Read Dii DEBTERE HȨN HO̧LȨ́ 2 Bible Online

DEBTERE HȨN HO̧LȨ́ 2 - Dii bible

DEBTERE HȨN HO̧LȨ́ 2

¹Nán yȩ duu o̧n: “A̧m bíńda ba'ad maleeka ı̵́ nán sú̵ggı̵́ voo kaa Ɛfɛ́ɛzlı̵́ yȩ ó̧, mɔ́ o̧ddu̵: ‘Ɨ́ ka tíd zoo waa vu̵ gúndɛm nag nán woolı̵́, ka 'yȩ́ḿ sa̧a̧m hȩn lám ka̧mné gúndɛm voolı̵́ yȩ, hȩn ka o̧ máa wu̵ yɛ nɔ.

²Mí gaa ba'ad móó vu̵ 'waapád. Mí gaa hȩn fó̧ó̧ pı̵́ı̵́lı̵́ móó, kan zó̧ó̧ ma"ȩ́ móó yȩ á̧ḿ. Mɔ́ ma'an zó̧ó̧ kan nán lı̵́nné na'a yȩ vu̵ né. Mɔ́ gu̵g nán ı̵́ ku̵u̵ o̧ bin waa ba'ad vu̵ yu̵ yȩ vu̵ ho̧. A̧máa vu̵ waa ba'ad pɛ́lı̵́, mɔ́ ho̧ vu̵, vu̵ nán vbád vu̵ yu̵.

³Mɔ́ ma' zó̧ó̧ kan hȩn ndɔ́gɔné káḿ nuŋ yúú míílí̧ yȩ, a̧máa mɔ́ pɔgɔn fó̧ó̧ móó né.

⁴A̧máa hȩn ka to̧o̧n mí móólȩ́ né máa wu̵ yɛ nɔ. Mɔ́ hí̧i̧n mí sı̵́ kɔ́ ı̵́ káḿ dəŋ hí̧i̧n mí pee wɔgɔ né.

⁵A̧m taa hȩn du̵u̵ káḿ kéé gbɔ yȩ, a̧m tii zó̧ó̧ móó la ú̵! A̧m fíí ya kɔ́ hȩn kɔ́ ı̵́ káḿ kɔ́ dəné woolı̵́ máa wɔgɔ. Tow a pɛ́lı̵́, a̧m tiin zó̧ó̧ móó né tée, míń yaa, míń ɓɛ hȩn lám ka̧mné móó luu ya mbaalı̵́ woolı̵́.

⁶A̧máa mɔ́ dɨ kan hȩn du̵u̵ tóó móólȩ́. Mɔ́ máń ba'ad nán Nikoláy woo vu̵ kɔ́ ı̵́ káń máń vu̵ wɔgɔ á̧ḿ.

⁷‘Nán a dɨ kan tɔ́ggú̵ tée, a ki moo yigid Tayɨɨ woo ka o̧d nán sú̵ggı̵́ vu̵ yȩ du̵u̵lı̵́ na'a. ‘Nán ı̵́ a mba hȩn zo"ı̵́ máa, míń pú̵gu̵ néélȩ́ la' líid lálı̵́ bab Tayɨɨ woolı̵́, la' vágád káákáá yȩ nɔ.’ ”

⁸Nán yȩ duu o̧n: “A̧m bíńda ba'ad maleeka ı̵́ nán sú̵ggı̵́ voo kaa Simínní yȩ ó̧, mɔ́ o̧ddu̵: ‘I ki hȩn ı̵́ dəné kan ı̵́ sí̧'í̧d ka nɔɔ ma ka duu níḿ nɔmmé, ka o̧ máa wu̵ yɛ nɔ!

⁹Mí gaa hȩn ndɔ́gɔné móó vu̵ ú̵. Mí gaa gíḿ móó á̧ḿ, a̧máa moo yȩ́ńná, mɔ́ nán naaɨ! Mí ki moo ɓı̵́d nán ı̵́ ku̵u̵ o̧ ba bin nán Yúúda vu̵ yu̵, ku̵u̵ o̧m yȩ ó̧, a̧máa vu̵ wu̵ yu̵ pɛ́lı̵́. Vu̵ sú̵g sú̵ggı̵́ Seeɗánne!

¹⁰A̧m ndɔg moo ba bíń nuŋ hȩn ndɔ́gɔnée ó̧ máa sá. A̧m ki ú, Seeɗán dɨ ví gu̵ggı̵́, sı̵́ń má'a nán tóó vu̵ víílí sa̧a̧mé dɔd lig púúsinalȩ́. Víń nuŋ hȩn ndɔ́gɔné bá' wa̧nɓó'. A̧m buu ya̧g talı̵́ móó sá há̧á̧ a ya̧ sey nɔm móólȩ́. Míń pú̵m hȩn sú̵ú̵lı̵́, mɔ́ń nuŋ vágád káákáá ú̵.

¹¹‘Nán a dɨ kan tɔ́ggú̵ tée, a ki moo yigid Tayɨɨ woo ka o̧d nán sú̵ggı̵́ vu̵ yȩ du̵u̵lı̵́ na'a. ‘Nán ı̵́ a mba hȩn zo"ı̵́ máa, wú̵ń nɔɔn nɔm ı̵́ idú woo né sá̧ḿ.’ ”

¹²Nán yȩ duu o̧n: “A̧m bíńda ba'ad maleeka ı̵́ nán sú̵ggı̵́ voo kaa Pɛɛgámmé yȩ ó̧, mɔ́ o̧ddu̵: ‘Ɨ́ ka dɨ kan pag naa ka hag du̵u̵lı̵́ na'a ka' idú á̧ḿ yȩ, o̧ ná':

¹³Mí gaa ya mbaalı̵́ móó yȩ, ya woo Seeɗán waa gbaŋ du̵u̵lı̵́. Mɔ́ má'án móó néélȩ́ na'a kan mí. Mɔ́ kéé zó̧ó̧ 'yɛ́lı̵́ móó gbɔn né, kóó zá̧ga̧ Aŋtipáa ká mbaa ı̵́ ya̧g du̵lı̵́ míílí̧ á̧ḿ. Ká vu̵ nɔɔwo̧ víílí, ya Seeɗán ka mbaa wu̵lı̵́ yȩlȩ́.

¹⁴A̧máa hȩn ka to̧o̧n mí móólȩ́ né máa wu̵ yɛ nɔ. Mɔ́ dɨ kan nán tóó vu̵ móólȩ́, vu̵ 'yɛ́ zó̧ó̧ voo dɨ moo tú"í Balám woolı̵́. Balám wu̵ tú'ud Balág[3] ba a zo' waa Izraɛ́l u̵u̵ kéé Tayɨɨ gbɔ, ba u̵u̵ lá pú̵g kú̵u̵ ha' gbaalı̵́, ba u̵u̵ kɔ́ kan ɓáa á̧ḿ.

¹⁵Mɔ́ duu 'yɛ́ nán tóó vu̵ móólȩ́, vu̵ 'yɛ́ zó̧ó̧ voo dɨ moo tú"í Nikoláy woolı̵́ á̧ḿ.

¹⁶A̧m kéé hȩn ɓı̵́d móó yȩ gbɔ ú̵. Tow a ı̵́ yo̧go̧ pɛ́lı̵́ tée, míń dɨ laalı̵́ móólȩ́ vaŋná, míń sa nán yȩ vu̵ sɨɨ kan pag naa ka vúd míílí̧ ya̧gá̧ yɛ.

¹⁷‘Nán a dɨ kan tɔ́ggú̵ tée, a ki moo yigid Tayɨɨ woo ka o̧d nán sú̵ggı̵́ vu̵ yȩ du̵u̵lı̵́ na'a. ‘Nán ı̵́ a mba hȩn zo"ı̵́ máa, míń pú̵gu̵ mána ı̵́ ka yú̵g máa. Míń duu pú̵gu̵ 'yɛgɛ hee ı̵́ ku̵u̵ bíńda yéé 'maŋ wu̵lı̵́ máa; nán tóó wú̵ń gaa né, séý nán ı̵́ a nuŋ má nɔ.’ ”

¹⁸Nán yȩ duu o̧n: “A̧m bíńda ba'ad maleeka ı̵́ nán sú̵ggı̵́ voo kaa Tiatíilí yȩ ó̧, mɔ́ o̧ddu̵: ‘Waa Tayɨɨ, nɔ́ɔ́ woo ka mbaa kɔ́ ı̵́ vee yɨg wɔgɔ, doo woo ku̵u̵ gáá kɔ́ ı̵́ hɨɨ ka yú̵gú̵d mbaa sı̵́gsı̵́g wɔgɔ yȩ, wu̵ o̧:

¹⁹Mí gaa hȩn káḿ kɔ́ yȩ vu̵ 'waapád. Mí gaa zó̧ó̧ nán móó, kan zó̧ó̧ 'yɛ́lı̵́ móó, kan zó̧ó̧ ba'ad kɔ́lı̵́ yȩ́ń móó, kan zó̧ó̧ ma"ȩ́ móó yȩ ó̧. Mí gaa zó̧ó̧ pilí móó ba'adı̵́ 'ya̧'a̧ yɛ mba ı̵́ dəné woo máa ó̧.

²⁰A̧máa hȩn ka to̧o̧n mí móólȩ́ né maa wu̵ yɛ nɔ. Mɔ́ ma' zó̧ó̧ kan Yesabɛ́l, ka o̧ ba bin anábi Tayɨɨ woo nɔ yȩ nɔ. Wakȩ́ȩ́ yȩ tú'ud nán ba'ad míí vu̵ hȩn woo yȩ, u̵u̵ tii nán ɓáa kɔ́lı̵́, u̵u̵ lá hȩn ku̵u̵ ha'ad tayɨɨ mbɔ́ggı̵́ vu̵ máa á̧ḿ.

²¹Mí gbɔddu̵ sey moo a kéé hȩn ɓı̵́d woo vu̵ gbɔ ú̵. A̧máa sɛ́n gbɔlı̵́ né, gbɔn ɓáa kɔ́lı̵́ né á̧ḿ.

²²Moo woo nɔ, míń dɨgɨ hȩn ndɔ́gɔné pú̵lı̵́ leesolı̵́. Míń dɔd nán ı̵́ ku̵u̵ sú̵g kɔ́ ɓáa kannɔ á̧ḿ máa vu̵ ya hȩn ndɔ́gɔnélȩ́, tow u̵u̵ kéé ba'ad ɓı̵́d voo yȩ gbɔn né tɛ́ nɔ.

²³Pig woo tée, míń nɔɔ waa woo vu̵, tée nán sú̵ggı̵́ vu̵ 'waapád vú̵ń gaa ba mín gaa moo taalı̵́ nánán voo, kan hȩn hí̧í̧lí̧ voo vu̵, ba míń sú̵ú̵ ví kóó nɔ́nná duu hȩn a kɔ́ máa á̧ḿ.

²⁴‘A̧máa ı̵́ víí, nán sú̵ggı̵́ ı̵́ tóó kaa Tiatíilí yȩ, kíí dɔ́n ya hȩn tú"í ɓı̵́d yȩ vu̵lı̵́ né, kíí kúgun víí hȩn nán yȩ ku̵u̵ bee ba hȩn yú̵ggı̵́ ɗiilí Seeɗán woo nɔ yȩlȩ́ né máa, mí o̧d ví, míń duu ha'an ví hȩn gané tóó né.

²⁵A̧máa i tíd hȩn kíí dɨ kannɔ yȩ néélȩ́ na'a, há̧á̧ a ya̧ sey fíiní míí ya.

²⁶Nán ı̵́ a mba hȩn zo"ı̵́, a laan tíŋ́ kan hȩn ı̵́ káń hí̧í̧ máa kɔ́lı̵́ há̧á̧ a ya̧ bá' sí̧'í̧dí tée, míń pú̵gu̵ néélȩ́ yúú zig nán voolı̵́;

²⁷wú̵ń waa gbaŋ yúú voolı̵́ kan yé'en zɨd, wú̵ń 'woo vu̵ kɔ́ ı̵́ gbág hád van wɔgɔ.

²⁸‘Ká mí nuŋ néélȩ́ yȩ Ba'á woolı̵́ ı̵́ yo̧go̧, ma míń duu pú̵ nán ı̵́ ka mba hȩn zo"ı̵́ yȩ. Míń pú̵gu̵ zu̵u̵ yɔ́g á̧ḿ.

²⁹‘Nán a dɨ kan tɔ́ggú̵ tée, a ki moo yigid Tayɨɨ woo ka o̧d nán sú̵ggı̵́ vu̵ yȩ du̵u̵lı̵́ na'a.’ ”