Read Dimasa Matthew 13 Bible Online

Matthew 13 - Dimasa bible

Matthew 13

¹Okhali ni basain ha Jisu noh ni phrang baigo hi, dihkharnai dergong ha bo kham ba.

²Boha Jisu niha sersi giding subung buthu bojom japhai ba. Odebani rung ha bo kham ba, ode subung buthu dergong ha song ba.

³Daogari jang bonsi khe gabang grao bo thi ba, Maimu saiyaba de maimu sai mane khlai hi bo thang du,

⁴Bo maimu sai baha gejesi lama bijing ha galai ba, ode dao buthu khonji thar ba.

⁵Gejesi jakha de longphlai ni basao, hah baleleyaba hathan ha galai hi, hah rajaya bani srap basla jahi rain lang la kha.

⁶Thikhabo sain juphai kha ning sain jang rain du; bede thikhade yader suphuya bani srup lang la du.

⁷Gejesi jakha de sam busuling ha galaising hi, sam dip phung jao kha.

⁸Thikhabo gejesi jakha de, hah hamba ha galai hi grong jang rjasi, sereba jakha de grong jang bisa tham, sereba de grong thimjhi bathai thai kha.

⁹Sere ni khmao dong, bo khna la thing.

¹⁰Odehe, yaohon rikphayarao Jisu niha phai hi sing ba, Snadi jabani bonsi khe daogari grao jang ning thi ba?

¹¹Jisu bonsi khe thiphin ba, Sorgo raji ni grao huikhaoyaba khe nisi de tharmai phu du; thikhabo bonsi nede tharmai rima niya.

¹²Sere niha dong, baosing nang, ode bonsi gabang maima se. Thikhabo, sere niha giri, dongyaba khebo bonsi langlama se.

¹³Bonsi bujiba ringya bani bonsi niha daogari ni grao jang ang thi ba. Bonsi nu lakha bo nuya, khmao jang khna lakha bo bonsi khnaya, bede thikhade bonsi bujiya.

¹⁴Bonsi ni balam ha gorasali Isai sainthi dayaba grao bonsi ni basao ha gibi japhai kha: Khmao jang de khna nang, thikhabo bujiba de buji nang niya, muthai jang nu nang, thikhabo bonsi nu nang niya,

¹⁵Bede thikhala, bonsi ni khah rao kha, Bonsi ni khmao bo nathong ja kha ode bonsi ni muthai bo mudim thar kha Ode niyakhade, bonsi muthai jang nu nang, Ode, bonsi khmao jang khna nang bonsi khah ha buji nang Ode, bonsi phaiphin hi ‘Ang ning bonsi khe go rima nangjao nang’ ode bo thi ba.

¹⁶“Nisini muthai nuba ni khlai hi ar nisi ni khmao bo khna bani khlai hi nisi khaja lah.

¹⁷Gibi jang ang nisi khe thi du, gabang gorasalirao ar gabang subung hamyaraobo nisi nuyaba buthu khe naima mijing re, thikhabo bonsi nuphuya; nisi bujiyaba buthu khebo bonsi bujima mijing re, thikhabo bonsi buji phuya”.

¹⁸Odese, nisi maimu saiyaba ni grao daogari ni ortho khe khna lah.

¹⁹Sere raji ni grao khe khna hi bujiya khade subung hamyayaba phai hi, boni khah ha saiyaba khe sela ma se. Bo khe se thiba lama bijing ha galaiyaba.

²⁰Longphlai basao ha galaiyaba de grao khna hi srap maniyaba khe se thiba;

²¹Thikhabo boni ha yader giri bani khaisa basain ne se ning dong ba; bede thikhade grao ni khlai hi dukhu hadi rijao kha ning bo rain re

²²Busuling ha maigrong galaiyaba de edese; bo grao khede khna du; thikhabo, habsao ni khah waimu ar mosol grao jang boni grao khe dip phung du. Odebani bo bathai thaiya.

²³Odehe, hah hamba ha maigrong galaiyaba de edese, grao khna hi boni khah habo buji du, bode asaba thikhabo bathai thai ma se. Sereba de rjasi, sereba de bisatham, sereba de mathimji bathai thai ma se.

²⁴Gibin grao jang daogari lahi bonsi niha Jisu grao thiphin ba, Sorgo rajide, subung jar ni phadain ha hamba bumu saiyaba jang suhi thiyaba lai se.

²⁵Thikhabo, bonsi thuba ha sotru phai hi, mai ni gejer ha mai mosol bumu saihi bo thang la kha.

²⁶Mai dephai hi, bo srup phaikha de mai mosol bo nujao phai kha.

²⁷Bo subung ni lengrao phai hi boni ha, Gedeba, nini phadain ha maimu hamba se ning saiya na somo? Mai mosol la braha ni phrang phai hi dong ba? thi hi bonsi sing ba.

²⁸Bode sereba sotrurao ni khusi se thi hi thiphin ba. Jing thang hi phi ma? thihi bonsi sing ba.

²⁹Bo thiphin ba, Niya, olei da khlai; bede thikhade mai mosol khe nisi phiba ha mai khe bo phi pha jao nang,

³⁰Mai rathor sosi dong la thing; ode mai rathor ha mai rayarao khe sagang ha mai mosol khe bojom khlai hi saokhrip mane khathaida mane ang thi ma, ar mai khede ani noh ha lusing mane thi ma.

³¹Jisu bonsi khe gibin daogari thi ba: Sorgo raji de subung saosi yaolei bogrong lahi jar ni bari ha saiba lai se;

³²Bode khrip thane khasidao thaoyaba bogrong se, thikhabo buphang jahi juphai kha ning, samlai bon thabo dedao du, ode nokhasao ha birbaiyaba dao buthu bo boni bedep buthu ha thuphai re.

³³Gibin daogari grao bonsi niha bo thiphin ba, Sorgo raji de saosi haingajik humao laha hi, honduri khamphlu tham saphin hi phung khlip hi, khrip humao jaba lai se.

³⁴Ebo khrip grao buthu khe Jisu daogari jang bonsi niha sainthi ba, daogari laya hi bo grao masi bo thiya.

³⁵Gorasali rebyaba grao buthu phura ja mane bo elei dang ba: Ang bonsi niha grao thiba ha daogari grao jang thi ma, Phirthi sangsai jenba ni phrang grao hui khaoyaba ang thima se.

³⁶Boha bo subung buthu khe dangkhlai hi noh ha thang la kha. Bo jang yaohon rikphayarao boni ha phai hi bonsi sing ba, Phadain ni mai mosol ni daogari khe jinthane thiphla ri.

³⁷Jisu thiphin ba, Hamba bumu saiyaba de Marsi ni Basa se;

³⁸Phadain de habsao khe se thi ba, hamba bumu de raji ni basathu se, mai mosol buthu de phaphi ni basathu se.

³⁹Sotru saiyaba de Soithan se. Mai raba ni bubli de habsao jamthaoma khe se thiba. Mai raginyarao de sorgo ni deglarao khe se thi ba.

⁴⁰Mai mosol buthu khe bojom khlai hi wai ha saokhripba lai habsao jam khali de olei jasosi ning ja ma se.

⁴¹Marsi ni Basa bo jar ni deglarao khe haiha hi boni raji ni phrang phap gajai dang riyarao ode hamya dangyarao khrip khe bo saikho hi bojom khlai nang,

⁴²Odehe, sao hi dikhlaiyaba wai ha bonsi khe dangsing nang; oraha de gra hi hathai wai ma se.

⁴³Okhali de subung hamba buthu de bupha ni raji ha bonsi sain lai jna hima se. Sere niha khmao dong, khna la thing.

⁴⁴“Sorgo raji de don phip khao hi dengba lai se. Bokhe subung mai hi, bo huikhao dada bo thang la ba. Ode, jar niha khrip don dongyaba khe phain hi phadain khe bo barai kha”.

⁴⁵“Sorgo raji de bephari subung guphu ni muilo gnang longthai hamdao thaoyaba khe smaiba lai se.

⁴⁶Bode longthai muilo gnang khe mai hi bo thang la kha, ode boni ha khrip dongyaba khe phain hi bo barai kha”.

⁴⁷Odehe, sorgo raji de sagor ha jeh dangsing baha khrip jadi bojom khlai hi sikkhuba lai se.

⁴⁸Bo gablai kha ning hakhong ha bonsi lukhlai re; ode bonsi kham hi khrip hamba khe khuthim ha bojom khlai re, thikhabo hamyayaba khede bonsi dangkhlai re.

⁴⁹Habsao jamthao khalibo olei jasosi ning ja ma se. Sorgo ni deglarao baigo phai nang, ode subung hamba ni phrang subung phaphirao khe degao ri ma se.

⁵⁰Sao hi dik khlaiyaba wai ha bonsi khe dangsing ma. Oraha de grahi hathai wai ma se.

⁵¹Jisu bonsi niha, Ebo khrip grao buthu khe nisi buji kha? thi hi bonsi khe sing ba. Bonsi boni ha, Buji kha dou, thi hi thiphin ba.

⁵²Odese, bonsi niha, Ode thikhade, Dara-disa khe slingriyaba ode sorgo raji ni lama khe slingriyaba de noh bubra jar ni don bokhoh ni phrang jinis gadain buthu ode jinis gajam buthu khe khaikho ba lai jasosi se, thi hi thi ba.

⁵³Jisu ebo daogari buthu khe thiblai ba jang oraha ni phrang baigo hi thang la kha.

⁵⁴Odehe, bo jar ni dongthan nogor ha sohi bonsi ni bikhoh buthu ha bonsi khe sling ri ba, odebani boni grao buthu khe khna hi hamsi ning gmang lai ba. Ebo subung la olei gyan ode gmangthao sisi raothai buthu khe braha ni phrang bo mai kha?

⁵⁵Ebo subung la bakso slamyaba ni basa niya na? Boni daphlungrao bo Jakob, Josef, Simon, Juda thi jaoyarao niya na?

⁵⁶Boni bahandao thubo jini ha khrip dongyaba niya na? Ebo subung la braha ni phrang eleiyaba khrip khe bo mai ba? thi hi bonsi thi ba.

⁵⁷Odehe, bonsi bokhe jajaoya kha. Thikhabo, Jisu bonsi niha thi ba, Gorasali de jar ni nolei ha ode jar ni noh khe garhi bo bakhan riya hi dongya.

⁵⁸Odehe, bonsi lonya bani khlai hi oraha de gmangthao sisiyaba khusi khe bo gabang dangya kha.