Read Dii DEBTERE HȨN HO̧LȨ́ 5 Bible Online

DEBTERE HȨN HO̧LȨ́ 5 - Dii bible

DEBTERE HȨN HO̧LȨ́ 5

¹Pig woolı̵́ máa, mí ho̧ debtere kalı̵́ tóó nag nán ı̵́ ka mbaa láané pee woolı̵́. Vu̵ bíńda hȩn pig woolı̵́, kan tíŋ́ woolı̵́ á̧ḿ, vu̵ sȩȩb ya gúndɛm, vu̵ zuŋ tumbal duu wu̵lı̵́ á̧ḿ.

²Ma mí ho̧ maleeka tóó ka mba daga vu̵ máa, moo moo dɔg yúba, o̧: “Nóo sı̵́ń dɨ kan néélȩ́ dɛ hȩn sȩȩmné yɛ vu̵, ma sı̵́ń buu debtere yɛlá?”

³A̧máa nán tóó dágá aga pɛ́lı̵́, kóó be"ı̵́, kóó hágá, kóó hág tíŋ́, ba nuŋ néélȩ́ debtere yȩ buuní moo bi ho̧ tíŋ́ woo ú̵ máa pɛ́lı̵́.

⁴Ma mí ká̧ŋ́ há̧á̧, moo nán tóó dágá aga nugun néélȩ́ moo debtere yȩ buuní woo, bi ho̧n tíŋ́ woo ú̵ né.

⁵A̧máa ı̵́ nii dágá sa̧a̧m ı̵́ nii pee voolı̵́ o̧n: “A̧m ká̧ŋ́ sá. A̧m ho̧ kəə zig Yúúda woo, kan gbanii zig Daavíd woo mba hȩn sú̵'ú̵. Wú̵ń dɨ kan néélȩ́ dɛ hȩn sȩȩmné gúndɛm yȩ, wú̵ńnɔ buu debtere yȩ á̧ḿ.”

⁶Mí duu ho̧ mbee waa dii sa̧a̧m láan kan hȩn zá̧a̧d ndaddú̵ pee voolı̵́, vu̵ gbɔ daa kannɔ sa̧a̧m ı̵́ nii pee voolı̵́ á̧ḿ. Mbee waa yȩ mbaa kɔ́ ı̵́ ku̵u̵ sə̧"o̧ sú̵'ú̵ máa wɔgɔ. Dɨ kan ga̧' gúndɛm, kan nɔ́ɔ́ gúndɛm. Hȩn yȩ vu̵ yigid Tayɨɨ woo ka ba' vu̵ laan hág 'waapád máa vu̵ yu̵.

⁷Mbee waa pee séé la ɓɛ debtere kalı̵́ pee nag nán ı̵́ ba mbaa láané pee woolı̵́.

⁸Sey mbee waa ka ɓɛ debtere kalı̵́ yȩ máa, hȩn zá̧a̧d ndaddú̵ pee vu̵, kan ı̵́ nii gbɛg zu̵u̵ ndaddú̵ pee, vu̵ ya gu doo núug woolı̵́ tíŋ́. Kóó nɔ́nná dɨ kan ko̧ŋ nagá, kan tɨg do̧', zu̵gu̵ sa̧g to̧o̧ hi̧' tíŋ́ woolı̵́. Tɨg do̧' yȩ vu̵ hȩn nag dȩné nán Tayɨɨ woo voo vu̵ yu̵.

⁹Vu̵ bee yéé Tayɨɨ na"ȩ́ 'maŋ tóó, vu̵ o̧: “Debtere yȩ maam móó ɓɛlı̵́ ú̵! Hȩn sȩȩmné yȩ maam móó dɛlı̵́ ú̵ á̧ḿ, moo vu̵ nɔɔm, mɔ́ ɓɛ mɛm móó, mɔ́ sən nán vu̵ wu̵lı̵́ pa̧ŋ laan Tayɨɨ woolı̵́, kan nán zig kə́dkə́d, kan ya̧g kə́dkə́d, kan dúú kə́dkə́d, kan hág vu̵ kə́dkə́d 'waapád.

¹⁰Mɔ́ mbɔ́g vu̵ zig Tayɨɨ baa ví woo, u̵u̵ tii nán hȩn ha"ı̵́ woo vu̵; vú̵ń waa gbaŋ hágá yɛlı̵́ á̧ḿ.”

¹¹Mí duu ho̧ hȩn tóó, mí ki maleeka vu̵ ɓu̵u̵lı̵́ na'a, vu̵ dɨ miliyó̧ŋ kan miliyó̧ŋ, há̧á̧ miliyó̧ŋ uzinɛɛre. Vu̵ dii daa kan láané, kan hȩn zá̧a̧d pee vu̵, kan ı̵́ nii pee vu̵ á̧ḿ,

¹²vu̵ bee yéé dɔg há̧á̧ yúba, vu̵ o̧: “Mbee waa ká ku̵u̵ nɔɔwo̧ yȩ, maa ba wu̵ nuŋ hȩn mbalı̵́, kan hȩn naa, kan hȩn gaalı̵́, kan néélȩ́, kan hȩn dəmné, kan na"ȩ́, kan hȩn kə̧́"ȩ́ á̧ḿ!”

¹³Mí duu ki hȩn Tayɨɨ ka yɨb vu̵ be"ı̵́, kan hȩn ı̵́ hágá yɛ vu̵, kan hȩn ı̵́ hág tíŋ́ vu̵, kan ı̵́ mam tíŋ́ vu̵, hȩn Tayɨɨ ka yɨb vu̵ 'waapád yȩ, vu̵ bee yéé, vu̵ o̧: “Ɨ́ ka mbaa láané yȩ, kan mbee waa yȩ, ba kə̧́' vu̵ ví, ba na' vu̵ ví, ba dəm vu̵ ví; néélȩ́ á̧ḿ a mbaad vu̵ yu̵ há̧á̧ káákáá!”

¹⁴Hȩn zá̧a̧d ndaddú̵ pee vu̵ hí̧í̧: “Aamɛ́n!” Ɨ́ nii pee vu̵ gu doo núug hágá, vu̵ na' vu̵ á̧ḿ.