Read Dii DEBTERE HȨN HO̧LȨ́ 4 Bible Online

DEBTERE HȨN HO̧LȨ́ 4 - Dii bible

DEBTERE HȨN HO̧LȨ́ 4

¹Pig woolı̵́ máa, mí duu ho̧ hȩn tóó. Mí ho̧ ya̧gníim be' tú̵'ú̵. Yɛ́g ká moo ı̵́ ga̧' naa wɔgɔ, káń ki pee, o̧n: “A̧m ɗáá dɔg yɛlı̵́, míń tú'um hȩn a dɨ yaalı̵́ pig hȩn yȩlȩ́ máa.”

²Yigid Tayɨɨ woo ya ma'an vaŋná dɔgɔn mí woolı̵́ be"ı̵́. Láan tóó ká du̵u̵lı̵́, nán tóó ɗáá mbaa yúú woolı̵́,

³tú ya za̧y kɔ́ ı̵́ do̧' wɔgɔ, kɔ́ ı̵́ 'yɛgɛ yȩ́ȩ́ tóó wɔgɔ á̧ḿ. Mam vȩŋ dȩy daa kan láan pee, gáá kɔ́ ı̵́ 'yɛgɛ hó̧d vȩ́'ȩd tóó wɔgɔ.

⁴Láan tóó vu̵ gbɛg zu̵u̵ ndaddú̵ vu̵ gbɔ daa kan láan gbaŋ pee. Nán ı̵́ nii tóó vu̵ gbɛg zu̵u̵ ndaddú̵ vu̵ dɔ́ sa̧a̧m hee vu̵, vu̵ mééta mɛɛtawəl do̧' vu̵, vu̵ mbaa yúú láan yȩ vu̵lı̵́.

⁵Mam yȩ́d nɔ́ɔ́ vúd ya láan gbaŋŋı̵́, kan hȩn úúlí vu̵, kan hȩn séené vu̵ kɔ́ ı̵́ bó̧ó̧ wɔgɔ. Vu̵ mu' vee káláŋ́ tóó vu̵lı̵́ gúndɛm, tú ya tíŋ́ láan peelı̵́; káláŋ́ yȩ vu̵ yigid Tayɨɨ woo vu̵ yu̵.

⁶Hȩn tóó ká mbaa dɨ tíŋ́ láan gbaŋ yȩlȩ́ á̧ḿ, man kan mam gbo̧o̧ tóó ku̵u̵ mbɔ́ggu̵ kan 'yɛgɛ hee má nɔ. Tú mbaa kə́lə́ŋ́ kɔ́ ı̵́ daadugee wɔgɔ. Hȩn zá̧a̧d tóó vu̵ ndaddú̵, vu̵ dɨ kan nɔ́ɔ́ tóó vu̵ ɓu̵u̵lı̵́ na'a kɔɔgı̵́ kan tíŋ́ á̧ḿ, vu̵ mbaa daa kan láan gbaŋ peelı̵́.

⁷Hȩn zá̧a̧d yȩ tóó dágá mbaa kɔ́ ı̵́ kəə wɔgɔ. Ɨ́ idú woo mbaa kɔ́ ı̵́ ndaa waa wɔgɔ. Ɨ́ ta̧a̧nɔ́ woo ya̧g túń woo mbaa kɔ́ ı̵́ nánán wɔgɔ. Ɨ́ ndaddú̵ woo mbaa kɔ́ ı̵́ bo̧o̧ ka úg daa máa wɔgɔ.

⁸Ya voo ndaddú̵ á̧ḿ, kóó nɔ́nná dɨ kan kpakpag gúú gúú. Vu̵ ho̧ nɔ́ɔ́ voo vu̵ ya 'waapád, pig kan tíŋ́ á̧ḿ. Vu̵ bee yéé gən né, vid kan zá̧ga̧ á̧ḿ, vu̵ o̧: “Hȩn gbo̧o̧, hȩn gbo̧o̧, hȩn gbo̧o̧, wu̵ Tayɨɨ ı̵́ 'yɛ́lı̵́ baa ví, wu̵ mba hȩn 'waapád, ı̵́ ká dɨlı̵́, ı̵́ ka dɨ mbaalı̵́ yȩ, ı̵́ a dɨ yaalı̵́ yȩ á̧ḿ.”

⁹Sey 'waapád hȩn zá̧a̧d ndaddú̵ yȩ vu̵ dɨ yéé beelı̵́, vu̵ kə̧́' ı̵́ ka mbaa láan gbaŋŋı̵́ yȩ, vu̵ na"o̧, vu̵ dȩn ı̵́ ka dɨ mbaalı̵́ há̧á̧ káákáá yȩ nag.

¹⁰Ma ı̵́ nii gbɛg zu̵u̵ ndaddú̵ pee vu̵ gu doo núug tíŋ́ ı̵́ ka mbaa láané pee woolı̵́, vu̵ na' ı̵́ ka dɨ mbaalı̵́ há̧á̧ káákáá yȩ. Vu̵ buu mɛɛtawəl voo vu̵ la gbɔ do' láané, vu̵ o̧:

¹¹“Tayɨɨ ı̵́ 'yɛ́lı̵́ vóó, móo maa a̧m nuŋ na"ȩ́, kan kə̧́"ȩ́, kan néélȩ́ á̧ḿ, moo móo yɨb hȩn vu̵ 'waapád. Hȩn 'waapád vu̵ yı̵́b kan hí̧í̧lí̧ móó nɔ.”