Read Dii DEBTERE HȨN HO̧LȨ́ 13 Bible Online

DEBTERE HȨN HO̧LȨ́ 13 - Dii bible

DEBTERE HȨN HO̧LȨ́ 13

¹Pig woolı̵́ máa, mí duu ho̧ hȩn tóó vúd dɔg mam gbo̧o̧lȩ́ kɔ́ ı̵́ pú̵g hó̧g wɔgɔ. Dɨ kan ga̧' wa̧nɓó', kan yúú gúndɛm. Mééta mɛɛtawəl vu̵ duu ga̧' woo yȩ vu̵lı̵́ wa̧nɓó' á̧ḿ. Vu̵ bíńda yéé du̵g Tayɨɨ woo vu̵ duu yúú woo yȩ vu̵lı̵́.

²Hȩn mam káń ho̧ yȩ man kan zággɨ. Doo woo vu̵ mbaa kɔ́ ı̵́ ı̵́ zág woo wɔgɔ, ya̧g woo mbaa kɔ́ ı̵́ ı̵́ kəə woo wɔgɔ. Hȩn nii naa pú̵gu̵ néélȩ́ woo kan láan woo, kan néélȩ́ hȩn mbalı̵́ gbo̧o̧ woo.

³Yúú dágá mbaa baa vu̵n du̵gu̵ kan pag moo ba a nɔɔ ó̧ zu wɔgɔ. A̧máa ndɔ́g woo ka maawo̧ nɔm yȩ yó̧ sú̵'ú̵. Nán hágá yɛ vu̵ 'waapád vu̵ mbaa ɗii, vu̵ duu hȩn mam pee.

⁴Nán 'waapád vu̵ bé' hȩn nii naa na"ȩ́, moo ka pú̵ hȩn mam yȩ néélȩ́ woo má nɔ. Vu̵ na' hȩn mam pee á̧ḿ, vu̵ o̧: “Nóo man kan hȩn mam yȩlá? Nóo sı̵́ń dɨ kan néélȩ́ kɔ́ sɨɨ kannɔlá?”

⁵Hȩn mam pee nuŋ néélȩ́ a moo moo yúú na"ȩ́, a haan Tayɨɨ wu̵lı̵́ á̧ḿ. Nuŋ néélȩ́ hȩn yȩ kɔ́lı̵́ sȩȩ vo' ndaddú̵ zu̵u̵ idú.

⁶Bé' moo ɓı̵́d Tayɨɨ woo moolȩ́, haa yéé Tayɨɨ woo, kan ya mbaalı̵́ Tayɨɨ woo, kan ı̵́ ku̵u̵ mbaa be"ı̵́ máa vu̵ á̧ḿ.

⁷Nuŋ néélȩ́ sɨɨ kɔ́lı̵́ kan zig Tayɨɨ woo, ma mba vu̵. Nuŋ néélȩ́ yúú zig tóó voolı̵́ 'waapád, kan hág tóó vu̵, kan ı̵́ ku̵u̵ moo ya̧g kə́kə́d máa vu̵, kóó hág woo tɛ́lá.

⁸Nán ku̵u̵ mbaa hágá yɛ vu̵ 'waapád vú̵ń na"o̧. Nán yȩ vu̵ bíńda lá yéé voo debtere dɔ́lı̵́ gbaŋ waalı̵́ Tayɨɨ woolı̵́ né, moo ya hág ká dəŋ máa, vu̵ bíńda lá yéé voo wu̵lı̵́ né á̧ḿ. Debtere yȩ dɨ mbee waa ku̵u̵ sə̧"o̧ pee woolı̵́ nagá.

⁹“Nán a dɨ kan tɔ́ggú̵ tée, a ki du̵u̵lı̵́ na'a.

¹⁰Nán tóó a mbaa woo moo u̵u̵ dɔddu̵ púúsinalȩ́ tée, vú̵ń dɔddu̵ wu̵lı̵́ gínú. Nán tóó a mbaa woo moo u̵u̵ nɔɔwo̧ kan pag naaɨ tée, vú̵ń nɔɔwo̧ ı̵́ yo̧go̧ gínú. Moo woo nɔ nán Tayɨɨ woo u̵u̵ ma' zó̧ó̧ wu̵lı̵́, u̵u̵ 'yɛ́ zó̧ó̧ voo Tayɨɨ woolı̵́ á̧ḿ.”

¹¹Pig woolı̵́ máa, mí duu ho̧ hȩn hó̧g vúd dɔg hágá, hȩȩ ga̧' idú kɔ́ ı̵́ ı̵́ mbee waa woo wɔgɔ, a̧máa moo moo kɔ́ ı̵́ hȩn nii naa wɔgɔ.

¹²Kɔ́ ba'ad kan néélȩ́ hȩn mam ı̵́ tíŋ́ yȩ woo 'waapád nɔ́ɔ́ woolı̵́. Yú hág kan nánán ku̵u̵ mbaa wu̵lı̵́ máa vu̵ 'waapád, ba u̵u̵ na' hȩn mam ı̵́ tíŋ́ ndɔ́g nɔm woo ba ká yó̧ pee nɔ.

¹³Hȩn hó̧g yȩ kɔ́ hȩn sa̧ga̧ gbo̧o̧ vu̵, há̧á̧ yo̧ŋ vee gbɔ zu̵u̵ be"ı̵́ nɔ́ɔ́ nánán voolı̵́ 'waapád á̧ḿ.

¹⁴Zo' nán ku̵u̵ mbaa hágá yɛ vu̵ kan hȩn sa̧ga̧ woo vu̵; nuŋ néélȩ́ kɔ́ hȩn sa̧ga̧ yȩ vu̵ nɔ́ɔ́ hȩn mam ı̵́ tíŋ́ pee woolı̵́. O̧d nán ku̵u̵ mbaa hágá yɛ vu̵ ba u̵u̵ mbɔ́g fóto hȩn mam ı̵́ ku̵u̵ du̵gu̵ ndɔ́g kan pag naa, ma ka duu mbaa zá̧a̧d yȩ woo, u̵u̵ na"o̧ ó̧.

¹⁵Hȩn hó̧g yȩ nuŋ néélȩ́ moo a pú̵ fóto hȩn mam ı̵́ tíŋ́ yȩ woo wə̧m vágád, moo a moo moo; ma a nuŋ néélȩ́ nɔɔ nán ı̵́ ku̵u̵ na'anɔ né máa vu̵ 'waapád.

¹⁶Hȩn mam yȩ yú nán vu̵ 'waapád kɔɔgná, nán lee vu̵, kan nán gbo̧o̧ vu̵, nán naa vu̵, kan nán gíḿ vu̵, gba'a vu̵, kan nán ku̵u̵ mbaa vəg lee máa vu̵, moo u̵u̵ bíńda hȩn tóó nag nán voolı̵́, tóó tée ya̧g túńní.

¹⁷Nán ı̵́ tóó ba u̵u̵ bíńda hȩn yȩ woolı̵́ né tée, ba a hɨ hȩn sá, ba a gí hȩn sá á̧ḿ. Hȩn bindigo yȩ yéé hȩn mam yȩ woo, tóó tée, hȩn wá"ı̵́ ka man kan yéé woo yȩ má nɔ.

¹⁸Hȩn a̧m gu̵g hȩn gaalı̵́ wu̵lı̵́ máa wu̵ yɛ nɔ. Nán a gaa hȩnnɔ́ tée, a ki hȩn wá"ı̵́ hȩn mam yȩ woo, moo hȩn wá"ı̵́ yȩ yéé nán tóó woo nɔ. Hȩn wá"ı̵́ woo dɨ 666.