Read Dii DEBTERE HȨN HO̧LȨ́ 8 Bible Online

DEBTERE HȨN HO̧LȨ́ 8 - Dii bible

DEBTERE HȨN HO̧LȨ́ 8

¹Sey mbee waa pee ka dɛ hȩn sȩȩmné ı̵́ gúndɛm woo máa, hȩn tóó nam be"ı̵́ né, ya mbaa simm há̧á̧ ya̧ rééta hɨɨ waa.

²Pig woo máa, mí ho̧ maleeka ı̵́ ku̵u̵ dii tíŋ́ Tayɨɨ woolı̵́ gúndɛm pee vu̵. Vu̵ pú̵ vu̵ ga̧' naa gúndɛm.

³Maleeka tóó ya dii do' ya hȩn ha"ı̵́lı̵́, tíd tɨg do̧' nagá. Zu̵gu̵ sa̧g to̧o̧ dɨ tíŋ́ woolı̵́. Vu̵ duu ha'adu̵ zu̵gu̵ tóó ɓu̵u̵lı̵́ na'a. Ɓɛ zu̵gu̵ yȩ kan hȩn ɓá"ı̵́ nán Tayɨɨ woo voo, uu hȩn 'waapád ya hȩn ha"ı̵́ do̧' tíŋ́ láané yȩlȩ́.

⁴Nim zu̵gu̵ ka a̧n yȩ uu dɔg nag maleeka pee woolı̵́ tíŋ́ Tayɨɨ woolı̵́, sú̵g dɔg kan hȩn ɓá"ı̵́ nán Tayɨɨ woo pee voo á̧ḿ.

⁵Pig woolı̵́ máa, maleeka ɓɛ tɨg pee, fá̧á̧ vee yɨg ya hȩn ha"ı̵́lı̵́ pee hi̧' tíŋ́ woolı̵́, gbɔ zu̵u̵ hágá kpuy. Vaŋná bó̧ó̧ sée hȩn, hȩn wa̧a̧lȩ́ vu̵ kiy, mam nim, hág nam á̧ḿ.

⁶Maleeka gúndɛm vu̵n tíd ga̧' naa gúndɛm pee vu̵, vu̵ laa mbaa bə́' moo úúlí.

⁷Maleeka ı̵́ dəné woo dəŋ úú ga̧' naa woo. Ta'ab kan vee, vu̵ yá̧á̧n kan mɛm, vu̵ gbɔ vu̵ zu̵u̵ hágá. Hág ka' dágá a̧n, kan la' vu̵ á̧ḿ, kéé ka' idú. A̧n hó̧d há̧a̧d vu̵ 'waapád.

⁸Pig woolı̵́ máa, maleeka ı̵́ idú woo duu úú ga̧' naa ı̵́ woo. Ma hȩn tóó man kan gu̵u̵ gbo̧o̧ tóó, ma' vee, ma vu̵ gbɔgɔ zu̵u̵ mam gbo̧o̧lȩ́. Mam ka' dágá tii mɛm, kéé ka' idú.

⁹Hȩn zá̧a̧d Tayɨɨ ka yɨb vu̵ mammé máa, ka' dágá vu̵ nɔɔ, kéé ka' idú. Vu̵ tud nɛ́ŋ́ gbo̧o̧ vu̵ ka' dágá, kéé ka' idú á̧ḿ.

¹⁰Pig woolı̵́ máa, maleeka ı̵́ ta̧a̧nɔ́ woo duu úú ga̧' naa ı̵́ woo. Zoo waa gbo̧o̧ dágá pɛ zu̵u̵ be"ı̵́ kɔ́ ı̵́ vee nɔ́ɔ́ tóó ka dɔ́gɔ́ máa wɔgɔ. Pɛ ziŋ gbo̧o̧ vu̵lı̵́ ka' dágá dágá, kan ya mam ka ga vúd hágá máalȩ́ á̧ḿ, kéé ka' idú.

¹¹(Yéé zoo waa yȩ woo “hȩn yó̧m.”) Mam yȩ ka' tóó yo̧m sú̵'ú̵. Nán ɓu̵u̵lı̵́ na'a ku̵u̵ zɔ máa, vu̵ nɔɔ, moo mam yȩ ka' tóó ká vu̵ tii hȩn yó̧m sú̵'ú̵.

¹²Pig woolı̵́ máa, maleeka ı̵́ ndaddú̵ woo duu úú ga̧' naa ı̵́ woo. Zá̧ga̧ ka' dágá, kan sȩȩ ka' dágá, kan zoo waa ka' dágá, vu̵ duu tún ní, vu̵ kéé túlí ka' ı̵́ idú voo vu̵. Ya tún ní há̧á̧ ya̧ hɨɨ waa ndaddú̵. Hȩn dágá yȩ wu̵ kɔ́y kan vid á̧ḿ.

¹³Mí duu tə́g nɔ́ɔ́, mí ki bo̧o̧ úg daa be' sa̧a̧mé zulí, ká̧ŋ́ yɛ́g dɔg yúba, o̧: “Gíḿmi, gíḿmi! Sey maleeka ta̧a̧nɔ́ ku̵u̵ kéé yȩ u̵u̵ úú ga̧' naa ı̵́ voo tée, nán hágá yȩ vú̵ń mbaa née kan hȩn gíḿ ka dɨ yaalı̵́ na'a yȩlá?”