Read Dii DEBTERE HȨN HO̧LȨ́ 6 Bible Online

DEBTERE HȨN HO̧LȨ́ 6 - Dii bible

DEBTERE HȨN HO̧LȨ́ 6

¹Pig woolı̵́ máa, mí ho̧ mbee waa pee dɛ hȩn sȩȩmné gúndɛm pee dágá. Hȩn zá̧a̧d dágá sa̧a̧m ı̵́ ndaddú̵ pee voolı̵́ moo yɛ́g tóó kɔ́ ı̵́ bó̧ó̧ wɔgɔ, o̧: “Yaa ú̵!”

²Mí duu tə́g nɔ́ɔ́, mí ho̧ go'oy tóó mbaa heená. Nán ka ɗáá mbaa yúú woolı̵́ máa, dɨ kan kpaa nagá, vu̵ pú̵gu̵ mɛɛtawəl. Vúd la mba hȩn sú̵'ú̵, wú̵ń duu mba hȩn tóó.

³Pig woolı̵́ máa, mbee waa pee duu dɛ hȩn sȩȩmné ı̵́ idú woo. Hȩn zá̧a̧d ı̵́ idú woo duu o̧: “Yaa ú̵!”

⁴Go'oy tóó vúd ya, mbaa yȩ́ȩ́ná. Nán ka ɗáá yúú woolı̵́ máa, nuŋ néélȩ́ ya̧g sɨɨ yȩ"ȩ́ hágá yɛlı̵́, moo nán u̵u̵ nɔ́ɔ́n ya voolı̵́. Vu̵ pú̵gu̵ pag naa gbo̧o̧ ba'a.

⁵Pig woolı̵́ máa, mbee waa pee duu dɛ hȩn sȩȩmné ı̵́ ta̧a̧nɔ́ woo. Ma hȩn zá̧a̧d ı̵́ ta̧a̧nɔ́ woo o̧: “Yaa ú̵!” Mí duu tə́g nɔ́ɔ́, mí ho̧ go'oy tóó mbaa diiná. Nán ka ɗáá yúú woolı̵́ máa, pa̧ŋ hȩn hȩn gú̵ggı̵́ nagá.

⁶Mí ki yɛ́g tóó vúd ya sa̧a̧m hȩn zá̧a̧d ndaddú̵ pee voolı̵́, o̧: “A̧m gú̵g tú̵d ááwa dágá, tée vú̵ń sú̵ú̵ man kan hȩn sú̵ú̵lı̵́ ba'ad zá̧ga̧ dágáɨ.[4] Tóó tée, lugubaa ááwa ta̧a̧nɔ́, u̵u̵ sú̵ú̵ hȩn dágá yɛ nɔ á̧ḿ. A̧máa a̧m lı̵́d kúḿ kan doo la' líid máa vu̵ sá.”

⁷Mbee waa pee ka duu dɛ hȩn sȩȩmné ı̵́ ndaddú̵ woo máa, mí ki hȩn zá̧a̧d ı̵́ ndaddú̵ woo o̧: “Yaa ú̵!”

⁸Mí duu tə́g nɔ́ɔ́, mí ho̧ go'oy tóó mbaa kubkub. Nán ka ɗáá yúú woolı̵́ máa, yéé woo nɔm. Ɨ́ ka waa gbaŋ yúú kaa nɔmmé máa, dugu pigim. Ku̵u̵ yȩ'ȩn hág ka' ndaddú̵ yȩ máa, vu̵ gɛ dágá pú̵ vu̵, moo u̵u̵ nɔɔ nán vu̵ kan táa,[5] kan go̧o̧m, kan ho̧o̧, kan hȩn nɔm ma"ȩ́ hágá yɛlı̵́ vu̵.

⁹Mbee waa ka dɛ hȩn sȩȩmné ı̵́ nɔ́nɔ́ woo máa, mí ho̧ yigid nán kú̵u̵ tú' moo Tayɨɨ woo, kú̵u̵ du̵ ya̧g yúú woolı̵́, kú̵u̵ nɔɔ vu̵ máa voo. Vu̵ mbaa hágá ya hȩn ha"ı̵́lı̵́.

¹⁰Vu̵ moo yɛ́g dɔg yúba, vu̵ vi: “Ɨ́ 'yɛ́lı̵́ vóó, ı̵́ hȩn gbo̧o̧, ı̵́ yȩ́ń, mɔ́ laa bi sə̧'ə̧d nán ku̵u̵ nɔɔ vɔ́ hágá yȩ vu̵ moo, bi si̧'i̧d vu̵ sey woo tɛ́lá?”

¹¹Tayɨɨ pú̵ vu̵ kóó nɔ́nná sa̧a̧m dɔ́lı̵́ heená heená; o̧d vu̵ u̵u̵ duu ma' zó̧ó̧ waaná', há̧á̧ nán gaa Tayɨɨ sá ba u̵u̵ nɔɔ nán kirtȩ́n tóó vu̵, kan daga ba'ad kɔ́lı̵́ tóó vu̵, kɔ́ ı̵́ ku̵u̵ nɔɔ vu̵ yȩ wɔgɔ, há̧á̧ u̵u̵ wá' vu̵ u̵u̵ dɔ́ sé' woolı̵́ pȩ́ń.

¹²Pig woolı̵́ máa, mí duu ho̧ mbee waa pee dɛ hȩn sȩȩmné ı̵́ gúú woo. Hág nam gbo̧o̧ ba'a. Zá̧ga̧ tii mbaa diiná kɔ́ ı̵́ sa̧a̧m yɛd diilí tóó wɔgɔ. Sȩȩ tii woo yȩ́ȩ́ná kɔ́ ı̵́ mɛm wɔgɔ.

¹³Zoo waa vu̵ to̧'o̧ pee zu̵u̵ hágá kɔ́ ı̵́ sápéém ka to̧'o̧ máŋ́gɔlɔŋ viŋ gbóo zu̵u̵ hágá máa wɔgɔ.

¹⁴Be' lúú ti la kɔ́ ı̵́ ku̵u̵ ka píg luu máa wɔgɔ. Gu̵u̵ vu̵, kan mam bam vu̵ lúú ya mbaalı̵́ voo vu̵ gbɔ.

¹⁵Gbanii hágá yɛ vu̵, kan nán gbo̧o̧ vu̵, kan gbaŋ sɨɨ vu̵, kan ı̵́ naa vu̵, kan ı̵́ hȩn mbalı̵́ vu̵, kan nán tóó vu̵ 'waapád, kóó gba'a, kóó nán ı̵́ ku̵u̵ mbaa vəg lee máa vu̵ á̧ḿ, vu̵ yú̵g ndɔ́ggı̵́ kan zig 'yɛgɛ gbo̧o̧ tóó vu̵lı̵́ gu̵u̵lı̵́.

¹⁶Vu̵ o̧d gu̵u̵ vu̵, kan 'yɛgɛ vu̵: “I ya pee vóólı̵́ yúlí! I wáá vɔ́ ya ú̵! I yu̵g vɔ́ ɗiilí na'a, moo ı̵́ ka mbaa láané yȩ kan ho̧ vɔ́, mbee waa yȩ kan si̧'i̧d vɔ́ ú̵!

¹⁷Zá̧ga̧ hȩn si̧'i̧ní vóó ya̧ sú̵'ú̵. Nóo sı̵́ń nda doo kan vu̵lá?”