋ hȩn wu̵lı̵́.

¹⁷A̧máa ı̵́ hí̧í̧lí̧ míí vu̵, ı̵́ víí, i taa moo waa ba’ad ı̵́ ’yɛ́lı̵́ baa ví Yesu Krístu woo ku̵u̵ o̧d ví tíŋ́ má nɔ.

¹⁸Ká vu̵ o̧d ví: “Bá’ sí̧’í̧d vu̵lı̵́ tée, nán tóó vú̵ń kɔ́d ví ba̧a̧m, vú̵ń mbaa mbaalı̵́ ɓı̵́d kɔ́ ı̵́ ku̵u̵ hí̧í̧ wɔgɔ.”

¹⁹Vu̵u̵ kɔ́ ma, nán ku̵u̵ hı̵́’ı̵́n yȩ nɔ. Hȩn dáń fó̧ó̧ voolı̵́ vu̵ buu vu̵ gba’a, moo vu̵ kan yigid Tayɨɨ woo pɛ́lı̵́.

²⁰A̧máa ı̵́ hí̧í̧lí̧ míí vu̵, moo hȩn gbo̧o̧ kíí ’yɛ́ zó̧ó̧ wu̵lı̵́ yȩ, i ’yɛ́ zó̧ó̧ wu̵lı̵́ laan tíŋ́ tíŋ́. I ɓá’ Tayɨɨ kan yigid woo yȩ nɔ.

²¹I ’yɛ́ zó̧ó̧ víí yúú zó̧ó̧ nán Tayɨɨ woolı̵́ kəd. I laa ı̵́ ’yɛ́lı̵́ baa ví Yesu Krístu wu̵, wú̵ń ’yɛ́ ví gbaŋ waalı̵́ woolı̵́ káákáá kan zó̧ó̧ to̧o̧ woo yȩ.

²²I ho̧ gíḿ gaad nán ı̵́ ku̵u̵ faa moo máa vu̵,

²³i səd nán yȩ vu̵ kɔ́ ı̵́ kíí tu̵’u̵d la’ vɛlı̵́ zu wɔgɔ. I ho̧ gíḿ gaad nán tóó vu̵ á̧ḿ, a̧máa i gággú̵. I máń hȩn kɔ́lı̵́ voo, kan sa̧a̧m ví̧i̧g voo ku̵u̵ kɔ́n hȩn ví̧i̧g wu̵lı̵́ yȩ la á̧ḿ.

²⁴Ɨ́ a dɨ kan néélȩ́ tu̵ ví i wá̧a̧n hȩn ɓı̵́ddı̵́ né, a ’yɛ́ ví i dii tíŋ́ na"ȩ́ woo yȩlȩ́ dȩ"ȩ́ na’a, i fóo kan zó̧ó̧ dȩ"ȩ́ wu̵lı̵́ máa,

²⁵wu̵ Tayɨɨ dágá, ka səd ba ví kan ba’ad Yesu Krístu ı̵́ ’yɛ́lı̵́ baa ví woo má nɔ. Ba na"o̧ ví, ba dəmmɔ ví, wu̵ ı̵́ hȩn mbalı̵́ kan néélȩ́ diga gbó̧ŋ́ na’a, wu̵ dɨ lá mbaalı̵́ ’ya̧’a̧ yɛ á̧ḿ, wú̵ń dɨ mbaalı̵́ ı̵́ yo̧go̧ há̧á̧ káákáá á̧ḿ. Aamɛ́n.