Read Dimasa Matthew 14 Bible Online

Matthew 14 - Dimasa bible

Matthew 14

¹Bo bubli ha Raja Herod Jisu ni balam ha khna kha.

²Bo jar ni subungrao niha thiba, Bode baptisma riyaba Johan ning ja kha, bo githi ni phrang baija phin kha thi, odebani boni raothai buthu boni ha khusi dang kha.

³Herod boni daphlung Philip ni bihih Herodi ni khlai hi Johan khe remhi bo kha ba, ode phatho ha bokhe jeb kha.

⁴Bede thikhade Johan boni ha thiblai kha, Bo khe noh da ja.

⁵Herod Johan khe sthaima bao ba, thikhabo subung buthu khe khin du; bede thikhade bonsi bokhe gorasali se mani ba.

⁶Herod ni hajaiba basain sophai khali Herodi ni bisik khe bo gejer ha bai rihi Herod khe khaja ri kha.

⁷Odebani, bo snadi khe sain du ri mane khlai hi smai dang hi bo hanggai kha.

⁸Boni buma bokhe sibringba lai, Eraha ning khopra ha Baptisma riyaba Johan ni bokhro khe a ne labu ri, thihi bo sain ba.

⁹Boha Raja de waimu nang kha; thikhabo, subung khalai khampha laiyarao ni sagang ha grao hanggai bani khlai hi labu mane bo grao ri kha.

¹⁰Odebani bo subung haiha hi phatho ha Johan ni bokhro khe dainso ri kha.

¹¹Boni bokhro khe khopra ha labu hi bo malasa ne bonsi yaopha kha. Ode bo jar ni buma niha langpha kha.

¹²Odehe, boni rikphayarao phai hi boni manggathi khe thon hi bonsi phip kha, ode Jisu niha bonsi sainthi kha.

¹³Boha Jisu bo grao khe khna hi oraha ni phrang siri siri hathan gede rung ha ga hi sao jang bo thang la kha. Thikhabo, subung buthu khnaba jang nogor ni phrang igah jang thang hi bonsi yaohon rikpha kha.

¹⁴Jisu rung ni phrang baigoba ha gabang subung buthu khe nu dada hamsi ning khasaosi jajao hi bonsi ni limyarao khe bo ham ri ba.

¹⁵Odehe, sainbli japhaiba ha, yaohon rikphayarao boni ha phai hi thi ba, Ebo de siri siri hathan se, bonsi jar jimane khlai hi barai mane subung buthu khe haiha lah.

¹⁶Boha Jisu bonsi khe thi ba, Bonsi khe haihama nangya, nisi ning bonsi ji mane ri lah.

¹⁷Bonsi boni ha, Eraha de hon pher bowa ar nah magin se ning jini ha dong ba, thi hi thiphin ba.

¹⁸Jisu thi ba, Bo buthu khe ani ha labu lah.

¹⁹Jisu subung buthu khe dubri basao ha kham mane grao ri kha; boni yaohon ha hon pher bowa ar nah magin khe lahahi, sorgo gede nai hi bo hamthai rihi, hon khe saso hi, bokhe rikphayaba subung buthu niha ron ba.

²⁰Bonsi khrip bo jihi hoh gablai kha. Ode bonsi ji blaiyahi honduribo khamphlu jhigin bonsi bojom khlai ba.

²¹Jiyarao jakha de masainjik ar ansa khe sain phaya hi miyarao khrip jang rjing bowa lai ja du.

²²Odehe, subung buthu khe bonsi dralai ri bani bising ha, bo thang mani sagang ha dih nar gede thang mani khlai hi jar ni rikphayarao khe rung ha srap gakhu ri kha.

²³Subung buthu khe dralai ri bani yaohon ha Madai bi mane hading ha gibin khlai hi bo thang la kha. Sainbli japhai hi oraha ning bo sao jang dong ba.

²⁴Rung jakha de wari gejer ha dong ba, bar jang niyayaba gede sip bani dithon jang baipha kha.

²⁵Bo bubli ha Jisu sariphang japhai hi dih basao ha igah jang hem hi, jar ni rikphayarao ni gede bo phai ba.

²⁶Rikphayarao Jisu khe dih basao ha hem hi phaiba khe nuhi, Ho go, bud phai du, thi hi bonsi gmang giji ja ba, ode bonsi khin hi bol jang jirikkhao ba.

²⁷Thikhabo, Jisu bonsi jang srap sainlai hi thi ba, Ang se, da khin, khah santhi jang dong lah.

²⁸Boha Peter thiphin ba, Gabra, ning se thikhade, dih basao ha nini gede phai mane a ne grao ri lah.

²⁹Jisu thiphin ba, Phai kha lah. Odehe, Peter rung ni phrang akhai hi, Jisu ni gede dih ni basao ha hem ba.

³⁰Thikhabo, bar sipba khe nuhi bo khin ba, ode bo gilik didih jahi, Gabra ang khe sogo lah, thi hi jirikkhao ba.

³¹Jisu boni yao khe srap phlao hi, bokhe remkhu hi, bo khe thi ba, Ning lonma bangyayaba, snadi jabani ning lonsingya ba?

³²Odehe, bonsi rung ha gakhuba jang bar thao lang la kha.

³³Rung ha dongyarao, Ning Madai ni Basa gibi se, thi hi bo khe bonsi khlim ba.

³⁴Bonsi dih nar bailang hi Genesaret raji ha sohi kha.

³⁵Bo hathan ni subung buthu bokhe tharmai hi bo haphai ni khrip raji ha subung haiha hi khrip limyarao khe Jisu niha bonsi labu ba.

³⁶Bonsi boni rih bergong khe mang mang rem ma sain ba, odehe, bislei remba bonsi ham thar ba.