Read Dii DEBTERE HȨN HO̧LȨ́ 9 Bible Online

DEBTERE HȨN HO̧LȨ́ 9 - Dii bible

DEBTERE HȨN HO̧LȨ́ 9

¹Pig woolı̵́ máa, maleeka ı̵́ nɔ́nɔ́ woo duu úú ga̧' naa ı̵́ woo. Mí ho̧ zoo waa tóó ka pɛ zu̵u̵ hágá máa, vu̵ pú̵gu̵ makúblí waa dəə dim gbo̧o̧ tóó ka sú na'a máa.

²Zoo waa pee tu̵'u̵ dəə súlí na'a pee, nim uu vúd dɔg wu̵lı̵́ kɔ́ ı̵́ naŋ ku̵u̵ gə zó̧ḿ sa̧n aalı̵́ máa wɔgɔ. Nim pee ní' zá̧ga̧, be' sa̧a̧m ví̧i̧ mbaa kúlúḿ.

³Sig gboo vu̵ vúd nim peelı̵́ hi̧' hág 'waapád. Vu̵ pú̵ vu̵ néélȩ́ hȩn tá'ané kɔ́ ı̵́ nɛɛg vu̵ wɔgɔ.

⁴Vu̵ o̧d vu̵ ba u̵u̵ kɔ́d hó̧d vu̵ hȩn ndɔ́gɔné sá, kóó la' vu̵, kóó hȩn há̧a̧d tóó dágá aga a nuŋ hȩn ndɔ́gɔné sá. A̧máa u̵u̵ kɔ́d séý nánán ı̵́ ku̵u̵ zugun tumbal Tayɨɨ woo ya̧g túń voolı̵́ né máa vu̵ yu̵.

⁵Sig gboo yȩ vu̵ nugun néélȩ́ nán pee vu̵ nɔɔné né, a̧máa ba u̵u̵ baa tá'a vu̵ há̧á̧ sȩȩ nɔ́nɔ́. Ku̵u̵ ta' vu̵ tée, ndɔ́gɔ vu̵ kɔ́ ı̵́ nɛɛg ka ta' ba máa wɔgɔ.

⁶Sȩȩ máa nɔ́nɔ́ yȩ, nán vú̵ń soo nɔm, a̧máa vú̵ń nugu né. Vú̵ń hí̧í̧ nɔm, a̧máa nɔm wú̵ń lúú ɗug gbɔ vu̵ la ɗiilí na'a.

⁷Sig gboo yȩ vu̵ mbaa kɔ́ ı̵́ go'oy tóó ku̵u̵ mbɔ́g vu̵ 'waa moo laalı̵́ sɨɨ kɔ́lı̵́ máa wɔgɔ. Vu̵ 'yɛ́ hȩn tóó yúlí kɔ́ ı̵́ mɛɛtawəl do̧' wɔgɔ. Ya̧g túń voo mbaa kɔ́ ı̵́ ı̵́ nánán voo wɔgɔ.

⁸Yúú hú̧' voo mbaa kɔ́ ı̵́ ı̵́ wakȩ́ȩ́ voo vu̵ wɔgɔ. Nú' voo mbaa kɔ́ ı̵́ ı̵́ kəə voo vu̵ wɔgɔ.

⁹Vu̵ ta zaŋ sii hɨɨ tóó kɔ́ ı̵́ sa̧a̧m yȩ́g wɔgɔ. Namné voo kiy kɔ́ ı̵́ móóta zo' tóó ku̵u̵ dɨ laalı̵́ ya̧g sɨɨlı̵́ zu wɔgɔ.

¹⁰Vu̵ dɨ kan zam kan sı̵́d kɔ́ ı̵́ nɛɛg vu̵ wɔgɔ. Vu̵ tá'an nán vu̵ kannɔ há̧á̧ ya̧ sȩȩ nɔ́nɔ́.

¹¹Maleeka ı̵́ ka mbaa yúú dəə dim gbo̧o̧ peelı̵́ máa, waa gbanii yúú voolı̵́. Vu̵ beewu̵ kan ya̧g eebərə́ə “Abadɔ́ŋ,” kan ya̧g gɛrɛ́g máa “Apoliyó̧ŋ;” yéé woo tú' “ı̵́ hȩn tunní.”

¹²Hȩn gíḿ ı̵́ dágá woo ya̧a̧ sú̵'ú̵. Pig hȩn yȩlȩ́ máa, hȩn gíḿ ı̵́ tóó idú vú̵ń duu dɨ yaalı̵́ɨ.

¹³Pig woolı̵́ máa, maleeka ı̵́ gúú woo úú ga̧' naa ı̵́ woo. Mí ki yɛ́g tóó vúd ya ya nduguyní ya hȩn ha"ı̵́ do̧' tíŋ́ Tayɨɨ woolı̵́ peelı̵́.

¹⁴Yɛ́g pee o̧d maleeka ı̵́ gúú woo ka tíd ga̧' naa pee: “A̧m buu maleeka ndaddú̵ ku̵u̵ ta vu̵, ku̵u̵ dii ya̧g ziŋ gbo̧o̧ Eefaláddı̵́ yȩ vu̵ gbɔ la ú̵!”

¹⁵Vu̵ buu maleeka ndaddú̵ pee vu̵ gbɔ. Tayɨɨ ká mbɔ́g vu̵ də́ń moo sey yȩ, a ya̧ kan bá' yȩ, kan sȩȩ yȩ, moo ve' yȩ nɔ, moo u̵u̵ pəg nán ka' dágá vu̵ nɔɔ wu̵lı̵́, a kéé ka' idú.

¹⁶Vu̵ wá' só̧ó̧ze ı̵́ ku̵u̵ ɗáá go'oy máa vu̵ tú'un; vu̵ dɨ miliyó̧ŋ tȩmɛre idú.

¹⁷Hȩn ho̧lȩ́ míí káń ho̧ máa, dɨ ná'. Mí ho̧ go'oy vu̵, kan nán ku̵u̵ ɗáá vu̵ máa vu̵, vu̵ dɔ́ sa̧a̧m hɨɨ vu̵ yȩ́ȩ́ná kɔ́ ı̵́ vee wɔgɔ. Tóó vu̵ mbaa kɔ́ ı̵́ zargína wɔgɔ, tóó vu̵ mbaa kɔ́ ı̵́ ke'ed pu' wɔgɔ. Yúú go'oy yȩ voo vu̵ mbaa kɔ́ ı̵́ yúú kəə voo vu̵ wɔgɔ. Kíd tóó má' vee vúd ya̧g voolı̵́, kan nim á̧ḿ.

¹⁸Hȩn nɔm ta̧a̧nɔ́ yȩ vu̵, kíd, kan vee, kan nim ku̵u̵ vúd ya̧g voo vu̵lı̵́ yȩ, vu̵ nɔɔn nánán vu̵ ka' dágá; kéé ka' idú,

¹⁹moo go'oy yȩ vu̵ nuŋ néélȩ́ yȩ dɨ ya̧g voolı̵́, kan zam voo vu̵lı̵́ á̧ḿ. Zam voo vu̵ man kan bɨɨg vu̵ yu̵. Vu̵ dɨ kan yúú, vu̵ nɔ́gɔn nánán vu̵ wu̵lı̵́.

²⁰Nán kéélı̵́ woo ku̵u̵ nɔɔn vu̵ kan hȩn nɔm nɔɔné yȩ vu̵ né máa, vu̵ gbɔn tayɨɨ lee ká ku̵u̵ mbɔ́gɔn kan nag voo yȩ vu̵ duulí né. Vu̵ gbɔn yigid ɓı̵́d vu̵ na"ȩ́ né, kan tayɨɨ ku̵u̵ mbɔ́gɔn kan do̧' yȩ vu̵, kan sardi, kan hɨɨ yȩ́ȩ́ vu̵, kan 'yɛgɛ vu̵, kan la' vu̵ á̧ḿ né. Hȩn yȩ vu̵ ho̧n nɔ́ɔ́ né, vu̵ kin tɔ́g né, vu̵ 'yȩm né á̧ḿ.

²¹Nán yȩ vu̵ dii nɔm nɔɔné voo gbɔn né, kan ndu̵n, kan ɓáa kɔ́lı̵́, kan líw kɔ́lı̵́ á̧ḿ.