Read Dii DEBTERE HȨN HO̧LȨ́ 17 Bible Online

DEBTERE HȨN HO̧LȨ́ 17 - Dii bible

DEBTERE HȨN HO̧LȨ́ 17

¹Maleeka dágá sa̧a̧m ı̵́ gúndɛm vu̵n tíd ɗag waa vu̵ gúndɛm nag voolı̵́ pee, ya o̧n: “A̧m yaa ú̵. Míń tú'um hȩn si̧'i̧ní kaa gbaŋ woo, ka waa gbaŋ dáŋ́ mam gbo̧o̧ tóó vu̵lı̵́, ka mbaa kɔ́ ı̵́ wakȩ́ȩ́ ɓáa kɔ́lı̵́ gbo̧o̧ tóó wɔgɔ yȩ nɔ.

²Gbanii hágá yȩ vu̵ baa kɔ́ ɓáa kannɔ; nánán hágá yɛ vu̵ kíí doo ɓáa kɔ́lı̵́ woo yȩ.”

³Yigid ya ma'an, ya gaŋ laan mí hó̧g kȩŋŋı̵́. Mí ho̧ wakȩ́ȩ́ tóó ɗáá mbaa yúú hȩn hó̧g yȩ́ȩ́ tóólı̵́. Yéé du̵g ku̵u̵ haan Tayɨɨ wu̵lı̵́ máa hi̧' woolı̵́ fó̧lȩ́. Dɨ kan yúú gúndɛm kan ga̧' wa̧nɓó'.

⁴Wakȩ́ȩ́ yȩ dɔ́ sa̧a̧m gáálı̵́ na'a, kan sa̧a̧m yȩ́ȩ́ sɔ́ý, mbɔ́g fó̧ó̧ woo kan va̧ga̧ do̧' vu̵, kan 'yɛgɛ gáálı̵́ vu̵, kan zaŋ woo vu̵ á̧ḿ. Dɨ kan ɗag waa do̧' woolı̵́ nagá, hȩn zó̧ó̧ fá̧á̧lȩ́ vu̵ hi̧' tíŋ́ woolı̵́ ság, kan ɓáa kɔ́lı̵́ woo vu̵.

⁵Vu̵ bíńda yéé tóó yu̵g ya̧g túń woolı̵́, yéé woo “Baabilón gbo̧o̧ȩ, na' ı̵́ ɓáa kɔ́lı̵́ voo, kan ı̵́ hȩn zó̧ó̧ fá̧á̧lȩ́ kɔ́lı̵́ voo hágá yɛlı̵́ voo nɔ.”

⁶Mí ho̧ wakȩ́ȩ́ sú̵u̵, mɛm zig Tayɨɨ woo voo kííwu̵, kan mɛm nán ı̵́ ku̵u̵ nɔɔ vu̵, moo ku̵u̵ gbɔn Yesu né máa voo vu̵ á̧ḿ. Káń ho̧ wakȩ́ȩ́ yȩ máa, kɔ́nna ɓá'.

⁷Maleeka pee duu o̧n: “Moo ȩn mɔ́ mbaa ɗiilá? Míń tú'um hȩn ka yú̵g wakȩ́ȩ́ yȩ woolı̵́, kan hȩn hó̧g ka gaŋŋɔ yȩ á̧ḿ, hȩn hó̧g ka dɨ kan yúú gúndɛm kan ga̧' wa̧nɓó' yȩ nɔ.

⁸Hȩn hó̧g káḿ ho̧ yȩ ká mbaa zá̧a̧dɨ, a̧máa duu sı̵́ pɛ́lı̵́ á̧ḿ. Wú̵ń vúd ya dəə dim súlí na'a yȩlȩ́, moo laalı̵́ ya a ti máalȩ́. Tayɨɨ ká dəŋ bíńda yéé nán tóó voo debtere dɔ́lı̵́ gbaŋ waalı̵́ woolı̵́ pȩ́ń, ma yɨb be' kan hág. Nán hágá yɛlı̵́ u̵u̵ ho̧ hȩn hó̧g yȩ tée, wú̵ń kɔ́ vu̵ la ɓá', moo ká mbaa zá̧a̧dɨ, a̧máa duu sı̵́ pɛ́lı̵́, ma sı̵́ń duu vúd ya dɨlı̵́.

⁹“I ki gaa yɛlı̵́ du̵u̵lı̵́ na'a. Yúú gúndɛm yȩ vu̵ gu̵u̵ gúndɛm wakȩ́ȩ́ yȩ ka mbaa yúú voolı̵́ má nɔ. Vu̵u̵ gbanii gúndɛm á̧ḿ.

¹⁰Ɨ́ nɔ́nɔ́ woo vu̵ nɔɔ 'waa sú̵'ú̵. Ɨ́ gúú woo wu̵ dɨ gbaŋ waalı̵́. Ɨ́ gúndɛm yȩ yaa ná né; sey a yaa tée, wú̵ń səə waaná' aga nɔ.

¹¹Hȩn hó̧g ká mbaa zá̧a̧dná pȩ́ń, ka sı̵́ pɛ́lı̵́ yȩ, aga wú̵ńnɔ waa gbanii ı̵́ ka'andaddú̵ woo. Ká dɨ sa̧a̧m ı̵́ gúndɛm yȩ voolı̵́ á̧ḿ; ma wú̵ń dɨ laalı̵́ ya tilílí.

¹²“Ga̧' wa̧nɓó' káḿ ho̧ vu̵ yȩ, vu̵ gbanii wa̧nɓó' ku̵u̵ dəgə ná gbaŋ waalı̵́ voo né máa vu̵ yu̵. A̧máa vú̵ń nuŋ néélȩ́ gbanii waalı̵́ hɨɨ waa dágá; vú̵ń sú̵g waa gbaŋ kan hȩn hó̧g yȩ pȩ́ń.

¹³Ya voo 'waapád wa̧nɓó' á̧ḿ, moo taalı̵́ voo wú̵ń dágá, vú̵ń ɓɛ hȩn mbalı̵́ voo kan néélȩ́ voo pú̵ hȩn hó̧g yȩ.

¹⁴Vú̵ń sa mbee waa yȩ sɨɨ, a̧máa mbee waa sı̵́ń mba vu̵, moo mbee waa wu̵ ı̵́ 'yɛ́lı̵́ ı̵́ 'yɛ́lı̵́ voo, wu̵ gbanii ı̵́ gbanii voo. Wú̵ń mba vu̵, kan nán ı̵́ woo ká bee vu̵, ká yee vu̵, ku̵u̵ 'yɛ́ zó̧ó̧ voo woolı̵́ máa vu̵ yu̵.”

¹⁵Maleeka duu o̧n: “Mam káḿ ho̧ wakȩ́ȩ́ ɓáa kɔ́lı̵́ na'a yȩ ka waa gbaŋ yúú voolı̵́ yȩ, vu̵ zig nán vu̵, kan dúú tóó vu̵, kan hág tóó vu̵, kan nán ya̧g kə́kə́d tóó vu̵ yu̵.

¹⁶Ga̧' wa̧nɓó' káḿ ho̧ vu̵ yȩ, vu̵ kan hȩn hó̧g yȩ á̧ḿ, vú̵ń máń wakȩ́ȩ́ ɓáa kɔ́lı̵́ na'a yȩ, vú̵ń vbid hȩn woo vu̵ 'waapád, vú̵ń gbɔgɔ fó̧ó̧ leená, vú̵ń lá fó̧ó̧ yo̧go̧ woo, vú̵ń a̧n kéélı̵́ woo vɛlı̵́,

¹⁷moo Tayɨɨ 'yɛ́ hȩn hí̧í̧lí̧ woo zó̧ó̧ voolı̵́, moo u̵u̵ kɔ́ hȩn hí̧í̧lí̧ bii si̧' la gbug, u̵u̵ kɔ́ hȩn nag dágá yȩ nɔ, u̵u̵ ɓɛ néélȩ́ gbaŋ waalı̵́ voo pú̵ hȩn hó̧g, há̧á̧ hȩn woo a kɔ́y kɔ́ ı̵́ moo Tayɨɨ woo ká o̧ máa wɔgɔ pȩ́ń.

¹⁸“Wakȩ́ȩ́ káḿ ho̧go̧ yȩ, wu̵ kaa gbaŋ ka waa gbaŋ yúú gbanii hágá yɛ voolı̵́ yȩ nɔ.”