Read Dii DEBTERE HȨN HO̧LȨ́ 19 Bible Online

DEBTERE HȨN HO̧LȨ́ 19 - Dii bible

DEBTERE HȨN HO̧LȨ́ 19

¹Pig hȩn yȩlȩ́ máa, mí duu ki yɛ́g dúú zo' tóó kiy zu̵u̵ be"ı̵́ o̧: “Alelúya! I na' Tayɨɨ ú̵! Hȩn sənné, kan na"ȩ́, kan hȩn mbalı̵́ máa, Tayɨɨ baa ví woo nɔ!

²Moo sə̧"ȩ́ woo yȩ́ńne, yagalı̵́, moo sə̧' moo yúú wakȩ́ȩ́ ɓáa kɔ́lı̵́ gbo̧o̧ yȩ woolı̵́; wakȩ́ȩ́ yȩ lı̵́d hág kan ɓáa kɔ́lı̵́ woo yȩ. Tayɨɨ si̧'i̧du̵, moo ka nɔɔ nán ba'ad Tayɨɨ woo vu̵ na'a má nɔ.”

³Dúú pee vu̵ duu o̧: “Alelúya! I na' Tayɨɨ ú̵! Nim vee ba a̧n kaa gbaŋ pee mbaa wu̵lı̵́ káákáá.”

⁴Ɨ́ nii gbɛg zu̵u̵ ndaddú̵, kan hȩn zá̧a̧d ndaddú̵ pee, vu̵ ya gu doo núug, vu̵ na' Tayɨɨ ka mbaa láané pee, vu̵ o̧: “Aamɛ́n! Alelúya! I na' Tayɨɨɨ!”

⁵Yɛ́g tóó kiy ya láané, o̧: “Nán ba'ad Tayɨɨ woo vu̵, kan nán ı̵́ kíí ndɔggu̵ máa vu̵ 'waapád, nán gbo̧o̧ vu̵, kan ı̵́ lee vu̵ á̧ḿ, i na' Tayɨɨ ú̵!”

⁶Pig woolı̵́ máa, mí ki yɛ́g dúú tóó voo duŋ ya kɔ́ ı̵́ mam sug wɔgɔ, kɔ́ ı̵́ bó̧ó̧ ka wu̵ sée hȩn zu wɔgɔ. Mí ki vu̵ o̧: “Alelúya! I na' Tayɨɨ ú̵, moo ı̵́ 'yɛ́lı̵́ baa ví mbaa sı̵́ gbanii ú̧, Tayɨɨ ka mba hȩn 'waapád pee nɔ.

⁷Ba fóó ví, ba dȩ' ví zó̧ó̧, ba na"o̧ ví, moo sey lig pú̵lı̵́ mbee waa woo ya̧ sú̵'ú̵, kȩ́ȩ́ woo mbɔ́g fó̧ó̧ woo 'waa sú̵'ú̵.

⁸Vu̵ pú̵gu̵ néélȩ́ a ta sa̧a̧m ı̵́ ku̵u̵ tȩȩ mɛ́'ɛ́'ɛ́ ka gáá la wu̵lı̵́, ka dȩ' la wu̵lı̵́ má nɔ.” (Sa̧a̧m ı̵́ ku̵u̵ tȩȩwo̧ mɛ́'ɛ́'ɛ́ yȩ, tú' ba'ad du̵u̵ zig Tayɨɨ woo ka kɔ́ vu̵ má nɔ.)

⁹Maleeka duu o̧n: “A̧m bíńda ú̵! Zó̧ó̧ wú̵ń dȩ' nán ı̵́ ku̵u̵ bee vu̵ hȩn lálı̵́ lig pú̵lı̵́ mbee waa woolı̵́ máa vu̵ yu̵.” Duu ha' moo tóó o̧: “Moo yȩ́ń Tayɨɨ woo yȩ vu̵ yu̵.”

¹⁰Mí kə̧ə̧ la woolı̵́ tíŋ́, moo bi na"o̧ ó̧, a̧máa o̧n: “A̧m kɔ́ ı̵́ yo̧go̧ sá! Mí nán ba'adɨ kɔ́ ı̵́ mɔ́ wɔgɔ á̧ḿ, kɔ́ ı̵́ dam sá̧ŋ́ tóó ku̵u̵ dɨ kan moo yȩ́ń Yesu woo yȩ vu̵ wɔgɔ á̧ḿ. A̧m na' séý Tayɨɨɨ!” Moo yȩ́ń Yesu ka vud tú' máa, anábi vu̵ tú' də́ń wu̵ yu̵ á̧ḿ.

¹¹Pig woo mí duu ho̧ be' tú̵'ú̵, go'oy hee tóó gbɔ vúd ya wu̵lı̵́. Nán ka ɗááwu̵ máa, yéé woo “Ta ya̧g buu sá,” kan “Moo yȩ́ń.” Sə̧' moo, kɔ́ sɨɨ kɔ́ ı̵́ Tayɨɨ ka hí̧í̧ máa wɔgɔ.

¹²Nɔ́ɔ́ woo dɔ́gɔ́ kɔ́ ı̵́ vee nɔ́ɔ́ wɔgɔ. Dɨ kan mɛɛtawəl ɓu̵u̵lı̵́ na'a yúú woolı̵́. Vu̵ bíńda yéé tóó wu̵lı̵́, nán tóó gaa né, séý wu̵ yu̵.

¹³Sa̧a̧m woo ka dɔ́ máa, mbaa baa vu̵n yoo dɨ mɛmmé. Yéé woo “Moo Tayɨɨ woo.”

¹⁴Só̧ó̧ze ı̵́ be"ı̵́ vu̵ dugu, vu̵ ɗáá go'oy hee vu̵, vu̵ dɔ́ sa̧a̧m ı̵́ ku̵u̵ tȩȩ mɛ́'ɛ́'ɛ́ heená, dȩ"ȩ́ na'a máa vu̵ yu̵.

¹⁵Pag naa haggı̵́ na'a vúd ya̧g woolı̵́, wú̵ń gbɔ́n zig 'waapád kan wu̵ yu̵. Wú̵ń waa gbaŋ yúú voolı̵́ kan yé'en zɨd. Wú̵ń ka̧a̧d vu̵ doo zó̧ó̧ yȩ́ȩ́ Tayɨɨ ı̵́ ka mba hȩn 'waapád néélȩ́ máa woo.

¹⁶Vu̵ bíńda yéé yɛ vu̵ sa̧a̧m woolı̵́ kan doo woolı̵́: “Gbanii ı̵́ gbanii voo nɔ; ı̵́ 'yɛ́lı̵́ ı̵́ 'yɛ́lı̵́ voo nɔ.”

¹⁷Pig woo mí duu ho̧ maleeka tóó dii mbaa zá̧ga̧lȩ́, o̧d nɔ́g gbo̧o̧ ku̵u̵ úg daa yúba be' sa̧a̧mé máa vu̵ moo dɔg yúba: “I yaa ú̵, i sú̵g ya moo hȩn lálı̵́ gbo̧o̧ Tayɨɨ woo na'a yɛlı̵́!

¹⁸I ya lá fó̧ó̧ yo̧go̧ gbanii voo, kan gbaŋ sɨɨ voo, kan só̧ó̧ze voo, kan yo̧go̧ go'oy voo, kan nán ku̵u̵ ɗáá vu̵ máa voo, kan yo̧go̧ nánán voo 'waapád, kóó gba'a vu̵, kóó ı̵́ vəg lee vu̵, kóó nán gbo̧o̧ vu̵, kóó ı̵́ lee vu̵ á̧ḿ.”

¹⁹Pig woolı̵́ máa, mí duu ho̧ hȩn mam pee, kan gbanii hágá yɛ vu̵, kan só̧ó̧ze voo vu̵, vu̵ sú̵g moo bi sa ı̵́ ka ɗáá yúú go'oyı̵́ yȩ sɨɨ kan só̧ó̧ze woo vu̵ yu̵ á̧ḿ.

²⁰Vu̵ ma' hȩn mam pee, kan anábi vbád ká kɔ́ hȩn sa̧ga̧ vu̵ tíŋ́ woolı̵́ máa á̧ḿ. (Ká wu̵ zo' nán vu̵ kan hȩn sa̧ga̧ woo yȩ vu̵, ı̵́ ku̵u̵ bíńda hȩn hȩn mam yȩ woo fó̧ó̧ voolı̵́, ku̵u̵ na' fóto woo máa vu̵ yu̵.) Hȩn mam yȩ kan anábi vbád yȩ á̧ḿ, vu̵ gbɔ vu̵ vee gbo̧o̧ tóólı̵́ zá̧a̧dná, ya u̵u̵ a̧n wu̵lı̵́ kan kíd tóó má nɔ.

²¹Nán kéélı̵́ woo yȩ vu̵ nɔɔ vu̵ kan pag naa ba vúd ya̧g nán ba ɗáá go'oy pee woo. Nɔ́g gbo̧o̧ pee vu̵ 'waapád vu̵ ya lá yo̧go̧ voo.