Read Dii DEBTERE HȨN HO̧LȨ́ 16 Bible Online

DEBTERE HȨN HO̧LȨ́ 16 - Dii bible

DEBTERE HȨN HO̧LȨ́ 16

¹Pig woolı̵́ máa, mí ki la yɛ́g tóó vúd ya lig hȩn ha"ı̵́lı̵́, moo dɔg moo yúba o̧d maleeka gúndɛm pee vu̵: “I la yɛd zu̵u̵ hȩn ɗag waa zó̧ó̧ yȩ́ȩ́ Tayɨɨ woolı̵́ yȩ hágá.”

²Maleeka ı̵́ dəné woo la yɛd hȩn ɗag waa woolı̵́ pee gbɔ zu̵u̵ hágá. Ndɔ́g ɓı̵́d tóó ndɔ́gɔné na'a vu̵ vúd kɔ́ nánán ı̵́ vu̵n bíńda hȩn hȩn mam woo ya̧g túń voolı̵́ pee, vu̵n na' kan fóto woo á̧ḿ pee vu̵.

³Maleeka ı̵́ idú woo yɛd hȩn ı̵́ ɗag waa woolı̵́ pee mam gbo̧o̧lȩ́. Mam gbo̧o̧ tii mɛm mbaa kɔ́ ı̵́ mɛm nán nɔm tóó woo wɔgɔ. Hȩn zá̧a̧d ku̵u̵ mbaa mam yȩlȩ́ máa, vu̵ nɔɔ 'waapád.

⁴Maleeka ı̵́ ta̧a̧nɔ́ woo yɛd hȩn ı̵́ ɗag waa woolı̵́ pee ziŋ gbo̧o̧ vu̵lı̵́, kan ya mam ku̵u̵ ga vúd wu̵lı̵́ máa vu̵lı̵́, vu̵ tii mɛm á̧ḿ.

⁵Mí ki maleeka ı̵́ ka tu̵ mam vu̵ máa, o̧: “Mɔ́ kɔ́ móó yagalı̵́, ı̵́ káḿ dɨ mbaalı̵́ yȩ, ká mɔ́ dɨlı̵́ á̧ḿ. Wí! Móo hȩn gbo̧o̧, moo mɔ́ sə̧' moo ı̵́ yo̧go̧.

⁶Ká vu̵ yɛd mɛm zig móó woo voo, kan mɛm anábi voo vu̵ á̧ḿ, ma 'ya̧'a̧ yɛ mɔ́ pú̵ vu̵ mɛm u̵u̵ zɔ ú̵! Vu̵ nuŋ hȩn ka maa vu̵ nuní má nɔ!”

⁷Pig woolı̵́ máa, mí duu ki yɛ́g tóó vúd ya ya hȩn ha"ı̵́lı̵́, o̧: “Ee, Tayɨɨ ı̵́ 'yɛ́lı̵́ vóó, ı̵́ káḿ mba hȩn 'waapád, moo sə̧"ȩ́ móó vu̵ moo yȩ́ńne, vu̵ yagalı̵́!”

⁸Maleeka ı̵́ ndaddú̵ woo yɛd hȩn ı̵́ ɗag waa woolı̵́ pee gbɔ dɔg zá̧ga̧lȩ́, ma zá̧ga̧ kɔ́ hȩn ı̵́ woo, a̧n nán vu̵ kan vee woo.

⁹Nán vu̵ a̧n kan píím vee gbo̧o̧ yȩ woo, vu̵ haa Tayɨɨ ka dɨ kan néélȩ́ pú̵ vu̵ hȩn ndɔ́gɔné yȩ. A̧máa vu̵ tii zó̧ó̧ voo na'an Tayɨɨ né á̧ḿ.

¹⁰Maleeka ı̵́ nɔ́nɔ́ woo yɛd hȩn ı̵́ ɗag waa woolı̵́ pee gbɔ láan hȩn mam pee woolı̵́. Vaŋná ya dim tid hág hȩn mam woo pee; ma nán vu̵ sə́ŋ́ mɛ́ɛ́ voo yúú hȩn ndɔ́gɔné yȩlȩ́.

¹¹Vu̵ háá dɔg Tayɨɨ be"ı̵́, moo hȩn ndɔ́gɔné ku̵u̵ nuŋ, kan ndɔ́g yȩ vu̵ á̧ḿ. A̧máa vu̵ gbɔn ba'ad ɓı̵́d voo yȩ vu̵ kɔ́lı̵́ né.

¹²Maleeka ı̵́ gúú woo yɛd hȩn ı̵́ ɗag waa woolı̵́ pee gbɔ ziŋ gbo̧o̧ Eefaláddı̵́. Mam pee 'wɔ́d, moo bi gbɔd gbanii ı̵́ ku̵u̵ yaa ka' mam na'alȩ́ máa vu̵ hi̧naa wu̵lı̵́.

¹³Pig woolı̵́ máa, mí ho̧ yigid ɓı̵́d tóó vu̵ ta̧a̧nɔ́, vu̵ mbaa kɔ́ ı̵́ bubugum vu̵[9] wɔgɔ. Vu̵ vúd zu̵u̵ ya̧g hȩn nii naa pee woolı̵́, kan ya̧g hȩn mam pee woolı̵́, kan ya̧g anábi vbád woolı̵́ á̧ḿ.

¹⁴Vu̵ yigid ɓı̵́d ku̵u̵ kɔ́ hȩn sa̧ga̧ máa vu̵ yu̵. Yigid ɓı̵́d ta̧a̧nɔ́ yȩ vu̵ laa gbanii hágá yɛ voolı̵́, moo u̵u̵ sú̵g kɔ́ sɨɨ zá̧ga̧ gbo̧o̧ Tayɨɨ ı̵́ ka mba hȩn 'waapád néélȩ́ ka mbɔ́g yȩlȩ́.

¹⁵Ma ı̵́ 'yɛ́lı̵́ o̧: “A̧m ki ú, mí dɨ yaalı̵́ kɔ́ ı̵́ líw tóó wɔgɔ! Du̵u̵d nán ı̵́ a mbaa nɔ́ɔ́ to̧o̧ná, a tu̵ sa̧a̧m woo vu̵ má nɔ, moo kan 'yȩm fó̧ó̧ leená, nán ka vu̵n ho̧go̧ tée, sȩ́ḿ kan kɔ́gɔ ú̵.”

¹⁶Yigid ɓı̵́d yȩ vu̵ su̵g gbanii vu̵ laan ya tóó ku̵u̵ beewu̵ kan ya̧g eebərə́ə “Armagedɔ́ŋ” máalȩ́.

¹⁷Maleeka ı̵́ gúndɛm woo yɛd hȩn ı̵́ ɗag waa woolı̵́ pee gbɔ la sápéémé. Yɛ́g tóó vúd ya lig hȩn ha"ı̵́lı̵́, yaa láané, o̧: “Hȩn kɔ́y sú̵'ú̵!”

¹⁸Mam vu̵ nim, yɛ́g vu̵ kiy ya, bó̧ó̧ sée hȩn, hág vu̵ nam gbo̧o̧ ba'a. Diga sey Tayɨɨ ka yɨb nán vu̵ máa, hág nam ná gbo̧o̧ ba'a ı̵́ yo̧go̧ né; hág namné woo ı̵́ yȩ lı̵́n 'yɛ́nné.

¹⁹Kaa gbaŋ pee ka' tóó vu̵ pə́gə́n túḿ la ya ta̧a̧nɔ́. Kaa gbaŋ vu̵ hág 'waapád vu̵ túḿ á̧ḿ. Tayɨɨ duu taa moo yúú kaa gbaŋ Baabilónné, kɔ́gɔ zɔ doo ɗag waa zó̧ó̧ yȩ́ȩ́ peelı̵́, doo zó̧ó̧ yȩ́ȩ́ woo píímná pee nɔ.

²⁰Mam bam vu̵ su'uy 'waa, ba duu ho̧n sı̵́ gu̵u̵ vu̵ né á̧ḿ.

²¹Ta'ab gbo̧o̧ vu̵ yo̧ŋ zu̵u̵ be"ı̵́ yúú nán voolı̵́, vu̵ zi̧i̧ há̧á̧ ya̧ kílo vo' ndaddú̵, ma nán vu̵ duu haa Tayɨɨ moo hȩn ndɔ́gɔné yȩ, moo hȩn si̧'i̧ní yȩ ká hȩn si̧'i̧ní gbo̧o̧ȩ.