Read Dii DEBTERE HȨN HO̧LȨ́ 21 Bible Online

DEBTERE HȨN HO̧LȨ́ 21 - Dii bible

DEBTERE HȨN HO̧LȨ́ 21

¹Pig woolı̵́ máa, mí duu ho̧ be' 'maŋ kan hág 'maŋ. Be' ı̵́ ká tíŋ́, kan hág ı̵́ tíŋ́ máa, vu̵ ti sú̵'ú̵, mam gbo̧o̧ sı̵́ pɛ́lı̵́ á̧ḿ.

²Ma mí ho̧ kaa gbaŋ Tayɨɨ woo, Yerúsalem 'maŋ dɨ zu̵u̵ sílí be"ı̵́ Tayɨɨ woolı̵́. Tayɨɨ mbɔ́ggu̵ kɔ́ ı̵́ ku̵u̵ mbɔ́g náá gíb waa, moo a laa lig wə̧ə̧ woolı̵́ máa wɔgɔ.

³Mí ki yɛ́g tóó moo dɔg moo yúba ya láané, o̧: “'Ya̧'a̧ yɛ máa, ya mbaalı̵́ Tayɨɨ woo dɨ sı̵́ sa̧a̧m nánán voolı̵́! Wú̵ń mbaa kan vu̵, tée vú̵ń mbaa zig woo á̧ḿ. Tayɨɨ aga wú̵ń mbaa kan vu̵, wú̵ń mbaa Tayɨɨ voo.

⁴Wú̵ń na'ad vu̵ mɛmɛ́ḿ nɔ́lȩ́ 'waapád. Nɔm sı̵́ pɛ́lı̵́, ká̧ń nɔm wú̵ń sı̵́ pɛ́lı̵́ á̧ḿ, kóó wa̧ya̧g, kóó hȩn ndɔ́gɔné. Hȩn see vú̵ń ti 'waapád.”

⁵Ɨ́ ka mbaa láané pee o̧: “Mí duu mbɔ́g hȩn 'waapád vu̵ 'maŋná.” Pig woolı̵́ máa, duu o̧n: “A̧m bíńda hȩn yɛ ú̵! Moo míí yȩ vu̵ moo yȩ́ń vu̵ yu̵, vu̵ maa zó̧ó̧ 'yɛ́lı̵́ wu̵lı̵́ ú̵.”

⁶Duu ha' moo tóó o̧: “Kɔ́y sú̵'ú̵! Míi A. Míi Zɛ́d[10] á̧ḿ, ı̵́ dəné kan ı̵́ sí̧'í̧d á̧ḿ. Mam a 'wɔd nán tée, míń pú̵gu̵ mam zɔlı̵́ leená, ya mam vágád káákáá ka ga máalȩ́.

⁷Kóó nɔ́nná a mba hȩn zo"ı̵́ máa, wú̵ń nuŋ hȩn yȩ míílí̧ leená. Míń mbaa Tayɨɨ woo, wú̵ń mbaa waa míí.

⁸A̧máa nán dú̵ú̵ vu̵, kan nán ku̵u̵ 'yɛ́n zó̧ó̧ voo Tayɨɨ woolı̵́ né máa vu̵, kan ı̵́ ku̵u̵ kɔ́ hȩn zó̧ó̧ fá̧á̧lȩ́ Tayɨɨ woo, kan ı̵́ nɔm nɔɔné vu̵, kan nán ɓáa kɔ́lı̵́ vu̵, kan nán ndu̵n vu̵, kan nán tayɨɨ lee duulí vu̵, kan nán vbád vu̵ 'waapád máa, ya mbaalı̵́ voo wú̵ń dɨ ya vee gbo̧o̧ a hi̧' kan kíd vee tóó yȩlȩ́. Wu̵ nɔm ı̵́ idú woo.”

⁹Maleeka dágá sa̧a̧m maleeka ı̵́ gúndɛm vu̵n tíd ɗag waa ku̵u̵ hi̧' kan hȩn ndɔ́gɔné sí̧'í̧d pee ya o̧n: “Yaa ú̵. Míń tú'um wakȩ́ȩ́ ku̵u̵ pú̵gu̵ lig yȩ, wə̧ə̧ wu̵ mbee waaɨ.”

¹⁰Yigid Tayɨɨ woo ma'an, maleeka yȩ ya gaŋ dɔgɔn mí yúú gu̵u̵ lú̵gú̵d gbo̧o̧ tóólı̵́, tú'un kaa gbaŋ Tayɨɨ woo Yerúsalem ba sí zu̵u̵ be"ı̵́ Tayɨɨ woolı̵́ pee.

¹¹Tú kan túlí Tayɨɨ woo. Kaa yȩ gáálı̵́ woo tú mbaa gbar kɔ́ ı̵́ 'yɛgɛ hee wɔgɔ, tú kɔ́ ı̵́ daadugee wɔgɔ kə́lə́ŋ́.

¹²Dɨ kan dəə gbo̧o̧ ba'a. Vu̵ gbɔ dəə woo lú̵gga wu̵lı̵́. Dɨ kan ya̧g dɔ́m wa̧nɓó' zu̵u̵ idú; maleeka wa̧nɓó' zu̵u̵ idú vu̵u̵ tu̵ ya̧g dɔ́m yȩ vu̵. Vu̵ bíńda yéé zig Izraɛ́l voo wa̧nɓó' zu̵u̵ idú á̧ḿ duu ya̧g dɔ́m yȩ vu̵lı̵́.

¹³Ka' 'waapád dɨ kan ya̧g dɔ́m ta̧a̧nɔ́ ta̧a̧nɔ́. Ta̧a̧nɔ́ ka' mam na'alȩ́, ta̧a̧nɔ́ ka' mam gbɔ́zammé, ta̧a̧nɔ́ ka' mam wázammé, ta̧a̧nɔ́ ka' mam waalı̵́.

¹⁴Dəə yȩ vu̵ pɛddu̵ yúú 'yɛgɛ wa̧nɓó' zu̵u̵ idú vu̵lı̵́. Vu̵ bíńda yéé waa ba'ad mbee waa woo voo wa̧nɓó' zu̵u̵ idú á̧ḿ yúú 'yɛgɛ yȩ vu̵lı̵́.

¹⁵Maleeka ka o̧n moo yȩ pa̧ŋ hȩn hȩn gú̵ggı̵́ do̧' nagá, mbaa kɔ́ ı̵́ dȩ' wɔgɔ, moo bi gú̵g kaa gbaŋ yȩ, kan ya̧g dɔ́m woo, kan dəə woo á̧ḿ.

¹⁶Kaa yȩ neelȩ́ woo man daa kííd ka' ndaddú̵ á̧ḿ. Maleeka pee gú̵g kaa pee kan dȩ' woo pee. Dɨ kílomɛ́ɛtər uzinɛɛre idú kan tȩmɛre idú. Neelȩ́ woo kan lú̵gú̵d woo kan lú̵gú̵d woo dɔg yúba á̧ḿ, vu̵ man kííd.

¹⁷Maleeka duu gú̵g dəə lú̵gú̵d woo, ká dɨ kan mɛ́ɛtər vo' gúú zu̵u̵ nɔ́nɔ́ kɔ́ ı̵́ nán ku̵u̵ baa gú̵g máa wɔgɔ. Maleeka gú̵ggu̵ ı̵́ yo̧go̧.

¹⁸Vu̵ yo̧o̧ dəə yȩ kan 'yɛgɛ pu̧"i̧. Kaa sú̵u̵ vu̵ yo̧o̧wo̧ woo kan do̧' dȩ"ȩ́ na'a, ba daa ho̧ la nɔ́ɔ́ pig woolı̵́ kɔ́ ı̵́ vɛ́r wɔgɔ.

¹⁹Kaa yȩ ku̵u̵ pɛddu̵ máa, vu̵ mbɔ́ggu̵ kan 'yɛgɛ bó̧' vu̵ kə́dkə́d. 'Yɛgɛ ku̵u̵ dəŋ 'yɛ́ zu̵u̵ hágá máa, 'yɛgɛ pu̧"i̧; ı̵́ idú woo máa, 'yɛgɛ zargínaɨ. Ɨ́ ta̧a̧nɔ́ woo ke'ed pu̧"i̧. Ɨ́ ndaddú̵ woo hó̧d vȩ́'ȩdɨ.

²⁰Ɨ́ nɔ́nɔ́ woo 'yɛgɛ yȩ́ȩ́ȩ, ı̵́ gúú woo mbaa ɨg'ɨg, ı̵́ gúndɛm woo 'yɛgɛ maŋgínaɨ, ı̵́ ka'andaddú̵ woo mbaa bɛd sɨlı̵́ɨ, ı̵́ kɛ́gdágá woo mbaa ke'ed hɛɛbná. Ɨ́ wa̧nɓó' woo mbaa bɨɨg ha'adná. Ɨ́ wa̧nɓó' zu̵u̵ dágá woo mbaa bɛd yȩȩgná. Ɨ́ wa̧nɓó' zu̵u̵ idú woo mbaa həhəlı̵́.

²¹Ya̧g dɔ́m wa̧nɓó' zu̵u̵ idú á̧ḿ vu̵ mbɔ́g vu̵ kan zaŋ kɨkɨɨ hee dágá yȩ nɔ, ya voo wa̧nɓó' zu̵u̵ idú á̧ḿ. Na'am woo maa do̧' hee mɛ́ń, ba daa ho̧ la nɔ́ɔ́ pig woolı̵́ kɔ́ ı̵́ vɛ́r wɔgɔ.

²²Mí ho̧n lig hȩn ha"ı̵́ tóó kaa yȩlȩ́ né, moo Tayɨɨ ı̵́ 'yɛ́lı̵́ baa ví ka mba hȩn 'waapád yȩ, aga wu̵ lig hȩn ha"ı̵́ sú̵u̵, kan mbee waa yȩ á̧ḿ.

²³Kaa yȩ duu maa zá̧ga̧ ba tún sı̵́ wu̵lı̵́ né, kan sȩȩ á̧ḿ, moo túlí Tayɨɨ woo wu̵ dɨ túlí wu̵lı̵́. Mbee waa wu̵ lám woo á̧ḿ.

²⁴Zig nán 'waapád vú̵ń 'yȩm ya túlí woolı̵́. Gbanii hágá yɛ vú̵ń pa̧ŋ hȩn naa voo vu̵ yaan wu̵lı̵́ á̧ḿ.

²⁵Ya̧g dɔ́m kaa yȩ vú̵ń mbaa tə́ədná zá̧ga̧ 'waapád; vú̵ń tú̵'u̵nɔ né sá̧ḿ, moo wu̵lı̵́ máa, vid wu̵lı̵́ pɛ́lı̵́.

²⁶Nán vú̵ń pa̧ŋ hȩn gbo̧o̧ zig nán voo vu̵ yaan wu̵lı̵́, kan hȩn naa voo vu̵ á̧ḿ.

²⁷A̧máa hȩn ví̧i̧g tóó wú̵ń dɔ́n kaa yȩlȩ́ né, kóó nán ı̵́ ku̵u̵ kɔ́ hȩn zó̧ó̧ fá̧á̧lȩ́ Tayɨɨ woo máa vu̵, kan nán vbád vu̵ á̧ḿ. Séý nán ı̵́ ku̵u̵ bíńda yéé voo debtere dɔ́lı̵́ gbaŋ waalı̵́ Tayɨɨ woolı̵́ máa vu̵ yu̵, debtere ı̵́ mbee waa yȩ woo nɔ.