Read Dii DEBTERE HȨN HO̧LȨ́ 15 Bible Online

DEBTERE HȨN HO̧LȨ́ 15 - Dii bible

DEBTERE HȨN HO̧LȨ́ 15

¹Pig woolı̵́ máa, mí duu ho̧ hȩn sa̧ga̧ gbo̧o̧ tóó vúd be"ı̵́, maleeka gúndɛm u̵u̵ pa̧ŋ hȩn ndɔ́gɔné sí̧'í̧d vu̵ gúndɛm máa vu̵ yu̵. Kɔ́ la nánán vu̵ ɓá'. Zó̧ó̧ yȩ́ȩ́ Tayɨɨ woo sı̵́ń 'wáa kan vu̵ yu̵.

²Pig woolı̵́ máa, mí duu ho̧ daadugee kɔ́ ı̵́ mam gbo̧o̧ tóó wɔgɔ, yá̧á̧n kan vee. Mí duu ho̧ nán ı̵́ kú̵u̵ mba hȩn mam yȩ, kan fóto woo, kan hȩn wá"ı̵́ yéé woo máa, vu̵ dii yúú daadugee ka man kan mam gbo̧o̧ peelı̵́. Vu̵ tíd ko̧ŋ Tayɨɨ ka pú̵ vu̵ máa nagá.

³Vu̵ bee yéé Múúsa woo ká bee máa, Múúsa ká nán ba'ad Tayɨɨ woo nɔ, kan yéé mbee waa woo, vu̵ o̧: “Tayɨɨ, ba'ad móó vu̵u̵ ba'ad gbo̧o̧, vu̵ kɔ́ nánán vu̵ ɓá'. Ɨ́ 'yɛ́lı̵́ vóó, móo mba hȩn 'waapád néélȩ́. Gbanii zig nán voo 'waapád, hȩn kɔ́lı̵́ móó vu̵ yagalı̵́, vu̵ hȩn yȩ́ń vu̵ yu̵!

⁴Nóo wú̵ń ndɔgɔn mɔ́ nélá, ı̵́ 'yɛ́lı̵́ vóó? Nóo wú̵ń sɛ́n mɔ́ na"ȩ́ nélá, moo móo mbaa hȩn gbo̧o̧ dágá, moo zig nán 'waapád vú̵ń yaa, vú̵ń nə'əy tíŋ́ móólȩ́, vú̵ń na'am, moo ba'ad yȩ́ń móó vu̵ vúd; nán vu̵ gaa sú̵'ú̵.”

⁵Pig woolı̵́ máa, mí duu ho̧ lig hȩn ha"ı̵́ tú̵'ú̵ be"ı̵́, lig sa̧a̧m ka tú' Tayɨɨ ba du̵u̵lı̵́ má nɔ.

⁶Maleeka gúndɛm vu̵n pa̧ŋ hȩn ndɔ́gɔné pee vu̵ vúd ya lig hȩn ha"ı̵́lı̵́. Vu̵ dɔ́ sa̧a̧m hee gáálı̵́ na'a, vu̵ ta kandá do̧' haalı̵́.

⁷Hȩn zá̧a̧d ndaddú̵ pee dágá pú̵ vu̵ ɗag waa do̧' ya voo gúndɛm á̧ḿ; ɗag waa yȩ vu̵ hi̧' kan zó̧ó̧ yȩ́ȩ́ Tayɨɨ woo ka mbaa wu̵lı̵́ káákáá yȩ.

⁸Lig hȩn ha"ı̵́ yȩ hi̧' kan nim, wu̵ tú' na"ȩ́ kan hȩn mbalı̵́ Tayɨɨ woo. Hȩn ndɔ́gɔné maleeka gúndɛm ku̵u̵ tíd nagá yȩ vú̵ń kɔ́ hȩn woo 'waa pȩ́ń, tée nán tóó vú̵ń nuŋ néélȩ́ dɔ́lı̵́ wu̵lı̵́.