Read Dii DEBTERE HȨN HO̧LȨ́ 20 Bible Online

DEBTERE HȨN HO̧LȨ́ 20 - Dii bible

DEBTERE HȨN HO̧LȨ́ 20

¹Pig woolı̵́ máa, mí duu ho̧ maleeka tóó sí zu̵u̵ be"ı̵́, tíd makúblí waa dəə dim gbo̧o̧ pee nagá, kan ɗág gbo̧o̧ tóó.

²Ma' hȩn nii naa, bɨɨg see ká pee nɔ, yéé woo ı̵́ hȩn zo"ı̵́, kan Seeɗán. Maleeka yȩ ga"u̵ kan ɗág, moo a mbaa wu̵lı̵́ ve' uzinɛɛre,

³gbɔgɔ zu̵u̵ dəə dim gbo̧o̧ peelı̵́, tú̵"u̵, ga"u̵ kan makúblí, sȩȩb, moo hȩn nii naa a duu nuŋ néélȩ́ zo' zig nán vu̵ sá, há̧á̧ ve' uzinɛɛre a ya̧a̧ pȩ́ń. Pig hȩn yȩlȩ́ tée, vú̵ń duu buu gbɔgɔ sey waaná'.

⁴Pig woolı̵́ máa, mí duu ho̧ láan tóó vu̵. Nán ku̵u̵ mbaa yúú voolı̵́ máa, vu̵ nuŋ néélȩ́ moo sə̧"ȩ́. Mí ho̧ yigid nán ı̵́ ku̵u̵ du̵ ya̧g yúú Yesu woolı̵́, ku̵u̵ gbɔn moo Tayɨɨ woo né, ma ku̵u̵ nɔɔ vu̵ máa voo. Ká vu̵ na'an voo hȩn mam yȩ né, kóó kan fóto woo á̧ḿ. Ká vu̵ bíńda hȩn hȩn mam yȩ woo ya̧g túń voolı̵́ né, kóó nag voolı̵́ á̧ḿ. Vu̵ níḿ nɔmmé, vu̵ waa gbaŋ kan Krístu há̧á̧ ve' uzinɛɛre.

⁵(Nán nɔm ı̵́ kéélı̵́ woo vú̵ń ním voo né, há̧á̧ ve' uzinɛɛre vú̵ń ya̧a̧ pȩ́ń.) Dəné nímní nɔmmé woo wu̵ yȩ nɔ.

⁶Nán ı̵́ u̵u̵ dəŋ níḿ nɔmmé yȩ, zó̧ó̧ wú̵ń dȩ' vu̵ yu̵, moo vu̵ nán Tayɨɨ woo vu̵ yu̵! Nɔm ı̵́ idú woo sı̵́ kan néélȩ́ yúú voolı̵́ pɛ́lı̵́. Vú̵ń mbaa nán hȩn ha"ı̵́ Tayɨɨ woo vu̵ kan Krístu woo á̧ḿ. Vú̵ń waa gbaŋ kan Krístu ve' uzinɛɛre.

⁷Sey ve' uzinɛɛre yȩ u̵u̵ ya̧a̧ sú̵'ú̵ tée, vú̵ń vud Seeɗán ya vu̵n ga"u̵ peelı̵́.

⁸Wú̵ń laa ka' hág nduguyní ndaddú̵lı̵́ á̧ḿ, wú̵ń zo' zig nán ku̵u̵ hi̧' wu̵lı̵́ máa vu̵ 'waapád (vu̵ bee zig nán yȩ vu̵ Góg kan Magóggɨ.) Wú̵ń su̵g vu̵ moo sɨɨ salı̵́, vú̵ń ɓu̵u̵ lá wu̵lı̵́ kɔ́ ı̵́ hád sagad mam gbo̧o̧lȩ́ wɔgɔ.

⁹I ho̧ vu̵ sı̵́nná! Vu̵ yaa hág 'waapád, vu̵ gbɔ daa kan saŋ zig Tayɨɨ woo, kan kaa gbaŋ ı̵́ Tayɨɨ ka hí̧í̧wo̧ máa. A̧máa vee sí zu̵u̵ be"ı̵́ tud vu̵ 'waapád.

¹⁰Ma Seeɗán ka zo' vu̵ pee, vu̵ gbɔgɔ vee gbo̧o̧ ka hi̧' kan kíd tóó, ya ku̵u̵ gbɔ hȩn mam kan anábi vbád woo vu̵ wu̵lı̵́ peelı̵́. Vú̵ń dí̧í̧ wu̵lı̵́ vid kan zá̧ga̧ á̧ḿ há̧á̧ káákáá.

¹¹Pig woolı̵́ máa, mí duu ho̧ láan gbo̧o̧ tóó heená, kan ı̵́ ka mbaa yúú woolı̵́ máa á̧ḿ. Hág kan be' vu̵ lúú ɗug tíŋ́ woolı̵́, vu̵ ti la kəd.

¹²Pig woo, mí duu ho̧ nɔm vu̵, nán gbo̧o̧ vu̵, kan ı̵́ lee vu̵ á̧ḿ, vu̵ dii tíŋ́ láan peelı̵́. Vu̵ tu̵'u̵ debtere vu̵. Vu̵ duu tu̵'u̵ debtere tóó á̧ḿ, debtere dɔ́lı̵́ gbaŋ waalı̵́ Tayɨɨ woolı̵́ɨ. Vu̵ sə̧'ə̧d nán nɔm vu̵ moo duu ba'ad voo ku̵u̵ kɔ́ máalȩ́, duu hȩn ku̵u̵ bíńda debtere vu̵lı̵́ máa á̧ḿ.

¹³Mam gbo̧o̧ fii nɔm ku̵u̵ dɨ tíŋ́ woolı̵́ máa vu̵ gbɔ ya. Nɔm kan kaa nɔm á̧ḿ, vu̵ fii nɔm ku̵u̵ tu̵ vu̵ pee gbɔ ya. Ya voo 'waapád, vu̵ sə̧'ə̧d vu̵ moo duu hȩn voo kú̵u̵ kɔ́ máalȩ́.

¹⁴Vu̵ gbɔ nɔm kan kaa nɔm vee gbo̧o̧lȩ́. Vee gbo̧o̧ yȩ wu̵ nɔm ı̵́ idú woo!

¹⁵Kóó nɔ́nná ku̵u̵ bíńda yéé woo debtere dɔ́lı̵́ gbaŋ waalı̵́ Tayɨɨ woolı̵́ né tée, vu̵ gbɔgɔ zu̵u̵ vee gbo̧o̧lȩ́.