Read Dii DEBTERE HȨN HO̧LȨ́ 7 Bible Online

DEBTERE HȨN HO̧LȨ́ 7 - Dii bible

DEBTERE HȨN HO̧LȨ́ 7

¹Pig hȩn yȩ vu̵lı̵́ máa, mí duu ho̧ maleeka tóó vu̵ ndaddú̵, vu̵ dii ya hág nduguyní ka' ndaddú̵ yȩ[6] vu̵lı̵́. Vu̵ há' sápéém a pɛ hágá yɛlı̵́ sá, kóó yúú mammé, kóó yúú la' vu̵lı̵́ á̧ḿ.

²Mí duu ho̧ maleeka tóó ɗáá vúd dɔg ka' mam na'alȩ́, tíd tumbal Tayɨɨ ı̵́ zá̧a̧d woo nagá. Moo moo dɔg yúba o̧d maleeka ı̵́ ndaddú̵ ku̵u̵ nuŋ néélȩ́ moo hág lı̵́nné, kan mam á̧ḿ pee vu̵,

³o̧: “I kɔ́d hág hȩn ɓı̵́d sá, kóó mam, kóó la' vu̵, há̧á̧ a ya̧ séý vɔ́ zuŋ tumbal ya̧g túń nán ba'ad Tayɨɨ woo voolı̵́ pȩ́ń.”

⁴Vu̵ wá' nán Tayɨɨ woo ku̵u̵ zuŋ tumbal ya̧g túń voolı̵́ máa tú'un vu̵. Vu̵ dɨ fó̧ó̧ 144.000 sa̧a̧m zig Izraɛ́l woolı̵́ 'waapád,

⁵fó̧ó̧ 12.000 zig Yúúda woolı̵́, fó̧ó̧ 12.000 zig Rúbɛn woolı̵́, fó̧ó̧ 12.000 zig Gád woolı̵́,

⁶fó̧ó̧ 12.000 zig Asɛ́r woolı̵́, fó̧ó̧ 12.000 zig Nɛbtalíi woolı̵́, fó̧ó̧ 12.000 zig Manasée woolı̵́,

⁷fó̧ó̧ 12.000 zig Simió̧ŋ woolı̵́, fó̧ó̧ 12.000 zig Levíd woolı̵́, fó̧ó̧ 12.000 zig Izakár woolı̵́,

⁸fó̧ó̧ 12.000 zig Zabulɔ́ŋ woolı̵́, fó̧ó̧ 12.000 zig Yu̵u̵séfu woolı̵́, fó̧ó̧ 12.000 zig Bɛnzamɛ́ŋ woolı̵́.

⁹Pig hȩn yȩ vu̵lı̵́ máa, mí duu tə́g nɔ́ɔ́, mí ho̧ dúú sa̧ga̧ tóó vu̵, ba wá' vu̵ 'waa né. Vu̵ vúd zig nán voolı̵́ 'waapád. Zig 'waapád du̵u̵lı̵́, kan dúú 'waapád, kan ya̧g 'waapád á̧ḿ. Vu̵ dii láan peelı̵́, tíŋ́ mbee waa woolı̵́, vu̵ dɔ́ sa̧a̧m hee vu̵, vu̵ tíd kpag vag vu̵ nagá.

¹⁰Ma vu̵ lɛ́g dɔg yúba, vu̵ o̧: “Sənné vóó yaa Tayɨɨ vóó ı̵́ ka mbaa láané, kan mbee waa á̧ḿ yȩ woolı̵́.”

¹¹Maleeka vu̵ 'waapád, vu̵ dii daa kan láan gbaŋ pee, kan ı̵́ nii pee vu̵, kan hȩn zá̧a̧d ndaddú̵ pee vu̵. Vu̵ ya kə̧ə̧ la do' láan peelı̵́, vu̵ nə'əy zu̵u̵ há̧á̧ ya̧g túń voo ya̧ zu̵u̵ hágá sag. Vu̵ na' Tayɨɨ,

¹²vu̵ o̧: “Aamɛ́n! Hȩn kə̧́"ȩ́, kan hȩn dəmné, kan hȩn gaalı̵́, kan nag dȩné, kan na"ȩ́, kan hȩn mbalı̵́, kan néélȩ́ máa, Tayɨɨ baa ví woo nɔ, há̧á̧ káákáá, aamɛ́n!”

¹³Ɨ́ nii pee dágá vin: “Nóo vu̵ dɔ́ sa̧a̧m heená heená yȩlá? Vu̵ yaa ya woo tɛ́lá?”

¹⁴Mí hí̧i̧du̵: “Aga móo gaa vu̵, ı̵́ 'yɛ́lı̵́ míí!” Duu o̧n: “Nán ku̵u̵ duun vu̵ kan moo na'a, ku̵u̵ sə́d máa vu̵ yu̵. Vu̵ tɛ sa̧a̧m voo vu̵ dȩ' tál mɛm mbee waa woolı̵́.

¹⁵Moo woo nɔ, vu̵ dii tíŋ́ láan gbaŋ Tayɨɨ woolı̵́, vu̵ kɔ́ddu̵ ba'ad vid kan zá̧ga̧ á̧ḿ woolı̵́ lig hȩn ha"ı̵́lı̵́. Ɨ́ ka mbaa láané yȩ, wú̵ńnɔ kɛn vu̵ lig woolı̵́.

¹⁶Go̧o̧m sı̵́ń duu ya̧n vu̵ sı̵́ né, mam wú̵ń 'wɔn vu̵ sı̵́ né á̧ḿ. Zá̧ga̧ sı̵́ń pin vu̵ né, kóó ya píím gbo̧o̧ tóó sı̵́ń duu pin vu̵ sı̵́ né á̧ḿ,

¹⁷moo mbee waa ka mbaa tíŋ́ láané yȩ sı̵́ńnɔ tu̵ vu̵ kɔ́ ı̵́ waa tu̵ mbee tóó wɔgɔ. Sı̵́ń pa̧ŋ vu̵ laan mam zɔg vágádı̵́. Tayɨɨ sı̵́ń na'ad vu̵ mɛmɛ́ḿ nɔ́ɔ́ voolı̵́.”