Read Dii DEBTERE HȨN HO̧LȨ́ 3 Bible Online

DEBTERE HȨN HO̧LȨ́ 3 - Dii bible

DEBTERE HȨN HO̧LȨ́ 3

¹Nán yȩ duu o̧n: “A̧m bíńda ba'ad maleeka ı̵́ nán sú̵ggı̵́ voo kaa Sadésdı̵́ yȩ ó̧, mɔ́ o̧ddu̵: ‘Ɨ́ ka dɨ kan yigid Tayɨɨ woo vu̵ gúndɛm, kan zoo waa vu̵ gúndɛm yȩ, hȩn ka o̧ máa wu̵ yɛ nɔ: Mí gaa hȩn káḿ kɔ́ yȩ vu̵ 'waapád; mí gaa nán vu̵ taa ba mɔ́n nán zá̧a̧dɨ, a̧máa mɔ́ nɔɔ sú̵'ú̵.

²A̧m níḿ dɔggú̵! Hȩn ı̵́ ka kéé mbaa yȩ, a̧m tu̵gu̵ ú̵, moo kan nɔɔ la kəd, moo mí ho̧ ba'ad móó vu̵ sí̧'i̧ ná gbug tíŋ́ Tayɨɨ míí woolı̵́ né.

³A̧m taa moo ká ku̵u̵ tú'um má nɔ. A̧m taa ká ba bin ki nɛ́nná! A̧m kid moo tú"í yȩ tɔ́g, a̧m kéé hȩn ɓı̵́d móó vu̵ gbɔ ú̵! Tow a̧m ním ní tée, míń laa dɨlı̵́, míń lɔgɔm ya kɔ́ ı̵́ nán líw wɔgɔ, mɔ́ń gaan sey woo né á̧ḿ.

⁴Kóó ı̵́ yo̧go̧ si̧', nán tóó vu̵ dɨ Sadésdı̵́, vu̵ vi̧i̧ ná sa̧a̧m voo né. Vú̵ń 'yȩm kan mí, vú̵ń dɔ́ sa̧a̧m hee, moo vu̵ maa voo sa̧a̧m hee wu̵ dɔ́lı̵́.

⁵Ɨ́ a mba hȩn zo"ı̵́ máa, wú̵ń dɔ́ sa̧a̧m hee ı̵́ yo̧go̧ á̧ḿ. Míń na'an yéé woo debtere dɔ́lı̵́ gbaŋ waalı̵́ Tayɨɨ woolı̵́ né. Míń o̧d Ba' míí kan maleeka woo vu̵ ba vu̵n nán míí vu̵ yu̵.

⁶‘Nán a dɨ kan tɔ́ggú̵ tée, a ki moo yigid Tayɨɨ woo ka o̧d nán sú̵ggı̵́ vu̵ yȩ du̵u̵lı̵́ na'a.’ ”

⁷Nán yȩ duu o̧n: “A̧m bíńda ba'ad maleeka ı̵́ nán sú̵ggı̵́ voo kaa Filadelfíilí yȩ ó̧, mɔ́ o̧ddu̵: ‘Ɨ́ ka mbaa hȩn gbo̧o̧, ı̵́ yȩ́ń, ka dɨ kan waa makúblí gbanii Daavíd woo, a tu̵'u̵ ya̧gníim tée, nán tóó wú̵ń duu tú̵'u̵ né, a tú̵' ya̧gníim tée, nán tóó wú̵ń duu tu̵'u̵ né, máa wu̵ o̧ moo yɛ nɔ:

⁸Mí gaa hȩn káḿ kɔ́ yȩ vu̵ 'waapád; mí gaa néélȩ́ móó ɓu̵u̵ né. Kóó ı̵́ yo̧go̧ si̧', mɔ́ ki tɔ́g yúú moo míílí̧, mɔ́ kéé gbɔn mí ní. Mí tu̵'u̵ ya̧gníim 'yɛ́m sú̵'ú̵, nán tóó wú̵ń duu tú̵'u̵ né.

⁹A̧m ki ú! Hȩn a̧n kɔ́d nán sú̵ggı̵́ Seeɗán woo vu̵ máa wu̵ yɛ nɔ. Nán vbád yȩ vu̵ tú' fó̧ó̧ voo bin nán Yúúda vu̵ yu̵, a̧máa vu̵ nán Yúúda vu̵ yu̵ pɛ́lı̵́. Míń kɔ́ vu̵, vú̵ń ya nə'əy tíŋ́ móólȩ́, vú̵ń na'am, vú̵ń gaa ba mín hí̧i̧mɔ́.

¹⁰Káḿ tu̵ moo míí, moo a̧m ma' zó̧ó̧ móó yȩ, mí á̧ḿ, míń tu̵m zá̧ga̧ hȩn gíḿ a dɨ yaalı̵́ hág 'waapád yȩlȩ́. Hȩn woo wú̵ń kɔ́y, moo míń gu̵g nán ku̵u̵ mbaa hágá yȩ vu̵ yu̵.

¹¹Míń yaa vaŋná. A̧m tíd hȩn káḿ dɨ kannɔ yȩ néélȩ́ na'a, moo nán tóó kan vbim hȩn sú̵ú̵lı̵́ móó yȩ ó̧.

¹²Nán ı̵́ ka mba hȩn zo"ı̵́ máa, míń 'yɛ́gɛ kɔ́ ı̵́ gimsígi wɔgɔ lig hȩn ha"ı̵́ Tayɨɨ míí woolı̵́, wú̵ń vún wu̵lı̵́ né sá̧ḿ. Míń bíńda yéé Tayɨɨ míí woo yúú woolı̵́, kan yéé kaa gbaŋ Tayɨɨ míí woo yúú woolı̵́ á̧ḿ. Wu̵ Yerúsalem 'maŋ; wú̵ń sí zu̵u̵ be"ı̵́ Tayɨɨ míí woolı̵́ pi nu. Míń bíńda yéé 'maŋ míí yúú woolı̵́ á̧ḿ.

¹³‘Nán a dɨ kan tɔ́ggú̵ tée, a ki moo yigid Tayɨɨ woo ka o̧d nán sú̵ggı̵́ vu̵ yȩ du̵u̵lı̵́ na'a.’ ”

¹⁴Nán yȩ duu o̧n: “A̧m bíńda ba'ad maleeka ı̵́ nán sú̵ggı̵́ voo kaa Lawdiséelı̵́ yȩ ó̧, mɔ́ o̧ddu̵: ‘Ɨ́ ku̵u̵ beewu̵ Aamɛ́n, ı̵́ ya̧g du̵lı̵́ yȩ́ń, ka buun ya̧g talı̵́ woo né, ká dəŋ yɨb hȩn Tayɨɨ woo 'waapád yȩ, o̧ ná':

¹⁵Hȩn káḿ kɔ́ yȩ, mí gaa 'waapád. Mí gaa, mɔ́ ka̧'a̧ né; ma mɔ́ pin ní á̧ḿ. Máa, mí hí̧í̧ a̧m pi, tóó tée, mɔ́ ka̧' la kəd.

¹⁶A̧máa káḿ pi də́ń lúglúg, káḿ ka̧'a̧ né, káḿ pin ní á̧ḿ yȩ, míń dɨm bȩ́nnée!

¹⁷Mɔ́ o̧ móó ba bin ı̵́ naaɨ, ba bin nuŋ hȩn du̵u̵ vu̵ yu̵, hȩn tóó ba geen bi ní sá̧ḿ. A̧máa mɔ́ gaan ba binnɔ mbaan ı̵́ ko̧go̧né kan ı̵́ gíḿmi ní! A̧máa móo nán gíḿ, mɔ́ yə̧mme, mɔ́ mbaa fó̧ó̧ leene á̧ḿ.

¹⁸Moo woo nɔ, mí o̧m, a̧m hɨ do̧' ı̵́ ku̵u̵ pɛ máa míílí̧, tée mɔ́ń kɔ́ naa. A̧m hɨ sa̧a̧m hee á̧ḿ, mɔ́ wáan fó̧ó̧ móó wu̵lı̵́, mɔ́ń yu̵g fó̧ó̧ lee móó yȩ wu̵lı̵́, sȩ́ḿ a kɔ́m sá. A̧m hɨ gam nɔ́ɔ́, mɔ́ təg, mɔ́ ho̧ nɔ́ɔ́ á̧ḿ.

¹⁹Ɨ́ míí nán káń hí̧í̧ vu̵ máa, mí tu̵ vu̵ yu̵, mí si̧'i̧d vu̵ yu̵ á̧ḿ. A̧m pi zó̧ó̧, a̧m kéé hȩn ɓı̵́d móó vu̵ gbɔ ú̵!

²⁰A̧m ki ú! Mí dii dɨ ya̧gníimí, mí wa̧a̧ bı̵́gı̵́. Tow nán tóó a ki yɛ́g míí, a tú̵'u̵n ya̧gníim tée, míń dɔ́ woolı̵́, míń lá hȩn kannɔ, wú̵ń lá kan mí á̧ḿ.

²¹Nán ı̵́ a mba hȩn zo"ı̵́ máa, míń pú̵gu̵ néélȩ́, wú̵ń mbaa kan mí láan míílí̧ kɔ́ ı̵́ káń mba hȩn zo"ı̵́, ma káń mbaa kan Ba' míí láan woolı̵́ yȩ wɔgɔ.

²²‘Nán a dɨ kan tɔ́ggú̵ tée, a ki moo yigid Tayɨɨ woo ka o̧d nán sú̵ggı̵́ vu̵ yȩ du̵u̵lı̵́ na'a.’ ”