Read Dii DEBTERE HȨN HO̧LȨ́ 14 Bible Online

DEBTERE HȨN HO̧LȨ́ 14 - Dii bible

DEBTERE HȨN HO̧LȨ́ 14

¹Pig woolı̵́ máa, mí duu tə́g nɔ́ɔ́, mí ho̧ mbee waa yȩ dii gu̵u̵ Sió̧ŋŋı̵́, kan nán 144.000; vu̵ bíńda yéé mbee waa woo, kan yéé Ba' woo woo ya̧g túń voolı̵́.

²Mí ki yɛ́g tóó kiy zu̵u̵ be"ı̵́ kɔ́ ı̵́ sug gbo̧o̧ tóó ka moo wɔgɔ, kɔ́ ı̵́ bó̧ó̧ ka sée hȩn máa wɔgɔ á̧ḿ. Yɛ́g káń ki yȩ man kan nán ko̧ŋ wa̧a̧lȩ́ tóó ku̵u̵ dɨ ko̧ŋ voo vu̵ wa̧a̧lȩ́ máa wɔgɔ.

³Nán uzinɛɛre há̧á̧ uzinɛɛre yȩ vu̵ dii tíŋ́ láané, kan tíŋ́ hȩn zá̧a̧d ndaddú̵ yȩ voolı̵́, kan tíŋ́ ı̵́ nii yȩ voolı̵́ á̧ḿ. Vu̵ bee yéé 'maŋ. Nán tóó dɨ kan néélȩ́ kúgú yéé woo gaa né, séý nán 144.000 ku̵u̵ səd vu̵ zu̵u̵ hágá yɛ vu̵ yu̵.

⁴Nán yȩ ká vu̵ un voo kan wakȩ́ȩ́ vu̵ né, moo vu̵ mbaa voo dȩ"ȩ́ na'a. Vu̵ duu mbee waa yȩ ya ka dɨ laalı̵́ máalȩ́ 'waapád. Ká vu̵ səd vu̵ yu̵ sa̧a̧m nánán voolı̵́, moo u̵u̵ dəŋ mbaa kɔ́ ı̵́ hȩn 'maŋ ku̵u̵ ha'ad Tayɨɨ, kan mbee waa yȩ wɔgɔ.

⁵Ba kin vbád ya̧g voolı̵́ né, vu̵ kɔ́n hȩn ɓı̵́d né á̧ḿ.

⁶Pig woolı̵́ máa, mí duu ho̧ maleeka tóó úg daa há̧á̧ yúba be' sa̧a̧mé zulí, pa̧ŋ moo to̧o̧ 'maŋ ı̵́ káákáá a o̧d nán ku̵u̵ mbaa hágá yɛ vu̵ má nɔ, nán hág vu̵ 'waapád, kan zig 'waapád, kan nán ya̧g kə́kə́d vu̵, kóó hág woo tɛ́lá 'waapád.

⁷Maleeka pee o̧ moo dɔg yúba, o̧: “I ndɔg Tayɨɨɨ, ví na"o̧ ó̧! Sey moo sə̧"ȩ́ woo a sə̧' moo yúú nánán voolı̵́ máa ya̧ sú̵'ú̵. I na' ı̵́ ka mbɔ́g be' kan hág, kan mam gbo̧o̧, kan ya mam ka ga wu̵lı̵́ yȩ ó̧.”

⁸Maleeka ı̵́ idú woo duu ı̵́ ba ɓə́ə́ tíŋ́ pee, o̧: “Baabilón kaa gbo̧o̧ pee túḿ sú̵'ú̵, túḿ sú̵'ú̵! Ká wu̵ zo' zig nán vu̵ 'waapád, moo u̵u̵ kɔ́ ɓáaɨ má nɔ. Hȩn zo"ı̵́ woo mbaa kɔ́ ı̵́ doo kíílí wɔgɔ.”

⁹Maleeka ı̵́ ta̧a̧nɔ́ woo duu duu ı̵́ tóó pee vu̵, moo moo dɔg yúba, o̧: “Nán a na' hȩn mam yȩ, kan fóto woo, a bíńda hȩn woo ya̧g túńní, tóó tée, nag woolı̵́ tée,

¹⁰aga wú̵ń zɔ doo lílí zó̧ó̧ yȩ́ȩ́ Tayɨɨ woo ka túú ɗag waa zó̧ó̧ yȩ́ȩ́ woolı̵́ yȩ! Nán ı̵́ 'waapád u̵u̵ kɔ́ ı̵́ yo̧go̧ á̧ḿ máa, vú̵ń dí̧í̧ vee kíd du̵u̵bı̵́ tíŋ́ maleeka Tayɨɨ woo voolı̵́, kan tíŋ́ mbee waa woolı̵́ á̧ḿ.

¹¹Nim vee u̵u̵ dí̧í̧ wu̵lı̵́ yȩ, wú̵ń uu mbaa wu̵lı̵́ há̧á̧ káákáá. Nəəlȩ́ wu̵lı̵́ pɛ́lı̵́ zá̧ga̧ kan vid á̧ḿ. Nán ı̵́ ku̵u̵ na' hȩn mam yȩ kan fóto woo á̧ḿ máa, vú̵ń mbaa wu̵lı̵́ kan nán 'waapád ku̵u̵ bíńda hȩn woo, kan yéé woo fó̧ó̧ voolı̵́ máa vu̵ á̧ḿ.”

¹²Tée nán Tayɨɨ woo ı̵́ ku̵u̵ duu dooká Tayɨɨ woo vu̵ máa, u̵u̵ ma' zó̧ó̧ voo vu̵ wu̵lı̵́, kan ı̵́ ku̵u̵ 'yɛ́ zó̧ó̧ voo Yesu woolı̵́ máa vu̵ á̧ḿ.

¹³Pig woolı̵́ máa, mí duu ki yɛ́g tóó o̧n zu̵u̵ moo be"ı̵́, o̧: “A̧m bíńda hȩn yɛ ú̵. Du̵u̵d nán ı̵́ ku̵u̵ nɔɔ ba'ad ı̵́ 'yɛ́lı̵́ woo woolı̵́ diga 'ya̧'a̧ yɛ máa vu̵ yu̵!” “Ee, moo yȩ́ńne, vú̵ń nəə yúú ba'ad voo təəlı̵́ na'a yȩ vu̵lı̵́, moo hȩn du̵u̵ voo ku̵u̵ kɔ́ yȩ, vu̵u̵ duu vu̵,” yigid Tayɨɨ woo wu̵ o̧ ı̵́ yo̧go̧.

¹⁴Mí duu tə́g nɔ́ɔ́, mí ho̧ mam hi̧i̧g heená. Mí ho̧ hȩn tóó mbaa zu̵u̵ wu̵lı̵́ kɔ́ ı̵́ nánán wɔgɔ. Mééta mɛɛtawəl do̧' yúú woolı̵́; tíd pag haggı̵́ woolı̵́ nagá.

¹⁵Maleeka tóó vúd ya lig hȩn ha"ı̵́lı̵́, o̧d ı̵́ ba mbaa mam hi̧i̧gí pee, moo dɔg moo yúba, o̧: “A̧m ɓɛ pag móó, mɔ́ gbɔ zu̵u̵ hágá a sə̧' tú̵ddɨ, moo sey tú̵d sə̧"ȩ́ ya̧ sú̵'ú̵. Tú̵d vu̵ 'wɔ́ maa sı̵́ sə̧"ȩ́ ó̧.”

¹⁶Ɨ́ ba mbaa mam hi̧i̧gí pee ɓɛ pag gbɔ zu̵u̵ hágá, tú̵d vu̵ sə̧'ə̧y 'waapád.

¹⁷Maleeka tóó vúd ya lig hȩn ha"ı̵́ ı̵́ be"ı̵́ peelı̵́, pa̧ŋ pag haggı̵́ na'a.

¹⁸Maleeka ı̵́ tóó ka dɨ kan néélȩ́ yúú vɛlı̵́ máa, vúd ya hȩn ha"ı̵́lı̵́, o̧d maleeka ı̵́ ba tíd pag haggı̵́ nagá pee moo dɔg yúba, o̧: “A̧m ɓɛ pag móó, mɔ́ sə̧'ə̧ ləmɔ́[8] hágá yȩ vu̵, moo vu̵ yó̧ sú̵'ú̵.”

¹⁹Maleeka pee ɓɛ pag gbɔ zu̵u̵ hágá, sə̧'ə̧ ləmɔ́ vu̵ bab hágá yɛlı̵́, gbóo vu̵ ya hȩn ka̧a̧lȩ́ gbo̧o̧ tóólı̵́. Hȩn woo tú' zó̧ó̧ yȩ́ȩ́ Tayɨɨ woo nɔ.

²⁰Vu̵ ka̧a̧ ləmɔ́ yȩ vu̵ kapigim ya hȩn ka̧a̧lȩ́lȩ́. Mɛm vúd ya hȩn ka̧a̧lȩ́ yȩlȩ́ ya̧ dɔg yȩ́g go'oy voolı̵́ ya̧gá̧, lı̵́g kɔ́ ı̵́ mam wɔgɔ há̧á̧ ya̧ kílomɛ́ɛtər tȩmɛre ta̧a̧nɔ́.